TERTIB ACARA ULANG TAHUN KE-TAHUN PUNGUAN

RAJA PANGGABEAN, BORU, BERE, IBEBERE: SABTU 11 PEBRUARI 2017

Thema:Hata ni Debata do sitioponta laho mangalo utiutian ni portibion. (Epes. 6:11)

1. Marende sian BE.No : 15: 1+8 “Aut nasa ribu hali ganda”
Aut nasa ribu hali ganda, sanringar ni soarangki
Naeng nasa gogo bahenonku, mamuji Debatantai
Paboa las ni rohanki, hinorhon ni pambaennai.
Sai pujionku do basaMu, saleleng na mangolu au
Pasangaphonku do goarMu, saleleng na marhosa au
Maraud tos pe hosangki, naeng pujionku sangapMi.

2. PUJIPUJIAN DOHOT HAMAULIATEON NI ROHA: (Keterangan: L=Liturgis; S=Sude)

L = Parpunguan las ni roha on tapatupa holan di bagasan goar ni Debata AMA, Anakna Tuhan Jesus Kristus dohot Tondi
Porbadia, na saor nuaeng di tongatonganta. Ai Ibana do sitompa saluhutna.
S = AMEN
L = Arion ima ari najinadihon ni Jahowa, marolopolop ma hita marsomba tu jolona, puji ma goarna jala parhatopot ma
sude denggan ni basaNa.
S =Tongon ma tutu sadarion huingot hami denggan ni basaM ale Debata sadarion marpungu do hami na
mansihaholongan di bagsan las ni roha, hipas do hami saluhutna pajumpang di inganan on. Jala marningot ma hami
di pasupasuM di punguan namion, ala naung di pataru Ho sahat di naung gok umurna ni punguan on 31 taon. Tama
hami sude mandok mauliate tu Ho, jala manghirim hami anggiat tontong di bagasan hahipason hami saluhutna tu
angka tingki ari nanaeng ro.

L = Ale Jesus silehon hangoluan dohot gogo, sai tambai ma hasadaon di hami dohot hahipason nang las ni roha di punguan
namion tu angka tingki ari nananeng ro dope, asa sai tongtong sada hami saluhutna di punguan namion.

S= Huingot hami do sude denggan basaM di punguan namion, boi hami mamestahon Ulang Tahun ni Punguan namion na
pa 31 taonhon, sai lam tambai ma pasupasuM di hami saluhutna , asa tongtong di bagasan pangaramotionMu hami, jala
parsahalai ma hami saluhutna marhite tondiM, asa radot hami mamodai dohot manuturi sesama hami di punguan namion.

L = Ale Jesus sai lehon hiras ni roha di hami saluhutna, di sude pomparan ni Raja Panggabean, boru, bere, ibebere na
adong di kecamatan Ujung Padang on, lehon bisuk dohot hapistaran na sian Ho. Angka na dibagasan parkarejoan, sai lam
tambai pasupasuM. Lehon parsitutuon dohot pangoloion mar-Tuhan jala Ho ma na manjagai hami saluhutna, asa malua sian
angka elaela ni portibion.

S = Ale Jahowa Amanami, Ho do haroroan ni sude denggan basa na mauliutus, basabasahon ma tu hami dame i, ima dame
na marharoroan sian Ho. Asa mardame sonang punguan namI on tu angka tingki ari nanaeng ro. Asa gabe boi hami saroha
sapingkiran, pasupasu hami na pungu on, asa boi hami mangihuthon lomo ni rohaM.

L= Sude do hami Tuhan manghalashon denggan nibasaM tu punguan namion, laos manghirim do hami boi denggan
punguan on tu angka tingki ari nananeng ro marhitehite pasupasuM di umur na ganjang, naung nilehonmu sampe 31 taon.

S= Asa songon na nidok ni natuatua ma dohonon

“ Tubu dingindingin, jonok tu simartolu/ sai pirma tondi madingin, sai horas ma tondi matogu” Sai sada hami songon
daion aek, asa unang mardua songon daion tuak.

L= Sadarion patut ma hami mamuji jala marsomba ale Tuhan, ala dilehon Ho di hami las ni roha, rap sude hami punguan ni
Raja Panggabean. Tung aha ape na hupatupa hami sadarion tung holan na mangasahon asi ni rohaM do; laos marningot
hami di hata ni situatua na mandok:

S= “ Tinapu bulung si tulan, bahen bulung parisapan, mauliate ma di Tuhan ala naung tulus nasinangkapan”. Ala
nungga boi hupatupa hami marulang tahun na pa 31 taonhon punguan ni Raja Panggabean sadarion.

