HURIA KRISTEN BATAK PROTESTAN

HKBP PENDIDIKAN-MEDAN
Jln. A.R. Hakim Gg. Pendidikan No. 90 Medan Telp. (061) 7344710
Pdt. Ressort. HP.085272785993, Pdt.Fungsional,081375611786, Biblevrouw, 081263622339

TATA IBADAH MINGGU PASKAH I

(PARNINGOTAN HAHEHEON NI TUHAN JESUS)

Minggu, 17 APRIL 2022

Thema : “NUNGA HEHE JESUS I”
Persiapan :
1. Siapkan ruang ibadah, tata ibadah, Buku Ende / Kidung Jemaat, Alkitab / Bible.
2. Ibadah dipimpin oleh kepala keluarga (atau jika ada salah seorang parhalado).Salah seorang dari anggota
keluarga akan memimpin doa syafaat.
3. Kantong persembahan disiapkan.
4. Sebaiknya sebelum ibadah dimulai, agar tata ibadah dibaca dahulu dan lagu dipelajari bersama-sama, jika
ada yang tidak dapat dinyanyikan tentu dapat diganti.
5. Selamat beribadah bersama Keluarga. Tuhan Yesus Memberkati.

01. Marende BE. . 93: 1+3 “Pesta Paska Hatuaon” BL 94

02. Votum-Introitus-Tangiang :
U : Namarpungu do hita si sada Ama di harajaon ni Debata laho mamelehon tu
Ibana pujipujian dohot hamauliateon ni roha. Manjalo huhut manangihon
hataNa na badia i. Laho mangido asi ni rohaNa alani dosanta, asa marhite
AnakNa Tuhan Jesus Kristus i hita gabe boi mamelehon dirinta tu
panghobasionNa.
R : Amen
U : Nunga hehe Tuhan i, nunga tutu hehe Ibana. Ari on do na jinadihon ni
Jahowa, marolopolop jala marlas ni roha ma hita disi. Batu naung
binolongkon ni angka pande bagas, i ma gabe batu parsuhi. Pinamasa ni
Jahowa do i, halongangan do i anggo di matanta. Haleluya............!
R : (Mangendehon) : Haleluya.... haleluya... haleluya.....
U : Martangiang ma hita Ale Tuhan Jesus, Tuhannami! Na mandok mauliate do
hami tu Ho, ala ditaluhon Ho do dosa dohot hamatean marhitehite hamamateM i,
ala disondangi Ho tanomannami, asa marpangkirimon na mangolu hami ala ni
haheheonMi. Ndang pola mabiar hami mida hamatean, ai Ho do ulunami, ruasMu
do hami. Dipaunsat Ho do hami sian haholomon tu hatiuron, sian hamatean tu
hangoluan. Antong pargogoi ma hami mamuji dohot mangoloi Ho ariari,
pasangaphon Ho dibagasan haporseaon na mangolu, paima sahat hami tu
lambungMu. Amen
03. Marende BE. 96: 1+3 “Nunga Talu Hamatean” BL 101
04. Patik :
U: Tatangihon ma patik ni Debata, i ma sian 1 Korint 6: 20, “Ai arga do
hamu ditobus, dibahen i pasangap hamu ma Debata marhitehite
dagingmuna dohot marhitehite tondimuna; ai Debata do nampuna i.”
I ma sahatna.
Antong rap mangido gogo ma hita sian Tuhan Debata laho mangulahon na
hombar tu patikNa i.
U+H : Ale Tuhan Debata! Sai pargogoi ma hami mangulahon na hombar
tu patikMi. Amen.

05.Marende BE. 242: 2+5 “Rahis Jala Maol” BL 76

6. Manopoti Dosa :
U : Tatopoti ma dosanta. Martangiang ma hita! Ale Tuhan Debata,
Amanami, Parasiroha na sumurung! Na pungu do hami di joloM
martangiang tu Ho; ndada mangasahon hatigorannami, na
mangasahon asi ni rohaM na godang i do. Sai asi ma rohaM mida
sandok bangsonami, sesa ma dosanami saluhutna. Sai sungguli ma
rohanami, asa muba roha dohot pangalahonami, ala ni Tuhan Jesus
Kristus Tuhannami, Sipangoluhami. Amen.
Bagabaga ni Debata taringot tu hasesaan ni dosa:
Parasiroha jala pardengganbasa do Jahowa, lambat tarrimas jala
Parasiroha godang. Ndang dibahen tu hita hombar tu angka dosanta,
jala ndang dibaloshon tu hita hombar tu angka hajahatonta. Songon asi
ni roha ni amaama mida angka anakna, asi ni roha ni Jahowa di angka
na manghabiari Ibana.
Hasangapon ma di Debata na di ginjang!
H : Amen.

