AKSARA BEKEL URIP

Manusa wau embas sampun mabekel aksara ngantos padem taler mabekel aksara.
Aksara Bali pinaka aksara suci, sekancan yadnya ring Bali kadasarin antuk aksara. Aksara
sane ngawinang manusa urip, taler manusa sane ngawinang aksara urip (aksara uriping
jadma-jadma nguriping aksara).

Jadma sasuluh saking aksara Ongkara, sane mabuat pisan ring kahuripan maparaja
ring wewengkon Bali. Aksara pinaka panegul dewek, Aksara nenten ja wantah ceciren urip
mabudaya ring Bali, nanging aksara manunggal ring bhuana alit miwah bhuana agung manut
daging pikayunan agama Hindu. Aksara Ong miwah Om embas pinaka ceciren saking
budaya, agama, filsafat, seni miwah sane lianan. Aksara Ongkara sane pinaka daging utawi
tetujon kahuripan ring bhuana turmaning i manusa. Aksara Ongkara inti kahuripan sane
nguripin sekancan sarwa bawa ring jagat.

Ring dewek iraga wenten aksara Ongkara sane ngadeg miwah nyungsang. Patemon
Ongkara ngadeg miwah nyungsang sane ngawinan i manusa urip. Ring bongkol kanta inggih
punika muncuk Ongkara ngadeg matemu sareng ongkara sungsang. Manusa inggih punika
Ongkara. Rambut pinaka Nadha, Prabu pinaka windhu, Pala pinaka Ardha Candra, Sarira
pinaka aksara U-kara, punika lambang aksara ring padewekan manusa, rupa sastra ring prana
(nafas manusa) yening prana wenten punika ceciren manusa kantun maurip sane kawastanin
atangi, yening prana nenten wenten, punika ceciren manusa sampun padem sane kawastanin
layon sari.

Akeh wenten lontar-lontar sane maosang yening aksara punika wenten ring dewek manusa,
luirin : Lontar Tutur Aji Saraswati, Lontar Angkusprana, miwah sane lianan.

Paiketan aksara ring sarira manusa (Bhuana Alit) miwah Aksara ring jagat (Bhuana Agung)
katlatarang ring lontar Tutur Aji Saraswati inggih punika :

Kunang unggwaning sàstra ring bhuwana agung, HA NA ring purwa, CA RA ring gnéya,
KA SA ring kidul, WA LA ring nriti, MA GA ring kulon, BA TA ring wayabia, NGA PA ring
utara, DA JA ring érúania, YA NYA ring madia, pamada ring sor, carik ring àkàúa, duhur
ing sunia. Malih ring bhuwana alit unggwaning úàstra, A ring idêp, NA ring hati, CA ring
éding lidah, RA ring alis, KA ring pangréngé, Sa ring pitihing nétra, WA ring bangkiang,
LA ring lambé, MA ring mukha, GA ring baong, BA ring pala, TA ring cunguh, PA ring
suku, JA ring hati. Pamada ring papusuh, carik ring buku-buku kabéh.