ACARA PARTANGIANGAN KELUARGA

HKBP SIMPANG PADANG

Rabu, 05 Mei dan Kamis, 06 Mei 2021
( U : Uluan K : Keluarga )
01. Martangiang na Hohom di bagasan rohana be
02. Marende BE. HKBP No. 815 : 1 – 2 “Uli do tingki na hohom”
♫ Uli do tingki na hohom di joloni habangsa ni,
Amanghu na rade tongtong manjalo pangidoanhi
Ai di na marsak rohangki sai diapuli tondingki
Malua sian jorgong i ditingki martangiang i.
♫ Uli do tingki na hohom, sonang martua rohangkon,
Tongtong masihol rohangkon, lao martangiang na hohom.
Au raphon na badia i, sai naeng marnida bohiMi
Tuhanku sipartobus i, ditingki martangiang i.

03. Votum – Introitus – Tangiang (U: Uluan, K : Keluarga)

U : Marhitehite Goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Parbadia na tumompa langit dohot tano on.
K : Amen.
U : Marsoara olopolop ma hamu paboahon, patubegehon hata i, pasar hamu
ma i ro di ujung ni tano on, dok hamu ma: Nunga dipalua Jahowa
naposoNa si Jakop. Marolopolop tu Debata ma ho, ale sandok tano on !
Endehon hamu ma hamuliaon ni GoarNa, marmulia ma bahen hamu
pujipujianNa. Haleluya!
Martangiang ma hita : Ale Tuhan Debata ! Suru ma Tondi Parbadia tu
rohanami, asa tarapul situtu rohanami marhitehite haheheon ni AnakMu,
Tuhan Jesus Kristus, jala asa lam ganda haporseaonnami marhitehite
pangkirimon na mangolu, asa tongtong huingot hami, na hehe do hami
muse sian na mate songon Tuhan Jesus Kristus, Tuhannami, naung hehe
sian na mate i. Amen.

04. Marende BE. HKBP No. 581 :1 - 2 “Sangap di Jahowa”

♫ Sangap di jahowa na sun timbul i,
Balga ni holongNa ndang tarasam i,
Di lehon AnakNa na sasada i,
manobus hita jolma pardosa i
Puji ma Debata ale manisia,
 Las roham las roham somba ma Debata,
Dapothon Jahowa na sun timbul i,
Marhite AnakNa Tuhan Jesus i.
♫ Tung so hasuhatan do basaNa i,
Marhite AnakNa nilehonna i.
MudarNa durus do di hau silang i,
Rara pe dosanta ias dibaen i.
Puji ma Debata ………

05. Manjaha Bibel : 1 Johannes 5 : 1 - 5

U : Ganup na porsea, Jesus do Kristus, i do naung tubu sian Debata, jala
ganup na mangkaholongi Ibana na manubuhon, haholongan ni i do nang
na tubu sian Ibana.
R : Sian on do taboto, naung holong rohanta di angka anak ni Debata: Molo
tahaholongi Debata jala taradoti patikna.
U : Ai on do holong ni roha di Debata; molo taradoti patikna. Ndada na
dokdok patikna i.
R : Ai nasa na tubu sian Debata do manaluhon portibi on. Haporseaonta i do
naung monang manaluhon portibi on.
U : Ise do na manaluhon portibi on, ia so na porsea di Jesus Kristus, Anak ni
Debata?.
I ma sahatna. Martua do angka na tumangihon Hata ni Debata jala na
umpeopsa. Amen.

06. Marende BE. HKBP No. 249 :1 - 2“NGOT MA HO, O TONDINGKI”

♫ Ngot ma ho, o tondingki dungo martangiang
Asa unang musu i tole so tinagam
Bisuk ni setan i do manait tu dosa lan na bonar roha.
♫ Ngot ma ho, modom i dibagasan dosa
Asa unang ala ni ho marutang hosa
Ai hatop nang tahop ro ma pangunjunan tu naso mangam

