Suksema aturang titiang majeng ring pangenter acara antuk galah sane sampun katiba ring

pasikian titiang.

Sadurung titiang matur amatra, pinih riin ngiring sareng-sareng ngastiti bhakti ring
Ida Sang Hyang Widhi Wasa, dumogi sangkaning pasuecan lan asung kertha wara nugraha
Ida, titiyang Ni Komang Dwi Prahmawati, saking ATRO BALI, prasida ngiring ida dane
sareng sami ngamangguhang karahayuan, malarapan antuk ngaturang puja pangastungkara.

“Om Swastyastu”

Inggih ida dane sinareng sami, pamekasnyane majeng ring angga panureksa sane
dahat kusumayang titiang, bapak/ibu panitia lan para atiti sane dahat wangiang titiang, punika
taler para pamilet utsawa pidarta basa Bali sinamian sane banget tresna asihin titiang. Ring
galah sane becik puniki, lugrayang titiang matur pidarta sane mamurda ”Kreatifitas lan
inovasi ring masa Pandemi Covid-19”.

Inggih ida dane sinareng sami, yening maosang indik pandemi covid-19, pastika
nenten doh teken ius utawi dampak sane wenten awanan olih virus puniki. Ius sane kabakta
olih pandemi puniki akehan jelenyane ring sektor kesehatan, santukan virus puniki
ngwedarnyane gelis pisan tur nenten nyingak kasta utawi golongan, makasami pastika keni
iusannyane. Nenten ja ring sektor kesehatan manten, nanging sektor-sektor lianan minakadi
ekonomi, pariwisata, pendidikan, lan sane tiosan taler keni iusnyane. Pawatesan makrama
santukan pandemi covid-19 puniki sampun ngranayang mental para jadmane jele pisan, nika
mawinan iraga nenten dados meneng lan nyerahang raga kemantenan tekening parindikan
puniki. Kreatifitas lan inovasi patut gelahang iraga ring masa pandemi puniki.

Sinalih tunggil tata cara sane kawigunayang mangda sida kukuh ring masa pandemi
covid-19 inggih punika tetap kreatif lan inovatif. Kreatif puniki prasida nyingakin lan
ngawigunayang sarana sane wenten ring palemahan iragane mangda prasida mawiguna ring
kahuripan. Akeh imba-imba kreatifitas sane sida kapolihan ring media sosial, iraga manados
jadma sane madue idep lan manah sapatutnyane sida nyingakin selah puniki. Ri sampune
nyingakin selah sane patut tatkala makreatifitas, salanturnyane iraga patut madue inovasi
mangda napi sane kakaryanin punika nginutin aab jamane sekadi mangkin. Inovasi puniki
taler mawiguna ri kala para jadmane sampun waneh tekening model sane sampun
kawentenan, nika awinan iraga patut madue inovasi mangda wenten model sarana sane anyar
tur nganutin aab jamane sane nglimbak puniki.

Saluir tekening kreatif lan inovatif punika, ring masa pandemi puniki iraga taler sida
mlajahin geginan anyar sane nenten iraga bisain tur nenten sida kalaksanayang ri kala
masekolah tur makarya santukan kabanda antuk galah sane nenten cukup.Contohnyane
ngwangun Usaha Mikro Kecil lan Menengah sane kasingkat antuk UMKM,nganggen
teknologi makadi maadolan ring sosial media utawi online.

Inggih ida dane sareng sami, wantah sekadi asapunika titiang prasida matur-atur ring
galahe sane becik puniki, dumogi wenten pikonoh ipun. Ring wesananing atur, banget titiang
nglungsur geng rena pengampura pet wenten atur titiang sane nenten munggah ring arsa.
Matur suksma antuk ring uratian ida-dane sinamian. Pinaka panguntat, puputang titiang antuk
parama santih.

”Om Santih, Santih, Santih, Om”