L= Martangiang ma hita: Ale Amanami parasi roha nasumurung; mauliate ma roha nami ala naung di pataripar Ho hami
sahat tu sadarion. Hipas do hami jala sonang so hariborioboan dipasupasu Ho hami mulaulaon, gabe boi hami dapotan
sipanganon songoni ma nang punguan ni Raja Panggabean boru, bere, ibebere nungga taripar tu sadarion marulang tahun
napa 31 taonhon dibagasan hahipason dohot torang ni pingkiran. Hipas do hami saluhutna pomparan ni Raja Panggabean
na adong kecamatan Ujung Padang on. Huparhatopot hami ma asi ni rohaMi Tuhan di hami umbahen marpungu hami
nuaeng sadarion, asa tambaanMu ma gogo dohot hahipason di hami be, asa lam singkop las ni roha nami, hupasahat hami
ma tangiang nami on di bagasan goar ni AnakMu Tuhan Jesus Kristus Tuhan nami . AMEN.

3. Marende No. 585:2 “Somba ma Jahowa Debatanta”

- Puji ma Jahowa Debatanta, Amen haleluya, parasi roha na sumurung do Ibana amen haleluya/ Taendehon ma goar ni
Debatnta, Amen haleluya alani denggan nib asana na tu hita amen haleluya. Endehon amen haleluya (4x)

4. MARHATA PASUPASUON:

L= Hita na pungu dison na mansihaholongan, mauliate ma di Tuhanta, ala panogunoguon ni Tuhanta di hita saluhutna.
Nungga tapatupa be ulang tahun ni punguanta Raja Panggabean napa 31 taonhon. Anggiat hita tu joloan ni arion dapotan
angka appapaga nalomak, asa dapot ma songon nanidok i umpasa na mandok:

“Pinaktikkhon hujur di topi ni tapian sai tu dia pe hita saluhutna pinompar ni Raja Panggabean mijur, disi ma Amanta
Debata, asa disi hamu dapot parsaulian.

S= Ima tutu sai saut ma songoni ! Laos songon nanidok ni natuatua ma:

“Bona ni aek puli di dolok ni sitapongan/ sai tubu ma dihita angka na uli, doras ma nang pangomoan.“ Tumbur ni pangkat
ma tu tumbur ni hotang tudia hita mangalangka sai disi ma dapotan pansalongan.

L= Ima tutu amang raja, inang soripada, haha anggi na napinaribot, sude ma tahe pomparan ni Raja Panggabean di na
marlas ni roha do hita sadarion, asa rap do hita marlas ni roha ala naung gok 31 taon umur ni punguanta Raja Panggabean
alani dohonon ma songon nanidok ni natuatua:

“ Tinapu bulung ni sabi, binutbut pinaspashon/ songoni pe anon na boi tarpatupa punguanta bai ma jolo tahalashon.

S= On pe di hita nasapuguan, sai las ma antong rohanta, sai olo ma hita patoguon jala apoan. Asa radot ma hita di tona ni
Tuhanta dinanidokna: Tung sura liput di taon jolmai mangolu , denggan do ibana marlas ni roha di saluhutnai.

Jala hatani natuatua pe mandok:

“ Hudali ni pangula, disimpan diparapara / molo dung tajalo asi ni roha ni Tuhan; denggan ma hita marlas ni roha.

L= Na marlas ni roha do punguan ni Raja Panggabean sadarion : Asa dohononma songon hata ni na tuatua na mandok:

“ Aek na tio, riongriong di pinggan pasu, Tuhanta do na burju sai di tambai ma di hita ganjang ni umur dohot angka
pasupasu”.

“Asa jongjong di purba tua, manatap tu panamparan, sahat ma hita on tu namauli bulung, torop maribur di hita angka
pomparan.

S= Ima tutu Asa dohonon ma songon nanidok ni natuatua:

“Marbulung ma tandiang, marboras ia singkoru / lam burju ma hita martangiang, asa dapot hita dope ngolungolu.

“Binolus purbatua, laho tu parsingkaman / na burju marnatuatua / ingkon dapotan parsaulian dohot pasupasu sian
Tuhan .

L + S : Amen

5. Marende No. 465:1+4 “Pasupasu lehononMu”

- Pasupasu lehononMu ido bagabagaMi/ songon angka udan nene sai tu au manetek i/ nang tu au nang tu au patetekhon I
tu au.

- Suru ma tondim manggomgom hata nang ulaonhi/ paimbaru ma rohangku, topot au diasiMi/ dohot au, dohot au, sai di
topot Ho nang au.