7.Marende BE. 94 : 1+3 “Ale Tondingku Naung Hehe” BL 44

8.Epistel :
U: Hata ni Debata Epistel di minggunta sadari on tarsurat di Psalmen 103
: 1 - 5. tajaha ma marsingkat soring: ..................... I do sahatna:
Martua do angka na tumangihon hata ni Debata jala na umpeopsa.
R: Amen.
09. Marende BE. 635: 1+3 “Ro ma Tuhan Jesus” BL 635

10.Manghatindanghon Haporseaon
U : Tahatindanghon ma hata haporseaonta i songon na hinatindanghon ni
donganta sahaporseaon di sandok portibi on. Rap ma hita mandok :
R : Ahu Porsea... Amen

11. VG KELUARGA :

12 . Tangiang Pangondianon / Doa Syafaat (salah seorang anggota keluarga)

Pokok Doa Syafaat :
a. Kiranya Kasih setia Tuhan memelihara semua umatNya senantiasa.
b. Kiranya Tuhan memberikan hikmat kepada pemimpin negara kita untuk memberikan kebijakan
yang baik serta ketaatan bagi masyarakat melakukan kebijakan pemerintah.
c. Bagi gerejaNya HKBP Pendidikan, biarlah kasih karunia Tuhan memberkati segala yang baik yang
dilakukan ditengah-tengah gerejaNya. Memberkati setiap persekutuan yang dibangun di setiap
keluarga, sehingga setiap umatNya dapat bertumbuh dalam iman, pengharapan dan kasih di
dalam Tuhan.

13.Marende BE. 633:1 - 2 “Nunga Hehe Kristus i” BL 633

14. Jamita : Lukas 24: 1-12
(dimulai pemimpin ibadah dengan berdoa dan membaca nas. Nas dapat dibaca sendiri atau bergantian)
“Nunga Hehe Jesus I”
(Ginurithon ni Pdt. Dr. Robinson Butarbutar, Ephorus HKBP)

Hamu angka dongan sahaporseaon, Selamat Paskah ma di hita saluhutna.

Di bona ni Hakristenon, dung dipahehe Debata anakNa Jesus Kristus sian hamatean i,
sada isi ni barita nauli na pinatolhas ni angka siseanNa i, dohot nang sisean ni Apostel
Paulus, i ma taringot tu hinatutu ni haheheon ni Jesus Kristus sian hamatean. Di Apostel
Paulus, ndang holan barita taringot tu hinasintong ni haheheonNa i na binaritahonNa, alai
dohot do panghorhonna di angka na porsea di haheheonNa i, i ma naparjolo sian angka na
naeng paheheon ni Debata di ari sogot do ia haheheon ni Jesus i. Siala ni i do nang Dokter
Lukas naung dohot mandongani Apostel Paulus mamaritahon barita nauli tu angka kota di
Kekaisaran Romawi di taon 33 sahat tu hamamatena di Rom muse, ndang tarbahensa so
manurathon taringot tu hamamasa haheheon ni Jesus songon na tarida di evangelium
ginurithonna, i ma Evangelium Lukas bindu 24 ayat 1-12 i.
Di na ginurithonna i, pas songon hita jolma di sandok portibion sian abad parjolo sahat tu
nuaeng, nang di angka siseanNa isara ni si Petrus na sai solhot tu Ibana uju rap dohot
Jesus dope ibana di Galilea sahat tu Judea nang di angka huta na asing di duru ni
Palestina, songon i nang di angka siihuthon Ibana tarlumobi angka parompuan naung
hinobasan dohot pinamalumNa sian angka tondi na hodar na mangihuthon Ibana sian
Galilea sahat tu Jerusalem, jala sahat tu na di hau pinarsilang i Ibana (ida Lukas 23: 55-
56) hira nipi do hamamasa ni haheheon ni Jesus i. Ala hira so boi do masa adong
haheheon ni na mate, asing ma molo na dijama panurirang ni Debata songon na pinatupa
ni panurirang di partingkian padan na robi nang songon na pinatupa ni Rabbi Jesus tu si
Lazarus na tong diboto angka siseanNa i.
Alai di angka na ditanom molo so adong na pahehehonsa, ndang tarbahen hehe. Ala ni i
do, nang pe nunga dilumbahon Jesus uju di ngoluNa rap dohot angka siseanNa i na
„ingkon pasahaton Anak ni Jolma i (jaha: Jesus) tu tangan ni halak pardosa jadi
parsilangkononna, jala mulak mangolu ma Ibana di ari patoluhon” (Lukas 23: 7, 22: 22-
23, ida tong Markus 8:31, 9:31), jut rohanasida, mabiar, jala ndang dihaporseai nasida
naung hehe Jesus sian hamateanNa, hira turiturian do i di nasida, jala longang nasida di
na ndang jumpang ni si Maria Magdalena, si Johanna dohot si Maria nang na asing na
mandongani nasida ia Jesus naung dipeakhon pamatangNa di bagasan tanoman na
hinaliangan ni batu (Lukas 23: 53, 24: 3, 5, 11, 12). Dung pe dipatorang dua halak parabit
na marlinanglinang naung dipahehe Ibana (24: 6), jala dipaingot nasida tu hata ni Jesus
naung pinatolhasNa uju di ngoluNa na mulak mangolu do Jesus di ari patoluhon (24: 6-7)
asa diingot nasida hata ni Jesus i, jala dibaritahon nasida na naung dipahehe Ibana sian
tanomanNa tu angka sisampulu dua siseanNa i dohot tu saluhut dongan ni Jesus nang tu
angka apostel (24: 9-10). Jala, dung sahat barita i tu angka siseanNa i, ndang porsea dope
angka siseanNa i. Dung pe si Petrus sandiri borhat tu tanoman i jala ndang diida Jesus disi
nda holan saputsaput ni Jesus peak di tanoman i. (Ise na pahehehonsa, ndang apala
digurithon si Lukas, alai mangihuthon Apostel Paulus Debata do na pahehe Ibana. Di si
Lukas beha panghilalaan ni angka parompuan siihuthon Jesus, angka donganna, angka
apostel i marnida jala umbege haheheon ni Jesus sian hata ni dua halak na marabit na
bontar i, dohot dung diida si Petrus sandiri tu tanoman i, i ma „jut roha, mabiar, hira
turiturian jala longang‟ do na mansai ringkot, laho patuduhon hinasintong ni haheheon ni
Jesus i sandiri.

