ARJUNA TAPA

Kacerita Sang Hyang Indra kalintang sungsut santukan Ida mireng orti Indrloka pacang
kagebugin olih Niwatakawaca, ratun raksasane ring Manimantaka. Genah jagate punika ring
bongkol Gunung Mahamerune tanggu kelod. Niwatakawaca kalintang sakti dane polih
panugrahan Sang Hyang Rudra, nenten seda olih detia, denawa, raksasa miwah dewa. Nanging
yan wenten manusa-manusa sakti, manda dane tangar ring urip.

Indike punika karembugang olih Sang Hyang Indra kairing olih para Rsi kahyangane. Ida
ngrincikang upaya pacang ngrereh kanti manusa sakti, sane prasida ngaonang Niwatakawaca,
pradene rauh ngebug swargane. Kala punika kapireng kapir-kapiran orti Sang Arjuna sedek
nangun tapa ring Gunung Indrakilane. Sang Arjuna pacang nunas kesaktian mangda molih ring
payudan. Sang Hyang Indra sampun uning wantah, mula sengka anakenangun yasa mangda sida
mapikolih, santukan gegodane kalintang akeh makadi pengliput wiyasan panca indrane. Mangda
kayune nenten obah, patut teleb astiti bakti ring Ida Sang Hyang Widhi Wasa, ida stata ledang
nganugrahin anake sane pageh ngawastawa ida.

Sang Hyang Indra raris ngutus widiadarine sane ayu-ayu pitung diri, minakadi dedari
Supraba miwah Tilottama manda ngoda tapan Sang Arjunane. Sadurung widiadarine pitung diri
punika mamargi, dane tangkil dumun ring Sang Hyang Indra nunas panugrahan miwah pawisik.

Sang Hyang Indra ngandika: "Cening widiadari ajak pepitu, bapa ngidih tulung teken
cening, jani bapa ngutus i dewa luas ke gunung Inrakilane ngoda I Arjuna sane sedek nangun
tapa. Sujatine i dewa suba jegeg-jegeg, jani buin icen panugrahan apanga kajegegan i dewane
nikel ping dasa luihne teken kajegegan kurenan I Arjuna".

Ngraris widiadarine pitung diri punika memargi nuju gunung Indrakila ring genah sang
Arjuna nangun tapa. Rauh irika para widiadarine sami ngoda sang Arjuna, wenten sane niman,
wenten sane ngmel tangan sang Arjuna, wenten sane ngelut, nanging sami ten prasida ngoda tapa
sang Arjuna. Sami widiadarine kaciwa, tur mawali ring Kayangan ngaturnguningayang ring
Bhatra Indra parindikan punika. Gargita manah Bhatra Indra mahawinan mabukti pisan
kapradnyanan sang Arjuna.

Kacrita mangkin Niwatakawaca sayan dot manahnya nguugang suargane. Para punggawa
miwah para tanda mantrinya sami sakti tur misadia ngetohang urip, melanin Niwatakawaca.
Akeh sampun genah-genahe ring suargan karusak olih Niwatakawaca. Sawireh asapunika raris
Ida Sang Hyang Indra makarya naya singid marupa sabaya dagingnya Niwatakawaca pacang
kaicen upah. Pamuputnya naya punika mapikenoh becik santukan Niwatakawaca usan ngrusak
suargane. Nanging Niwatakawaca sampun uning dikapan para dewatane kayun lakar
makekasihan melah-melah sareng watek raksasane. Punika awinan Niwatakawaca tangar, tumuli
ngutus teteliknyane nylusup rauh ka jagat tigane. Sapangrauh tetelike ipun ngaturang gatra indik
Sang Arjuna matapa ring Gunung Indrakila. Samalihnya sampun polih panugrahan punika
mawinan Sang Arjuna kaanggen kanti antuk Ida Sang Hyang Indra. Punika awinan
Niwatakawaca ngutus raksasa momo Si Murka sane sampun kalumrah daat sakti praya ngrusak
yasan Sang Arjunane.

