Ensera Anak Mit Vol 17











Digumpul sereta dikarang Gregory Nyanggau Mawar
Diedit Pengajar Juspine Gani
Illustrasi digaga Pengajar Richard Boon J. Timban
Perpustakaan Negara Malaysia Cataloguing-in-Publication Data,

Ensera Anak Mit Vol.1 Ditulis Gregory Nyanggau Mawar, 2010-
ISBN xxx-xxx-xxxxx-x-x
Published by Gregory Nyanggau Mawar,

Lot. 7041, Lorong 10-1, Jalan Dato Permaisuri 5B,
Bandar Baru Permyjaya, 98107 Miri, Sarawak, Malaysia
Email: gnmawar@gmail.com
http://gnmawar@wordpress.com
Printed by Yushan Company,

Lot 1656 Piasau Jaya Industrial Estate,
98000 Miri, Sarawak, Malaysia
Semua kuasa nyelak dijaga. Sebarang bagi dalam bup tu enda tau disalin ngena jalai ti tau ditunda baru, sekalika nya ngena jalai
elektronik, injin penyelak, injin begambar tauka sebarang jalai bukai, enti nadai pemendar ari Penulis empu.
Acknowledgement
Enggau pengaga ati, aku meri besai terima kasih ngagai Pengajar Juspine Gani ke udah nulung
aku ngedit ensera tu ngena jalai sepil Iban ke baru enggau Pengajar Richard Boon ke udah
nulung aku ngaga illustrasi dalam ensera tu. Aku mega meri terima kasih besai ngagai Pengajar
Padang Luna, ari Unit Bahasa Etnik, Pusat Perkembangan Kurikulum, Kementerian Pelajaran
Malaysia ke udu meransang aku nusun semua kereban penemu asal, jerita lama enggau ensera
Iban ke udah dipublish dalam weblog aku di http://gnmawar.wordpress.com/. Aku arapka bala
anembiak kedudi hari nemu beguna ka kereban ke bisi ditu.
Pun Jaku
Munyi ku jaku sempama, ngedangka buluh belabuh ari tubu. Ngena jalai bensera, aku arapka
bup tu ulih dikena ngepunka pengerindu bala anembiak belajarka jaku bansa Iban ari tingkat
sekula baruh ngagai sekula tinggi. Jaku bansa Iban, penemu lama enggau main asal tu pesaka
bansa ti besai bendar dikena urang ngelala bansa Iban. Nengkebang pengerindu bala anembiak
bakatu, tau meri peransang ati ngagai sida iya ngembuan-nyimpan pesaka lama bansa Iban
ngambika tau meruan diguna sereta mansang ngerembai ke dudi hari ila. Nambah ka nya,
pesaka kitai tau meri pengangkun, pemegah ati enggau pengering diri ti meruan dikena
nyerakup anak bansa Iban. Pengawa baka tu ukai baka urang ke ngerumban adan, tang
dipupuk ba tiap-tiap serak turun kitai. Ari nya tadi, bansa Iban meruan besukungka diri sama
diri awakka dikelala, dipandang tinggi sereta dipebasaka bansa urang bukai ke besaruk pendiau
enggau kitai didunya tu.
Ensera tu siti jalai lama dikena bansa Iban ngenataika pelajar tauka penemu ngagai bala
anembiak papak perenggang, sida ke mit lelachit benung mansang. Sida tu baru deka
berengkah belajar sereta baru ngelala bemacham pekara ti nyadi didunya tu. Ari betusuika
ensera, sida tau belajarka ulah ti patut nyadika teladan, sereta ngelala bagi ulah ti tau dititih.
Ensera tu endang cherita kelulu ti tau ngasuh bala anak kitai rindu ketawa, gaga ati, sinu
ngenang, berasai takut sereta ngasoh bala anembiak belajar berunding kediri dalam semua
pekara ti nyadi dalam pendiau sida. Ensera tau mai mayuh peragam ba ati anembiak sereta tau
dikena ngerembaika akal sida iya dalam tiap-tiap tingkat pelajar enggau pendiau sida jemah ila.
