Renungan Tunas Pekabaran Injil Senin, 27 Februari 2023

Pembacaan Alkitab : Matius 17 : 14 – 21

(Yesus user setang dari ana satu yang saki mati-mati ayang)

14. Waktu Yesus deng Antua pung murid tiga tu bale par orang banya tu, ada satu orang
datang tikang lutu di muka Antua.

15. La dia bilang kata, “Sio Tuang Guru e, tolong kasi unju Tuang Guru pung hati bae par
beta pung ana laki-laki jua. Dia saki mati-mati ayang deng dia paleng sangsara. Dia jaga jatu
dalang api ka dalang aer.

16. Beta su bawa dia par Tuang Guru pung murid-murid, mar dong seng bisa kasi bae dia.”

17. La Antua bilang par orang banya tu kata, “Hoe kamong manusia jamang sakarang yang
tar parcaya Allah deng yang ilang jalang e! Sampe apa tempo Beta musti tinggal deng
kamong? Sampe apa tempo Beta musti sabar deng kamong?” Abis itu, Yesus bilang par ana
tu pung bapa kata, “Bawa ana tu kamari!”

18 Tarus, Antua hokmat setang yang ada dalang ana tu, la setang tu kaluar dari dia, la oras itu
jua ana tu bae.

19. Abis itu, Antua pung murid-murid pi par Antua waktu Antua ada sandiri la tanya kata,
“Tuang Guru e, mangapa kong katong seng bisa user setang tu?”

20. La Antua bilang par dong kata, “Kamong seng bisa user setang tu tagal kamong seng
parcaya Allah sunggu-sunggu! Dengar bae-bae tagal apa yang Beta bilang ni batul! Kalo
kamong ada pung parcaya par Allah, biar kata kacil sa macang deng biji yang paleng kacil,
kamong bisa bilang par gunung ni, ‘He gunung! Pinda dari sini ka sana!’ La akang nanti
pinda. Seng ada yang kamong seng bisa biking kalo kamong parcaya.*

21. [Setang macang itu bisa dapa user cuma kalo kamong sombayang deng puasa do.]”

Dari cerita ini akang ada pung 2 pasang penting:

1. orang tatua pasti akan selalu sayang katong yang pastinya dong seng mau lia katong saki.
Kalo katong saki, katong musti berdoa deng bekerja. Berdoa minta Tuhan yang kasi bae
katong pung panyaki. Jang pi par orang laeng atau ka tampa laeng. Lari saja par Tuhan
Yesus. Itu tadi katong su berdoa. Skarang katong jua musti karja lai. Lakukan apa yang orang
tua bilang. Orang tua bilang akang slalu par katong pung bae, par katong pung kesembuhan.
Misalnya makang kanyang la minom obat, musti minom aer putih banya, jang barmaeng di
panas, rajin tidor siang, jang bagadang, jang talalu barmaeng HP karna akang pung cahaya
berbahaya par katong pung kesehatan mata lai.

2. Selain itu, katong musti parcaya. Pas katong su berdoa, katong su karja, katong jua musti
parcaya bahwa katong pasti bae dari panyaki yang katong derita. Katong bae lewat mama
deng papa, lewat usaha katong tagal katong su dengar-dengaran apa yang dong bilang deng
suruh. Jadi katong musti parcaya akan penyembuhan yang nantinya Tuhan Yesus kasi.