Tan ucapan Si Murka ring margi kacrita sampun raauh ring Gunung Indrakila. Mailehan
ipun ngrerehin genah Sang Arjuna nangun yasa nanging nenten kapanggih. Mawastu ipun
brangti sahasa pacang ngusak Gunung Indrakilane mangdane obah yasan Ida Sang Arjuna.
Mawastu Si Murka masalin rupa dados celeng daat kabinawa aeng tan bina sakadi Kumbakarna.
Gunung Indrakilane kalumbih, tanahe masepuk batu-batunyane sambeh maleketik, punyan-
punyan kayune akeh bah balbal paslengkat. Goane genjong magejeran dindingnyane belah siag.
Dening asapunika digelis Sang Arjuna nglesuang yoga, uning ring karauhan durmanggala. Medal
Sang Arjuna malincakan sinambi makta panah sregep saha gandewa sampun mapentangang.
Kacingak celenge nglumbih, batu pilahdekdek remuk asing poroda, sinamian sambeh plaketik.
Daat gegaok Sang Arjuna nyingakin tingkah celenge krura pisan nglumbihin gunung. Gelis
madabdab raris nyaluk kawaca tur gelang. Sasampune puput mabusana raris Ida sayaga nyantos
sapangrauh i celeng.

Kacrita mangkin Ida Sang Hyang Siwa taler rauh magredegan mrika. Pamargan Ida
jangkep kairing antuk para dewa resine. Saking Siwa Loka Ida Sang Hyang Siwa uning tur
ngaksi kawentenan Sang Arjunane sampun puput yasan Idane. Ne mangkin panamayan Ida Sang
Hyang Siwa nureksain majalaran antuk rebat, anggen Ida ngaruanang kadiran Sang Arjunane.
Punika awanan pajalan Si Murkane kasarengin Ida Sang Hyang Siwa. Ida nyaru-nyaru sakadi
tingkah juru boros, mangda polih dalihan marebat ring Sang Arjuna.

Critayang mangkin celenge sedeng nyantepa nglumbih tumuli kaintip olih Sang Arjuna.
Sang Hyang Siwa taler sareng ngintip celenge, tur kadangsekin tumuli raris kapanah antuk panah
mamutama mawastu keni lambungipune. Sadaweg punika Sang Hyang Siwa nyarengin
nimbakang panah taler ngeninin lambung celenge. Tatun celenge wantah asiki samalihnya
panahe kapastu antuk Ida Sang Hyang Siwa mangda dados asiki.

Ring sampune padem Si Murka encol Sang Arjuna nangsekin misadia pacang ngabut
panahe sawireh Ida nenten madue kayun sangsaya. Kacingak Sang Arjuna encol pacang ngabut
panahe, kala punika Ida Sang Hyang Siwa ngandika brangas, "Ih, enyen iba langgana pesan teka
iju-iju nyemak panah tan patolihan. Nirdon cai maketu muah maganitri nongos di gunung alas
nanging laksanan caine mamati-mati. Panganggon caine dogen pandita, nanging keneh caine
corah."

Kosek kayun Sang Arjunane mireng raos kadi punika mawastu kebus buka panggang,
sawireh dukane kaliwat tur gelis nyaurin, "Nyen iba kaliwat ngawag mamunyi. Adeng-adeng cai
ngraos eda kadlumuk. Mirib cai tusing nawang kai. Cai apang tangar kai tuah ane madan Sang
Arjuna. Bas kaliwat iba mesuang munyi nyakitin kuping. jani kai ngorahin, yen iba tusing ngidih
kapelihan, tur ngusap ebuk di batis kaine tuara buungan iba matiang kai." Sapunika pangandikan
Sang Arjunane.

