MATERI BAB VIII (8)

KALIGRAFI (AKSARA MODRE)

A. Aksara Bali kakepah dados tiga (3), inggih punika aksara Wreastra,
Swalalita lan Modré.
1. Aksara Wreastra, inggih punika aksara sané kaanggén nyurat sasuratan
sané lumrah utawi biasa. Aksara Wreastra wenten akehnyaé plekutus
(18), minakadi: ha, na, ca, ra, ka, da, ta, sa, wa, la, ma, ga, ba, nga, pa, ja,
ya, nya.
2. Aksara Swalalita, inggih punika aksara sané kaanggén nyurat sasuratan
basa Kawi, minakadi kidung, kakawin, sloka miwah sané lianan. Aksara
Swalalita akéhnyané petang dasa pitu (47), minakadi aksara suara
akéhnyané pat belas (14) taler aksara wianjana akéhnyané telung dasa
telu (33).
3. Aksara Modré, inggih punika aksara sané kaanggén nyurat sasuratan
kadiatmikan minakadi japa, mantra, rerajahan taler mapaiketan antuk
parindikan magis. Aksara Modré kawangun antuk aksara Wreastra lan
aksara Swalalita sané kadagingin panganggé lan pralambang ngantos tan
prasida kawacén utawi mati. Ritatkala ngwacén aksara Modré patut
ngrereh pamargi ring lontar Krakah utawi Griguh. Aksara modré
akéhnyané wénten tiga (3) inggih punika Dwi Aksara, Panca Aksara lan
Panca Brahma.
B. Kaligrafi
Kaligrafi mawit saking kruna Latin “kalios” sané martos indah, tur
“graph” martos tulisan aksara-aksara. Dadosne Kaligrafi inggih punika
kaweruhan sané wangun aksara tunggal, raris karangkepan dados aksara
masusun. Kaligrafi marupa pakilitan aksara sané kasurat sakadi anak
ngambar mangda makanten becik utawi asri. Kaligrafi wénten sané marupa
wangun baburon, jadma, wayang, woh-wohan miwah sané lianan (ngantunin
unteng utawi téma sané karincikang antuk sinurat) taler Kaligrafi punika
dados kawangun mawit saking aksara Wreastra lan aksara Swalalita sané
kajangkepin antuk panganggé suara lan pangganggé tengenan. Ring Bali,
Kaligrafi mapaiketan sareng Agama Hindu kamanahang wangun-wangun
aksara sané becik tur ngulangunin. Kaligrafi punika untengnyané indik lango
utawi kalanguan wangun aksara rikala ngawi. Akéh sorohan aksara ring Bali
minakadi aksara anceng pinaka singkatan saking kruna-kruna, minakasi sa
sané martos sarana, ma sané martos mantra miwah sané lianan. Ring ukur
pinaka imba saking Kaligrafi, minakadi:
1. Aksara I : Pralambang Sadasiwa
2. Aksara Ha : Pralambang Wisnu
3. Aksara Ka : Pralambang Mahadéwa
4. Aksara Sa : Pralambang Brahma
5. Aksara Ma : Pralambang Sangkara
6. Aksara Ra : Pralambang Maheswara
7. Aksara La : Pralambang Rudra
8. Aksara Wa : Pralambang Sangkara
9. Aksara Ya : Pralambang Sambu
10. Aksara Ung : Pralambang Sadasiwa