KEAN SANTANG

Kean Santang teh putra Prabu Siliwangi anu katelah gagah tur sakti. Di Pajajaran,
malah di Pulo Jawa teu aya hiji oge jalma anu bisa nandingan kasaktenna.
Dina hiji waktu Kean Santang ngadeuheus ka ramana, unjuk-kan yen dirina hayang
ningali getih sorangan. Hayang tarung ngadu jajaten, tapi teu aya nu bisa
nandingan.
Ngadangu kasauran putrana kitu, Prabu Siliwangi geuwat bae nyauran para ahli nujum
karajaan. Menta bongbolongan, sugan aya jalma anu bisa nandingan kasakten Kean
Santang. Ditanya kitu, para ahli nujum teh kabehanana ngabigeu teu aya nu nembal.
Ngan teu lila ujug-ujug aya aki-aki anu nyampeurkeun ka Kanjeng Prabu.
�Kanjeng Prabu, kaula bisa nuduhkeun saha jalma anu bisa nandingan kasakten tuang
putra. Jauh pisan eta jalma teh, ayana di nagri Mekah, ngaranna Bagenda Ali.�
�Saha kira-kirana anu bakal unggul lamun anak kaula tarung jeung Bagenda Ali�
Kanjeng Prabu ,alik naor.
Aneh pisan, samemeh ngajawab eta aki-aki teh geus ngaleungit, duka ka mana
ngilesna.
Ti harita Kean Santang teu genah cicing. Hayang geura gok patepung jeung jalma nu
ngaran Bagenda Ali. Hayang geura tarung ngadu jajaten.
Hiji waktu Kean Santang pamitan ka ramana Prabu Siliwangi, seja miang ka nagri
Mekah, rek nepungan Bagenda Ali. Sanggeus diwidian ku ramana, gejlig bae anjeunna
angkat ti Pajajaran. Leumpang ngulon, muru ka lebah panonpoe surup. Bubuhan jalma
sakti, leumpangna teh napak kancang, nyaeta leumpang dina kulit cai, nyeak gancang
ka ditu ka kulonkeun.
Barang nepi ka nagri Mekah, Kean Santang patepung jeung aki-aki anu keur ngiuhan
handapeun tangkal korma. Pok Kean Santang nanya.
�Ki, cing tuduhkeun di mana ayana Bagenda Ali teh� Eta aki-aki teh ukur melong,
neges-neges ka nu anyar datang.
�Saha Ujang teh� pokna kalah malik nanya.
�Kaula teh Kean Santang ti Pulo Jawa. Kaula hayang tepung jeung Bagenda Ali. Cenah
anjeunna teh jalma sakti, kaula hayang ngadu jajaten.�
�Euh, kitu. Yu atuh tuturkuen Aki!� ceuk eta aki-aki ngajak indit ti dinya. Kean
Santang nuturkeun. Tapi kakara oge sababaraha lengkah, aki-aki teh pok nyarita,
�Aeh, iteuk Aki tinggaleun. Cing pangnyokotkeun, Ujang!� Kean Santang geuwat balik
deui, maksud rek mangnyokotkeun iteuk. Ari iteuk si aki tea nanceb deukeut tangkal
korma.
Barang eta iteuk dicabut, karasa bet pageuh. Kean Santang nyabut deui beuki bedas,
angger bae teu kacabut. Kean Santang mapatkeun ajian, nyabut deui eta iteuk sataker
tanaga. Ane pisan. Lain iteuk anu kacabut teh, tapi kalah sukuna ambles kana
taneuh. Kitu jeung kitu bae, unggal manehna nyabut, sukuna kalah beuki mebes.
Kean Santang geus ngoprot kesang. Iteuk angger teu bisa kacabut. Manehna mimiti
boga curiga yen aki-aki nu boga eta iteuk teh tangtu lain jalma samanea. Keur kitu,
aki-aki teh geus aya gigireun.
�Saha saenyana andika teh, Ki� ceuk Kean Santang semu lungse. Si Aki ukur seuri
ditanya kitu teh.
�Nya kaula anu diteangan ku andika teh. Kaula Bagenda Ali!� Ngadenge kitu, rumpuyuk
bae Kean Santang nyuuh kana sampean Bagenda Ali. Manehna taluk, sadar yen kasakten
dirina ukur satungtung buuk upama dibandingkeun jeung elmu kawedukan Bagenda Ali.
�Kaula taluk, sumerah diri hoyong guguru ka Kanjeng Bagenda,� ceuk Kean Santang.
�Heug, tapi andika kudu ngucapkeun sahadat heula, asup agama Islam,� walon Bagenda
Ali
Ti harita Kean Santang asup agama Islam sarta terus guguru, ngulik bagbagan agama
Islam di Nagri Mekah.
Sanggeus ngarasa cukup ngalap elmu, Kean Santang pamitan hayang mulang deui ka
nagrina, Pajajaran. Ku Bagenda Ali diwidian kalayan dibere pancen yen Kean Santang
kudu nyebarkeun agama Islam di Pulo Jawa. Aya dua rupa barang anu dibekelkeun ku
Bagenda Ali nyaeta tasbeh jeung kitab Al-Qur�an.
Kean Santang mulang deui ka Pajajaran, nyebarkeun agama Islam. Teu saeutik rahayat
Pajajaran anu tuluy ngagem agama Islam. Ari ramana, Prabu Siliwangi, teu kersaeun
ngagem agama Islam. Dibarengan ku sawatara prajuritna, Prabu Siliwangi ninggalkeun
karaton, ngungsi ka hiji tempat di pakidulan Garut. Ceuk sakaol, di dinya anjeunna
�nghiyang�, ngaleungit tanpa wujud. Ari para prajuritna minda rupa jadi maung.