Ida Sang Hyang Siwa gelis ngelepas panah kairing olih para dewane. Mabriuk sami
ngembulin Sang Arjuna nanging Sang Arjuna nenten ajrih. Sang Arjuna daat tangar gelis nglepas
panah marupa gulem maduluran ujan angin saha kilap tatit suarannya magrudugan. Malih Sang
Hyang Siwa ngambil panah Nagapasa krura galak. Kapagpag olih Sang Arjuna antuk panah
Geruda.

Tan Kacritayang rames payudane, pamuputne senjatane pada telas dekdek lidek. yudane
sane mangkin tanpa senjata, pada mamogol punika mawinan pada ejuk saling maruket saling
pantigang. Santukan bes suene, pamuputnya kasoran Sang Arjuna tur keni kanjambak. Sang
Arjuna polih ngwalesang sayaga ngintip saha kasaup cokor Sang Hyang Siwane, praya pacang
kapantigang nanging Sang Hyang Siwa sane malingse dados juru boros saget ical tan palarpan.
Asampun sang Hyang Siwa malecat gelis turun sabeh sekar kadulurin weda pangastungkara
jaya-jaya miwah suara genta paklening ring ambarane. Kacingak Sang Hyang Siwa maraga
Ardanaresuari malingga ring sekar tunjunge. Swatejan Ida dumilah galang. Irika raris Sang
Arjuna ngaturang sembah.

"Inggih Ratu Bathara ampura pangubhaktin titiang i nista. Sakal niskala pangubhaktin
titiang ring jeng Bhatara nenten tios. Palungguh Bhatara, meraga api medal saking kayu, maraga
minyak medal saking santen. Palungguh Bhatara pacang malingga ring sang maraga luih sane
setata ngulik tutur kadiatmika. Palungguh Bhatara ngebekin jagat. Palungguh Bhatara maraga
unteng tatuane mautama. Palungguh Bhatara malingga ring sahananing sane wenten. Palungguh
Bhatara ngebekin Bhuwana Agung miwah Bhuwana Alit. Palungguh Bhatara maraga Utpeti,
Maraga Stiti. Palungguh Bhatara maraga Pamralinasahnaning sane wenten. Palungguh Bhatara
pinaka jiwan jagate, pinaka jiwan sahananing sane katon miwah sane nenten katon. Sakadi lawat
bulane sane wenten ring pasone madaging toya. Yan toyane ening bersih, janten cedang lawat
bulane punika. Sapunika taler Palungguh Bhatara, wantah ring Sang Wicaksana saha langgeng
mayoga semadi kewanten sane prasida nyingak Palungguh Bhatara saha sueca jeneklanggeng
mapawayangan ring Ida. Palungguh Bhatara paragayan Ida Sang Hyang Widhi. Palungguh
Bhatara maraga suci nirmala nenten sida antuk nglawatang. Nanging Palungguh Bhatara pacang
prasida kapanggihin, prasida karasayang antuk Ida sang maraga Maha Yogi, saantukan
kawiaktiannya wantah punika tetujon Ida sane pinih mautama."

Durung puput Sang Arjuna ngaturang sembah gelis kacawis antuk Ida Sang Hyang Siwa,
"Uduh Dewa Sang Arjuna, suba tatas Bapa tetujon I Dewane. Jani Bapa nganugrahin I Dewa
panah madan Pasupati. Nah lautang terima Dewa". Sapunika pangandikan Ida Sang Hyang Siwa.

Mawastu medal geni murub saking tangan Ida Sang Hyang Siwa tur marupa raksasa
makta panah ngendih. Kaenjuhang panahe punika di gelis katerima antuk Sang Arjuna. Ri
sampun panah katerima mawastu api murube punika masikian ring panahe.

Sampun puput Sang Arjuna nunas panugrahan tumuli ngaturang bhakti. Lianan ring
panah taler kaicen pamentangannya miwah kaicen gelungan. Mangda jangkep paicane, Sang
Arjuna taler kaicen pawisik tata cara indik mayuda antuk Ida Sang Hyang Siwa.

Kaketus Saking : Itihasa Arjunawiwaha