Ensera ke ditulis ditu mega tau dikena meransang bala anembiak belajarka jaku bansa Iban
awakka jaku Iban meruan ngerembai maju ari serak siti ngagai serak ke dudi agi. Enggau tu
aku ninggalka segenteran dua jaku sempama ngagai bala pelajar anembiak munyi tu:
Dikelala bungai ari kayu,

Dikelala buah ari langgu,
Dikelala basa ari penyiru,
Dikelala bansa ari jaku.
Enti bejalai betungkatka adat,

Enti tinduk bepanggalka pengingat.
Arapka kita mujur dalam semua pelajar kita ngagai tikas ti pemadu tinggi awakka kita senang
lantang ngidupka diri didunya tu.
_________________________
Gregory Nyanggau Mawar
Semua kuasa nyelak dijaga. Sebarang bagi dalam bup tu enda tau disalin ngena jalai ti tau ditunda baru, sekalika nya ngena jalai
elektronik, injin penyelak, injin begambar tauka sebarang jalai bukai, enti nadai pemendar ari Penulis empu.
TUSUN ENSERA
1. Indai Alui Nyadi Antu Lakak

2. Apai Alui Jaga Upih
3. Apai Alui Jadi Tukang Tujum
4. Indai Alui Abis Garam
5. Apai Alui Besilih Rumah Enggau Apai Umang
6. Apai Alui Nyumpit
7. Apai Alui Nan Abau
8. Apai Alui Ngaga Diri Nyadi Berakup
9. Apai Alui Mati Kentut
Jaku Peransang Ngagai Pemacha Anak Mit:
Baka nya penyiru jaku dikena besampi ngagai Petara,

Baka nya mega penyiru sada nyawa dikena meri basa ngagai apai-indai,
Laban bebasaka apai-indai sebaka reti bebasaka Petara,
Endang adat kitai diatur Petara idup begulai sejalai,
Minta Petara ngiring lalu ngemata,
Ari biak nyentukka kitai tuai,
Ngasuh kitai pandai bulih penemu dalam sekula,
Awakka bisi pengidup ti menyana meruan nyamai,
Nyadika teladan anak bansa,
Nyadika chuan anak kitai,
Nitihka arus pemansang dalam dunya,
Ke endur kitai besaruk diau begulai bedamai.
Semua kuasa nyelak dijaga. Sebarang bagi dalam bup tu enda tau disalin ngena jalai ti tau ditunda baru, sekalika nya ngena
jalai elektronik, injin penyelak, injin begambar tauka sebarang jalai bukai, enti nadai pemendar ari Penulis empu.
1. Indai Alui Nyadi Antu Lakak
Nyadi Apai Alui tu urang ke udu bendar rinduka pengawa nyumpit enggau berikan.
Laban nya endang batang pengidup sida sebilik kelimpah ari ke bumai betaun. Bisi sekali
dia iya berunding deka ngasu ngagai kampung puang ti enda jauh ari tisi umai sida,
laban bekau babi bisi bendar ngachau utai ti ditanam sida ba umai. Nya alai pagi hari
siti, agi urap hari, dia Apai Alui lalu ngasuh bini iya Enchelegit berapi nyendiaka bekal
dikena iya.
“Oh Indai Duat, berapi nuan nyangkungka bekal aku dia. Aku tu deka bejalai katas kia
pagi tu,” ku iya ngerak Indai Alui.
Nyadi Enchelegit lalu nyaut, ninga Apai Alui ke deka nurun ngasu. “Pama agi nuan
begiga ikan ke ulu Sungai Madu, endur ikan betelu nyaru, ngabu nyungkangka batang.
Nama guna nyumpit semina ngulihka kunchit ke mesai bulu mata,” pia ku Indai Alui
nyaut.
Udah nya Indai Alui lalu angkat berapi surung jari, surung kaki. Jari nyau baka ke deka
muar kesa, kaki nyau baka ke sengat semada. Asap melap datai di para asi pan lega,
asap melap datai di sadau asi pan mansau. Asap melap datai di perabung asi pan
ditanggung.
Udah asi iya mansau, Indai Alui lalu mungkus bekal ngena upih. Iya lalu nyimpan garam,
belachan, semakau enggau daun gentu ke insap Apai Alui. Udah Indai Alui tembu
ngaduka bekal, dia Apai Alui lalu mupuk nurun ngasu. Lebuh iya deka nurun, iya lalu
ngangauka ukui iya ke benama Jela.
