Topik:

Pengidup kitai Iban kemaya hari tu jauh tusah dibanding enggau jeman idup tradisi ba rumah
panjai.

Karang Penuh:

Jeman idup diatu kitai endang mayuh amat begunaka macham perengka senipak enggau
pemansang dunya. Enti diperatika enggau manah pengidup kitai Iban jeman kemaya hari tu
jauh tusah dibanding enggau jeman idup tradisi ba rumah panjai. Ba rumah panjai dulu kelia
kitai berasai nyamai sereta lantang agi tang kemaya hari tu tusah amai kelebih agi lebuh ti
beidup diau ba menua orang tauka ba bandar. Penusah ti ditapi baka penanggul guna belanja
ti tinggi, alai diau ti enda tentu meruan, enggau penemu ba guna teknologi ti kurang. Berindik
ari penanggul nya, pengidup kitai kemaya hari tu diansaika tusah agi laban ti patut senipak
enggau guna pemansang kemaya hari.

Siti ari penanggul ti ngenataika penusah ngagai pengidup kitai Iban jeman kemaya
hari tu iyanya penanggul guna belanja ti tinggi. Baka ti ditemu kitai kemaya hari tu mayuh
amai perengka ti diguna kitai nitihka pemansang dunya lalu tebal agi rega perengka nya pan
mar mega. Pia mega, baka sida ti bekerja ba menua orang sida nguna belanja ti tinggi dikena
bebayarka sewa rumah sereta mayar bil api ai. Tu nunjukka tinggi amai guna belanja ba
pengidup kemaya ari enti dibanding enggau pengidup tradisi di rumah panjai. Ambika
banding, sida ti bekerja ba menua orang dipeda nguna belanja ti tinggi laban kitai bela nemu
rewa sewa rumah pan mayar ti dibanding enggau sida ti bekerja semak enggau menua lalu
diau ba rumah panjai semina begunaka sida bebelanja tambang minyak entukar tauka
motosikal aja. Tu balat amai nyadika penusah ba kitai jeman diatu ba pengidup ti nuju arus
pemansang.

Nangkanka nya, pengidup kemaya hari tu mega meri penusah ka kitai lebuh enti alai
diau ti enda tentu meruan. Diau ba rumah panjai nitihka chara idup tradisi jauh lebih lantang
sereta likun agi laban nadai mayuh utai tauka pekara dikenangika kitai. Tang lebuh ti beidup
jeman diatu lebih agi ba bandar endang suah ngasaika enda tentu likun. Ambika chunto,
kemaya hari tu mayuh bendar berita senentang orang ti mechah rumah, enchuri perengka ba
rumah ti balat amai nyadi ba bandar. Tu seruran mai pengirau ba kandang ati enda nyalah
baka orang ti makai enda kenyang, mandi enda basah, tinduk enda jenak laban ti semampai
ngenatika pengelikun ruang bilik diri empu. Manah bendar nyema enti rumah digagaka alarm
tauka bisi nguan jelu ukui ngambika ulih madah lebuh maya orang ti enda dikelala tama ke
rumah.

Ukai semina naka nya, penemu ba guna teknologi ti kurang ulih mai ngagai penudah
idup jeman kemaya hari tu. Pemansang dunya kemaya hari tu senuntuk enggau mensia
mayuh ti begunaka teknologi sereta perengka ti manah sereta canggih dikena gawa, belajar,
beinteraksyen enggau mayuh agi guna bukai. Enda semua orang ngembuan penemu bekenaka
teknologi baikka sida ti biak tauka tuai umur laban enda tebalan bekenaka teknologi ba
pendiau pengidup. Ambika sema, lebuh dunya ti dituntung penusah pandemik COVID-19
diatu, dia dih teknologi diguna ba mayuh macham pengawa lebih agi bala nembiak ti belajar
ari rumah nengah online class ti meri penanggulka sida laban enda semua nembiak bisi
penemu ba teknologi lalu apai indai sida pan mayuh udah tuai enda nemu utai ti bakanya.
Pekara tu bendar balat amai ngenusah sida kelebih agi ke diau ba menua ti enda manah
meruan line Internet.

Nya alai, penusah ti diasaika ba pengidup diatu balat amai meransang bala mensia
ngambika bebendar agi ngereja pengawa ngambika enda tinggal pemansang dunya. Taja pia,
pengidup tradisi ba rumah panjai semampai dikerinduka laban nya ti pun pengangkat bala
kitai Iban sebedau ti ngasaika pendiau pengidup kemaya hari tu. Beduduk ari nya, tiap iku
kitai bansa Iban patut bela meransang pangan diri ngambika mujur baka bansa bukai sereta
idup nyamai laban penyamai dikeinginka, pengeransing dikemeranka, pengelantang diasaika
ba pengidup dudi hari.