Sahat tu saonnari, torus do angka pande bisuk manulingkiti hinasintong ni haheheon ni

Jesus i, ala ndang diida nasida songon dia Ibana uju tongon dipahehe. Bahat do na so
porsea. Alai bahat do tong na longang songon angka siseanNa sisampulu dua i, boi hehe
naung ditanom di tanoman na marbatu, naung digulang batu ni tanoman i. Longang ala
hehe Jesus sian hamateanNa.

Alai di hita angka na manghaporseai Ibana di angka partingkian na marragam, nang pe

longang do hita di haheheonNa i, ia haheheon ni Jesus mansai ringkot do di haporseaon di
Jesus di Hakristenon. Ia Jesus ndang ditaluhon hamatean i. Ndang mian di hamatean i
Ibana. Dipahehe Debata do. Dipamonang Debata do. Laos i do apala ojahan na togu di
haporseaon ni halak Kristen. Ndang Anak ni Debata, Sipalua na mate dung i laos mian di
hamatean ia Jesus Anak ni Debata i. Ndang dipasiding Ibana hamatean i, alai ditaluhon
Ibana do hamatean i. Ndang hamatean i ia ujung ni Jesus, alai haheheon i do. Ndang
hamatean ujung ni angka siihuthon Ibana, alai haheheon i do.
I do umbahen gabe topik jamitanta: “Nunga Hehe Jesus i.” Beha do panghorhon ni barita
nauli na ginurithon ni si Lukas on di hita angka siihuthon Ibana, angka sisean ni Jesus di
pestanta sadarion, pesta parningotan di ari haheheon ni Jesus i sadarion jala dia
panghorhonna di hita di ngolunta di portibion, di na taadopi angka parungkilon pola
hamatean ni sisolhotta nang hamateanta sandiri di tingkina?
Ringkot do hita porsea di barita nauli na mandok naung hehe Jesus i. Boasa ringkot on?
Siala bahat do angka na tardok pistar sahat tu tingki on na mandok ndang hea Jesus hehe.
Holan turiturian na so marojahan do barita taringot tusi, na dipatupatupa angka siseanna,
songon na sai dipatupa sahalak na ulaonna mangajari taringot tu Padan Naimbaru, alai
dang porsea ibana na hea hehe Jesus sian tanomanNa. Baliksa ma, atik pe so taida
tanoman na so disi be Jesus, ingkon porsea do hita ala nunga jolo dilumbahon Jesus
hahehonNa di ari patoluhon. Jala lobi sian i, songon angka parompuan na tolu i (Maria
Magdalena, Johanna dohot Maria ni si Jakobus nang angka na asing na mandongani
nasida) asa lobi sian na dipangke halak Rom laho manghatindangkon hasintongan di
pengadilan, ingkon baritahononta do haheheon ni Jesus i jala songon dia panghorhonna di
Hakristenon, di ngolunta marsadasada.
Ringkot do tapabagas panghorhon ni haheheon ni Jesus dohot barita taringot tu
haheheonNa, i ma na mangihut on:
Parjolo, ndang jongjong Hakristenon ia so sintong hehe Jesus sian hamatean tu
hangoluan na manongtong. Ala na hehe do Jesus sian hamatean umbahen tapapos rohanta
marTuhanhon Ibana.
Paduahon, di partingkian na gok angka na masa na mambahen jolma on masipamatean,
isara na pinatupa ni Presiden Vladimir Putin, na mamorangi dohot mamunu bahat jolma
marhite jala di bagasan porang i, mansai ringkot hita ndang agoan panghirimonta siala ni
hamatean i, i ma hamatean na so marojahan na pinatupa ni Presiden Putin maradophon
halak Ukraina dohot hamateanta songon jolma na ingkon ro manang sadihari. Ingkon
taingot haheheon ni Jesus sian hamatean i na mangalehon panghirimon na mangolu tu
hita. Marhite panghiriman na mangolu di haheheonta di ari Haheheon i na marojahan tu
haheheon ni Jesus i sandiri, tarbahen hita mangadopi angka gulmit nang parungkilon ni
ngolu na ro tu tongatonga ni ngolunta.
Patoluhon, mamujimuji Debata ala dipahehe Ibana AnakNa Jesus Kristus. Ndang
dipasombu Ibana Jesus dibondut hamatean i, alai dipahehe Ibana do AnakNa i. Ala ni i
tapestahon ma haheheon ni Jesus i”. “Nunga talu hamatean dibahen Tuhan Jesus i. Ai na
hehe do Ibana songon na nidokNa i. Haleluya, Haleluya nunga hehe Jesus i” (BE 96 ayat
1); “Marlas roha be ma hita ala hehe Jesus i. Ai malua sude hita sian hamagoan i.
Haleluya Haleluya nunga hehe Jesus (ayat 2); “Sai tapuji ma Tuhanta na marholong roha
i. Tapasangap ma Ibana na marasi roha i.”