“Diiiiih Jela, dih-dih-dih-dih,” ku iya ngangauka ukui iya. Jela lalu kaung-kaung nguitka
iku, ransing ati nitihka Apai Alui. Datai seduai iya ba tisau serarai dia iya lalu ninga
nendak muak ke kiba, lepas nya lalu dibalas nendak tunga ke kanan.
“Oh! Manah burung tu,” ku ati Apai Alui, “laban nya burung surung Unggat, burung
ngayuka manduk jelu,” ku iya bejaku kediri berandau nengali. Enda berasai iga iya
bejalai ari endur iya ke ninga burung nya tadi, dinga iya tak nyerarat bunyi salak Jela.
“Jamah Jela jamah, jamah Jela jamah!” ku iya ngangauka ukui ia. Iya seruran nitihka
tunga salak ukui. “Chih! Chih! Chih! As-Jela-as! as-Jela-as!” ku iya meransang ukui iya.
Enda lama udah nya, dinga iya nekus babi nya naanka salak Jela. Iya lalu beguai-guai
belanda ngagai babi ti naan. Tang tak enda mukai-mukai kaki iya lalu tesangkut. Iya pan
lalu bebaring belat lalu teberapka pun rutan duduk.
“Hah deh! Pachal ga kaki tu enda meda jalai!” ku iya muchau munyi Melanau nimbau
bangkung. Iya lalu ngeransi ngentakka kaki diri empu, empa pemedis ati iya. “Akai!” ku
iya ga engkakai, “Pedis endar kaki aku!”.
Udah nya iya lalu beguai kejingka angkat, lalu belanda baru, nitihka Jela. Bekal iya nyau
abis tebarayan sabelah babas, empa pamendar iya ke belanda. Nyau kelama Apai Alui
udah nitihka Jela, iya pan datai ga ba endur babi ke nanka salak Jela. Nya baru iya meda
babi siku besai bendar. Babi nya nyau tekup-tekup disalak Jela ba ulu lebak. Udah nya
Apai Alui lalu ngansak semak ke agi. Nyau umbas penyauh alai iya nikam, nya baru iya
numbuk babi enggau sangkuh kebat, peda tak lalu chuit-chuit lekat ba rusuk kanan babi.
“Kena endar abi disalinting Apai Duat,” ku iya bejaku muji pengelandik diri empu. Udah
babi nya mati, iya lalu nyabut sangkuh kebat iya nya tadi.
Gambar 1 - Apai Alui bulih babi
“Hah! Tu baru iya lagi!” ku Apai Alui gaga ati udah bulih babi. Udah nya baru iya mulaika
diri mai bangkai babi. Bulih semaut pemanjai taring babi ke ulih iya nya tadi. Babi nya
lalu disan Apai Alui segala-gala. Nyau bungkuk undang belakang Apai Duat kena tating
babi ngemesai nya. Singkang kaki iya pan nyau changkuh, enda tentu lurus pejalai.
Lebuh iya nyan bangkai babi nya, dia iya lalu berunding enggai mai babi nya pulaika
rumah tang ditinggalka iya ba tisau umai.
“Kapa aku kiruh nyan babi nya pulai, ngenyauh nya bejalai. Manah agi aku ninggalka iya
ditu dulu. Malam lagi nya baru aku napatka iya baru,” ku Apai Alui bejaku kediri. Iya lalu
ngengkah babi nya ba tisi umai sida lalu mulaika diri ke rumah.
Datai iya di rumah, sereta udah begari, iya lalu ngaga diri baka ke nadai bulih utai ga
ulah iya. Iya lalu minta api dikena iya bekindu.
“Meri aku api nuan dia, Enchelegit, kena aku bekindu. Chelap bulu tu,” Ku iya ngangauka
Indai Alui.
Enchelegit pan lalu pansut ga ari bilik mansang mai ungun api dikena Apai Alui bekindu
ba bedilang iya, laban Apai Alui kumbai iya amat chelap bulu udah pulai ngasu.