6. MANJAHA HATA NI DEBATA

L= Hata ni Debata di ulang tahun ni punguanta sadarion, ima na tarsurat di Psalmen 89:16-27" Martua ma bangso na
umboto olopolop!~ angka na marpangalaho di bagsan hatiuron ni bohim ale Jahowa. Sai marolopolop do nasida manipat ari,
marhitehite goarMu, jala timbul do nasida hinorhon ni hatigoranmu..

S= Ai Ho do saudara ni hagogoon nasida, jala hinorhon ni habasaonmi manuarang habasaronnami. Ai sian Jahowa do
lombulombu nami, jala sian na badia ni Israel do raja nami.

L= Ujui mangkatai do Ho di bagasan alatan tu angka naniasianMu. Jala ninmu do; Nungga hupasahat pangurupion tu nasida
ulubalang, nungga hupabangkit, sada doli-doli sian bangsoi.

S= Nungga junpang ahu si Daud naposongku, nungga humiahi Ibana dohot miak habadiaonki. Sai tongdo dongan ni tangaku
ibana, nang botohonku, margogoihon ibana.

L= Naso tupa onjaron ni musu ibana, manang rupaon ni hajahaton ibana sai ropuhanku do angka alona, maradophon
ibana, jala ragehononku do na manghosom ibana.

S= Jala hasintonganku dohot asi ni rohangku mandongani ibana , jala manuarang do sogot tandukna marhitehite goarhu.
Jala pampeonku tanganna tu laut, jala siamunna tu angka sunge.

L= Ianggo Ibana jouonna ma ahu; Damang do ho Debatangku dohot partanobatoanku, ahu pe bahenonku do ibana
sihahaan, na timbul sian angka raja ni tanoon.

S= Ro di saleleng nilelengna paianonku di ibana asi ni rohangku, jala sai hot do padanhu tu ibana.

L+S = Martua ma na tumangihon hata ni Debata, jala na umpeopsa. AMEN.

7. Marende B.E. No. 461 : 3 “ Songgop tu hami “

- Lehon hataM i ma tau podanghi, Debatangki na gogo i/Asa sai talu sude musuMi, Debatangki na gogo
i/Manghatindangkon tongtong goarMi, asa malua pardosa disi/Asa dijangkon Tuhanta ma i, Debatangki na gogo i.

8. Tangiang Pangondianon: Sahalak sian Pengurus

9. Marende No. 190:3. “Las rohangku situtu”

- Las rohangku situtu, ai parjambar au tutu/ di nadenggan sasudena pinarbaga ni Debata/ di sude na burjui, mangihuthon
Jesusi.

10. JAMITA: Epesus 6:11

11. Marende No. 188:1…… “Jahowa siparmahan au) (P. Pelean)

- Jahowa siparmahan au, dang hurang manang aha/ ai nasa jea di padao, do sian dorbiana/ tongon di baen na lomak I, lao
pangoluhon tondiki di baen asi rohana.

- Di togu au tu nation, aek mata hangoluan/ dibaen ho tondiki sio, didalan hasonangan/ sabam rohangku do tongtong
saleleng au di tano on/ baen sangap di goarna.

- Tongtong do denggan ni basam, jambarhu di ngolungku/ tongon do asi ni roham mangihut di langkaku/ dungi dung suda
bohalhi, sai ingananhu jabumi saleleng ni lelengna.

12. Parsuruon/Tangiang Panutup

L: Hamuna angka dongan na hinaholongan, na marlas ni roha do hita sadarion di ari nauli na denggan na pinasahat ni
Debata di hita, nunga taida jala tadai denggan basa dohot asi ni roha ni Tuhanta i, antong borhat ma hita manghaporseai
Debata, jala tadok ma:

S: Sai haholongi ma hami Tuhan di bagasan Asi ni rohaM! Tahalashon ma Ulang Tahun ni punguanta Raja
Panggabean, Boru, bere,Ibebere napa-31 taonhon sadarion. Borhat ma hita mangulahon dohot patupahon na dumenggan di
punguanta na gabe dalanta laho mangulahon lomo ni roha ni Debata.

L: Ho do ale Tuhan bona ni asi ni roha dohot hahipason; gok di Ho do nang pasupasu sipasahatonMu di hami be. Di
tanganMu do ganjang ni umur nang hamoraon pe, Alani sai lehon ma i di hami be, jala marsangap ma Ho dibagasan
Ulaonnami saluhutna. AMEN.

L: Tangiang Pelean (Agenda)

L+S: Rap mandok ma hita tangiang Ale Amanami….

L : Pasu-pasu

L+S: [Mangendehon Amen-Amen-Amen]

III. Acara ulang Tahun

- Tiup Lilin

- Potong Kue

- Makan Bersama

- Mandok Hata:

-(di atur ma hombar tu ringkotna)

TUHAN MEMBERKATI

H O R A S