Asa, atik pe tung bahat situtu do na ingkon adopanta angka tantangan ni ngolu di
partingkianta sinuaeng, bahat hita na manaon siala ni hajahaton ni donganta jolma na
lomo roha di ulaon pamate donganna jolma isara marhite porang dohot marhite angka
ulaon na pamatehon hita, marningot ari haheheon ni Jesus i boi patogu rohana ala ndang
 hamatean i ujungta, alai haheheonta do binahen ni Jesus Kristus naung pinahehe ni
Debata i sian hamateanNa. Amen.

15. Marende BE. 627: 1--- “Jesus Naung Hehe” BL 627

Pasahat Pelean
16. Pangujungi / Tangiang Pelean :
U: Tatangianghon ma peleanta: Ale Debata, Amanami na di banua ginjang,
Ho do haroroan ni saluhut silehonlehon na denggan dohot nasa ulibasa na
mauliutus. Hupasahat hami ma sian na nilehonMi tu hami, peleannami tu
Ho. Sai jalo ma i gabe uap na hushus di joloM. Pasupasu ma i jala ramoti
asa huparhaseang hami pelean on, patimbulhon harajaonMu di tongatonga
ni huriaM dohot di portibi on. Buhai ma rohanami marhitehite TondiM, asa
lam hutanda hami godang ni silehonlehonMi tu hami, asa lam girgir hami
mandok mauliate tu Ho, marhitehite Jesus Kristus Tuhannami. Amen
R : (Mangendehon) BE 204:2 “NDANG TADINGKONONHU HO”
Nasa na nilehonMi, tondi ro di pamatanghu/Hosa dohot gogongki, ro di
saluhut artanghu/Hupasahat i tu Ho, na so unsatonhu do.
U : Martangiang ma hita:
S : Ale Amanami na di banua ginjang! Sai pinarbadia ma GoarMu! Sai ro ma
harajaonMu! Sai saut ma lomo ni rohaM di banua tonga on songon na di
banua ginjang! Lehon ma tu hami sadari on hangoluan siapari! Sesa ma
dosanami songon panesanami di dosa ni dongan na mardosa tu hami! Unang
hami togihon tu pangunjunan! Palua ma hami sian pangago!
R :(Mangendehon): Ai Ho do nampuna harajaon, dohot hagogoon. Ro di
hasangapon, saleleng ni lelengna, Amen
17. Mangendehon BE. 36 : 1... Amen... amen... amen...

PARHALADO HKBP PENDIDIKAN RESORT PENDIDIKAN

MENGUCAPKAN :

SELAMAT HARI PASKAH! &

SELAMAT BERIBADAH BERSAMA KELUARGA

TUHAN YESUS MEMBERKATI KITA SEMUA!