Nyadi lebuh iya bekindu nunga bedilang iya dia, Apai Alui lalu ngulurka iku sirat iya
ngagai api. Udah nya lalu ngangau ke Enchelegit baru. “Oh! Indai Duat! Indai Duat! Meri
aku kayu mayuh ke agi, chelap bulu tu.” ku iya. Dia lalu ngaga diri digak-digak chelap.
“Heh! Iku sirat nuan angus apai.” ku Alui ngerara iku sirat apai iya empa api.
“Enda apa, aku chelap, lak ke angat agi,” ku apai iya nyaut anak iya.
Indai Alui pan lalu pansut ari bilik mai kayu seberekas mesai kisar lalu diengkahka iya
semak bedilang endur Apai Alui bekindu.
“Kapa nuan kayu ngemayuh nya, Apai?” ku Alui nanya.
“Eh! Kena ke sengkilu. Dikena aku bira lagi,” ku iya nyaut.
Udah nya Apai Alui lalu nurun deka mansang bira. Nyadi Indai Alui, laban ke nemu
bendar ulah Apai Alui, endang sangkaka iya bisi bulih babi ngasu tadi. Iya lalu berunding
enggau Alui nengkilaka ulah apai iya ke nurun bira.
Nyau kelama Apai Alui udah nurun, nya baru Alui seduai indai iya nurun nitihka apai iya.
Datai seduai ba tisi umai sida, dia seduai meda api Apai Alui nyau melap-melap dikena
iya emparu babi ulih iya ngasu.
“Nyah! Peda nuan Alui, endang amat munyi ku aku. Nya deh ulah apai nuan enggau
kitai. Endang beduan kitai iya tu. Lagi tua malas, ngaga diri nyadi Antu Lakak tua. Iya
takut bendar ke Antu Lakak,” ku indai iya nganu Alui
Udah nya Alui seduai indai iya lalu belalai ngaga diri nyadi Antu Lakak enda bangat jauh
ari Apai Alui ke emparu babi. Dia seduai lalu bemunyi. “Lakak! kak! kak! kak! kak!. Meri
pah sepiak. Enti enggai meri, peruti perut nuan lagi,” ku Enchelegit.
Gambar 2 - Apai Alui makai belalai kediri
Ninga Antu lakak bisi bemunyi minta babi semak iya dia, Apai Alui pan lalu tekenyit.
Labanka takut bendar ke Antu Lakak, dia iya lalu netak pah babi sepiak lalu ditikauka iya
ngagai babas.
“Nyah, nya meh untung enggi kita, anang minta, anang nyanda agi!” ku Apai Alui.
Enda bangat lama udah nya, kira udah tembu Apai Alui emparu pah babi ke sepiak agi,
bemunyi baru ga Alui seduai Indai iya. “Lakak! kak! kak! kak! kak!. Meri pah sepiak agi.
Enti enggai meri, keruk leka mata nuan lagi ngambika nuan buta enda meda.”
Ninga Antu Lakak agi minta babi munyi nya, Apai Alui pan lalu netak pah babi sepiak agi
lalu ditikauka iya ke babas baru. Nyau ke suah Antu Lakak minta babi, tak enda berasai
semua isi babi ke manah nyau abis diberi ngagai antu. Semina tinggal pala enggau perut
babi agi ke ungkup Apai Alui. Semua isi bukai udah diberi ngagai Antu Lakak magang.
Alui seduai Indai iya pan mulai kediri ke rumah, mai babi babas ke ulih seduai ari Apai
Alui tadi. Babi nya tadi lalu dibela sereta dipanduk Indai Alui ke sida sebilik di rumah.
Udah tembu Apai Alui makai pala enggau perut babi nya tadi, iya lalu mupuk mulaika
dirika rumah. “Ah! Nya baru tembu endar nyawa tu,” ku iya bejaku kediri, gaga ati udah
nengali makai pala enggau perut babi. “Nya baru nyamai nyengkilung baka sawa natka
telan lagi,” ku iya berunding kediri deka tinduk ngenatka perut kenyang. Datai di rumah,
iya lalu bekindu baru. Udah nya iya lalu ninduk ke diri. Lebuh iya ke tinduk, labanka
udah kenyang makai babi, dia mulut iya lalu rangap-rangap tebuka. Indai Alui lalu
nyungkit tinga iya, nyau bulih semangkuk batu pemayuh tinga iya disungkit Enchelegit.
