IBADAH KELUARGA GBKP

Sabtu, 06 April 2024

1. Rende: KEE No. 182:1-2 “O, Tuhan Kam Tetap” (Ibabai Anak)
1. O Tuhan Kam tetap tedehku man baNdu
Arapku lalap Kam nemani geluhku
Reff. O Tuhan rasa lalap, geluhku temani
Ola tadingken aku, ras Kam tetap
2. O Tuhan Kam tetap, ajarilah aku
Lah kai pe si kuban, mehuli man baNdu (Reff...)
2. Ertoto (Ibabai Bapa)
3. Renungen (Ibabai Nande)
Teks : Josua 14:1-5
Tema : Pembagin Daerah Ingan Tading (III)
Lit kata-kata bijak ngatakenca “janji adalah hutang” si ertina bagi
utang si arus igalari, erjanji pe arus min i tepati. Adi lit sekalak jelma
mbue erjanji, e maka mbue me utangna apai ka adi lalap langa
itepatina janjina. Megati kal kita manusia erjanji tapi kedungenna lupa,
mari cuba si inget-inget entah lit denga janjinta si lenga si tepati.
I bas ogenta enda, tangkas si eteh maka Tuhan la pernah lupa
nandangi janjiNa man bangsa Israel. Kenca bangsa e ibaba Musa
ndarat i Mesir nari, Tuhan enggo erpadan man bangsa Israel guna
mereken Taneh guna iianina, labo bekasna nukur tapi pelin-pelin
pemere Tuhan. Janah tupung bas perdalanen pe enggom ipadanken
Tuhan arah Musa maka taneh si ipadanken e ibagi-bagiken man kerina
suku-suku sue ras beliganna tep-tep suku alu cara tikam tanduk (Bil.
26:52-53) jenari suku Lewi kerina iserapken sabap man bana la
ibereken erta-erta Israel. Si eteh pe maka suku Lewi, ipilih Dibata guna
erdahin i bas ingan Si Badia, e me Rumah Pertoton, e maka man bana
ibereken kuta man inganna tading ngenca bagepe mbal-mbal ingan
lembu ras biri-birina, tentu alu tujun gelahna suku e fokus ngurusi
keperlun ersembah man Tuhan. E maka kenca Josua nggantiken Musa
guna mimpin bangsa e bengket ku Taneh Kanaan, taneh si ipadanken
Dibata ije me igenepi janji Tuhan man Musa ndube. Seh maka, daerah
si siwah setengah suku ngiani arah Barat Lau Jordan alu erbahan tikam
tanduk, jenari taneh si arah Timur Lau Jordan man dua setengah suku
sideban. Bageme bangsa e ngaloken penggenapen janji Dibata, labo
erkiteken gegehna kerina banci seh ku taneh si ipadanken Dibata. Arah
ogenta enda teridah maka kegeluhen bangsa Israel icukupi Dibata kal,
kai si enggo irancang Dibata guna kiniulin bangsa e, igenepiNa i bas
waktu si enggo itentukenNa. Kai dage pesan Kata Dibata arah ogenta
enda?
Kegeluhenta enda desken perdalanen nuju taneh si ipadanken
Dibata kap. Seh kenca waktu si enggo itentuken Tuhan, ije me sialoken
janji keselamaten si enggo irancang Tuhan bas geluhta bagi si ialoken
bangsa Israel. Tuhan Dibata e me Tuhan si konsisten bas encikep
padanNa, la IA lupa janah isehkenNa me padanNa sue ras waktu si
 enggo irancangNa. E maka kai pe si genduari enda jadi pergumulenta,
ingetlah maka Tuhan Dibatanta tepat janji rasa lalap jenari pasu-
pasuNa pe la erngadi-ngadi man kalak si ikelengiNa. Uga kin carana
gelah kita ikelengi Dibata? Desken anak si beluh muat ukur orangtuana,
alu erbahan si mehuli ras ngikutken pedah orangtua, Tuhan pe bage ka
nge. Mari selaku anak-anak Tuhan silakoken pedahNa, ikutken KataNa
jenari tetaplah setia nimai janjiNa. Tek kita, kerina perbeben geluhta
enggom lit jababenna bas Tuhan janah enggom irancangNa kegeluhen
si terulin man banta guna isehkenNa i bas waktuNa. Tetaplah
erkiniteken man Tuhan! Keleng ateNa tetap nemani kita. Amin
4. Rende: KEE No. 307:1-2 “O Tuhanku Kam Kap Permakanku”
(Ibabai Anak)
1. O, Tuhanku Kam me Permakanku
Emaka la kekurangen aku
Ku mbal-mbal m’ratah aku babaNdu,
Ipesenang-senangNdu geluhku
Reff. Permakanku si njayam geluhku,
Malem ateku senang tuhu
KelengNdu tetap maler man bangku,
Kam me Tuhanku, Permakanku.
2. IteguNdu kempak lau si maler, ibahanNdu ateku nggo malem
E maka tedeh ate tendingku
 Kempak keg’luhen si sikapkenNdu (Reff.)
5. Pertoton Sapaat & Pertoton Tuhan (Ibabai Nande)