07. Jamita (1 Samuel 1 : 9 - 18) (berdoa diikuti membaca alkitab)

Ia si Hanna ima inanta ni si Elkana. Na hol do si Hanna on, jotjot do Ibana
diinsahi, dileai si Peninna rindang ni si Hanna, ala si Peninna tubuan anak alai si
Hanna ndang. Dilaonlaonni ari lao do si Hanna dohot si Elkana manaruhon pelean
situtungon tu Jahowa di bagas joro. Tongon hatihai si Eli do malim na saton i.
Diparrohahon si Eli do na martangiang i si Hanna, sai hira partangiangonni na
mabuk. Jadi didok si Eli ma tu ibana: “Sadia leleng on ho mabuk? Utahon ma
anggur niinummi sian ho?” Alai dialusi si Hanna ma : “Sitongka, ale tuanku!
Parompuan na gondok roha do ahu tahe, ndang dung huinum anggur, manang
siinumon na koras, rohangki do na huusehon di jolo ni Jahowa.” Dung songon i
panghataioni didok si Eli ma : “Laho ma ho muli mardamedame! Sai na lehonon ni
Debata ni Israel tu ho na pinangidom sian Ibana.” Gabe dapotan las ni roha ma si
Hanna. Diarahon turpuk on do parsitutuon martangiang tu Debata sian gopu ni
roha jala pos situtu roha na ingkon alusan ni Debata tangiang i tu hasasaut ni
tangiang i. Ndang olo lomos halak na porsea martangiang tu Tuhan i atik pe ndang
mamintor jumpang parbue na alai nunga sihar panaili jala gok panghirimon di asi
ni roha ni Debata. Amen.
Pdt. TJS

08. Marende BE. HKBP No. 487 : 1-2 “Tung halak na margogo”
♫ Tung halak na margogo si partangiang i.
Dokdok pe si taonnon, ndang olo talu i.
Pos situtu roha na di Debata na i.
Tuhan na manaluhon sude pangalo i.
♫ Nang hirahira mogap dibaen sitaonon i,
Marsinggang do Ibana managam Tuhan i.
Dung jumpang pe tingkina sumurut arsak i,
Tarapul ma rohana dibaen Tuhanna i

09. Tangiang Pangondianon :

Hahipason mangula ulaon siapari, manontong marhaposan tu Debata,
panggomgomi dohot pangubati (para medis) lam margogo jala marbisuk,
keluarga korban virus corona, PDP, ODP, asa tontong pos rohana di
Debata.

10. Marende BE. HKBP No. 770 : 1 … “Tu Debatami”

(Pelean)
♫ Tu Debatami na sun gogo i
Sai maporus ma ho ganup ari
Di tanganNa doho molo musu ro
Tung na sonang di ampuanNa ho,
Di tanganNa doho molo musu ro
Tung na sonang di ampuanNa ho ho.
♫ Tung sun hinagogo ni Tuhan I,
Ingot ma Debatam do manghophop.
 Nang ponjot rohami, ndang na leleng I,
Tongkin na I pujionmu Tuhan i.
Nang ponjot rohami, ndang na leleng I,
Tongkin na I pujionmu Tuhan i.
♫ Soara ni olop-olop na I,
Marsaringar di angka partigor.
Lan do do gogo disi mambaen monang I
Paima sahat sude tu surgo i.
Lan do do gogo disi mambaen monang I
Paima sahat sude tu surgo i.

11. Tangiang Panutup

U : Tapasahatma tu Debata Pelean na tapapungu on, martangiang ma hita : Ale
Debata, Amanami na di banua ginjang, Ho do haroroan ni saluhut
silehonlehon na denggan dohot nasa ulibasa na mauliutus. Hupasahat hami ma
sian na nilehonMi tu hami, peleannami tu Ho. Sai jalo ma i gabe uap na
hushus di joloM. Pasupasu ma i jala ramoti asa huparhaseang hami pelean on,
patimbulhon harajaonMu di tongatonga ni huriaM dohot di portibi on. Buhai
ma rohanami marhitehite TondiM, asa lam hutanda hami godang ni
silehonlehonMi tu hami, asa lam girgir hami mandok mauliate tu Ho,
marhitehite Jesus Kristus Tuhannami. AMEN.
K : (Rap mandok) Tangiang Ale Amanami :
“Ale Amanami na di banua ginjang ! Sai pinarbadia ma GoarMu ! Sai ro ma
harajaonMu ! Sai saut ma lomo ni rohaM di banua tonga on songon na di
banua ginjang ! Lehon ma tu hami sadari on hangoluan siapari ! Sesa ma
dosanami songon panesanami di dosa ni dongan na mardosa tu hami ! Unang
hami togihon tu pangunjunan ! Palua ma hami sian pangago ! Ai Ho do
nampuna harajaon dohot hagogoon ro di hasangapon saleleng ni lelengna.
Amen !”
P : Hata pasupasu + Amen 3x! (molo Parhalado partohonan na mangoluhon).
Molo ruas ni huria do na mangoluhon, sian tangiang Ale Amanami…
langsung tu Amen 3x

Persembahan
Jumlah : Rp……………………..
Wijk : ………………………..