Meda tinga ngemayuh nya, lalu dilulun Indai Alui nyau bulih seruas munti. Udah mansau
lulun tinga Apai Alui, lalu dituang ke dalam mangkuk tachu. Pagi nya Enchelegit lalu
ngumbai makai. “Makai Apai Duat! Makai kitai tu,” ku Indai Alui.
“Au, lapar perut tu,” ku Apai Alui nyaut. Nyadi mangkuk pansuh tinga diengkah ke Indai
Alui semak chapak Apai Alui, lalu lauk ke manah nya diengkah ke Enchelegit semak
seduai Alui.
Udah nya sama makai sereta meh sida tiga menyanak. Nama agi deh, nyau nyinuk Alui
seduai indai iya makai, nyamah gumpal lauk nyamai.
“Heh ! heh ! heh !, seduai bedau ensepi utai ke nyamai ditemu aku demalam,” ku Apai
Alui ketawa dalam ati diri sambil nyeling ngagai Alui seduai indai iya ke bedamai makai.
Apai Alui pan lalu berengkah ga makai, ngauk lauk ari tachu iya. Sepi Apai Alui lauk iya
tak penat. “Oh, nama lauk tu tak penat asai Indai Duat?” ku iya. Enchelegit endang enda
nyaut seleka mukut, enda malas sekali nimbas. Meda baka nya iya lalu nyepi lauk Alui
seduai Indai iya. Sepi iya tak nyamai. “Nama lauk seduai tak nyamai deh? Lauk aku tak
penat, nadai asai,” ku iya nanya Indai Alui.
“Enda nemu meh Apai Duat, sama belaukka lauk nya ga kitai,” ku Enchelegit.
“Enda ah, tak lain gamal enggi aku tu. Tak bau telu manuk banggar,” ku Apai Alui.
“Enggi seduai bisi kerat besai, enggi aku tak pamur baka sepur,” ku iya.
Gambar 3 - Nyungkit tinga Apai Alui
“Ehhhh! Nuan ga tambap-lap ansang ke lubang, alit lubang burit,” ku Enchelegit.
“Nama penambap aku? Ukai aku enda nemu asai lauk,” ku iya nyaut ngelaban Indai
Duat.
“Nama utai ditanya ke nuan, tinga nuan meh nya, tinga nuan empu ke lauk nuan nya,”
ku Enchelegit madah ngagau Apai Alui.
“Beduan aku nuan Enchelegit,” ku saut Apai Alui. Gamal iya pan nyau gitik-gitik anak
buah isi iya bai iya ngering kediri bejaku.
“Nadai beduan nuan kami tu, tang nuan ke beduan kami duai Duat. Nuan ga bam
angam, nuan ke tambap lap. Nya meh nuan disemaka aruk-aruk burit kali, pagila lusa
dudi hari, urang nemu malas. Nuan ke mungkal beduan kami nengali babi kediri enda
nemu ngampitka bini-anak di rumah,” ku Enchelegit nyaut iya. Iya tak nyau chinang-
chinang leka mata empa pemedis ati iya.
Ninga jaku indai Alui munyi nya, iya pan lalu tendu mimit bejaku, ngasai kediri endang
amat salah deka nengali babi nya kediri. “Dini agi bisi babi! Udah dipinta Antu Lakak nya
alai aku nadai mai pulai ke rumah,” ku iya bejaku sambil ngaru bulu pegu diri.
“Badu enda meh Apai Duat. Kami dua Alui ke ngaga diri nyadi Antu Lakak tadi, meda
nuan bangat angam bam nengali babi,” ku Enchelegit.
“Ohhhh!!! bangkai seduai tu deh! Enti aku nemu nya seduai ke nyadi Antu Lakak tadi,
anang ke isi, tunjing enggai meh aku meri,” ku iya nyaut. Tang iya nyau balat bendar
udah maluka pengawa diri. Angkat iya ari nya, iya lalu nyau pansut ke ruai. Nyau
semetup munyi pintu diempaska iya. Iya lalu enda makai agi, laban ke agi ringat bekau
dikeduan Indai Alui tadi. Datai iya di ruai lalu gali bebungkur apus enggau pua tekalung.
Munyi ku jaku sempama, adat berumah betuntung temetung, adat ngasu bebagi
semeliyung. Ari ensera antu lakak tu tadi, arapka bala pelajar ngelala pengawa ti tau
nyadika teladan kitai begulai enggau diri sebilik. Semua utai ti dikemisi ke kitai endang
manah dikunsika enggau diri sebilik. Ari nya tadi kitai belajar enda tau rangka enggau
pangan diri sereta lalu nemu betulungka apai-indai, diri menyadi enggau urang bukai ke
sama begulai pendiau enggau kitai. Kitai mega enda tau beduan diri sebilik tauka urang
bukai. Baka sempama jaku ti nyebut, aruk-aruk burit kali, pagila lusa dudi hari. Reti nya,
kitai anang dulu mungkal beduan urang, laban kedudi hari ila, enti urang nyau malas
kitai, kitai tau mega pulai malu nyadi ke engkeramba urang bukai.
2. Apai Alui Jaga Upih
Nyadi Apai Alui tu endang sigi urang ke nadai tentu batang pengawa ti menuku dikerja
tiap-tiap hari, kelimpah ari iya ti nyumpit, nginti ikan, nan bubu, manjuk enggau
ngelakar urang kulu-kili. Bumai pan dikereja iya mega, tang ke lebih agi ngintu pengawa
umai nya Indai Alui ke dikumbai Enchelegit. Nyadi bisi sekali lebuh umur Apai Alui kira
agi biak, baru udah beranakka Alui, dia iya bisi nerima surat panggil Perintah ngasuh iya
datai ngagai balai Pulis. Meda diri nerima surat panggil ari upis Pulis, iya lalu tusah ati
laban iya enda nemu penyalah diri alai Pulis manggil. Hari siti iya lalu undur mai surat
panggil ngagai kubu. Datai iya di kubu iya lalu nyuaka surat panggil nya ngagai kunsil.
“Nama penyalah aku tu Tuan Kunsil! Nama kabuah alai perintah tak manggil aku?” ku
Apai Alui nganu kunsil. “Aku enggai ditekanka kita salah ngapa, laban aku nadai nemu
penyalah diri” ku iya nampung jaku diri.
Udah nya Kunsil lalu nerangka kebuah alai Apai Alui ke kena panggil perintah.
“Ukai baka ni alai perintah ke manggil nuan Apai Alui,” ku Kunsil, “tang laban nuan
ditemu kami gagah, berani, lurus ati serta bisi pemintar, tambah agi nuan endang
penikar dalam pengawa main baka bekuntau enggau bepencha. Nya alai diatu perintah
deka begunaka nuan ngambi nuan kerja nyadi jaga,” ku Kunsil madah ngagai Apai Alui.
Ninga munyi nya andal bendar meh ati tudah Apai Alui nya tadi. Iya nyau betempap pah
sereta lalu muka bunga pencha mimit ba mua kunsil. “Ah deh, tu meh ke dikumbai
urang nemu beliyung enda ngambuh, bulih tapang enda ningkuh,” ku Apai Alui bejaku
kadiri.
Udah nya Kunsil lalu rakah-rakah ketawa meda ulah Apai Alui. Kunsil nya tadi lalu
ngasuh iya betemu enggau Sap-Pulis ngambika Sap nya madahka ni maya iya belabuh
kereja. Apai Alui lalu diuluka urang mata-mata siku, betemu enggau Sap-Pulis nya.
Lebuh seduai iya tama bilik, Sap-Pulis nya benung nulis.
Enda chechamang agi, laban ati ke udu gagit-gaga, Apai Alui lalu ngentakka kaki iya
meri tabi ngagai Sap-Pulis nya tadi,
“Gud Muning tuan Sap!” ku Apai Alui nabi iya. Sap nya tadi lalu tekenyit bendar ati laban
enda ngadang urang ke datai nya lalu nabi iya baka nya. Pinsil ti dikena Sap nulis lalu
tepelanting ari jari iya. Urang mata-mata ke nguluka Apai Alui pan sama tekenyit sereta
takut enggaika dianu Sap nya tadi. Udah lantang seput Sap nya tadi, nya baru iya
ngasuh Apai Alui duduk.
“Du..du..dudok Apai Alui,” ku Sap nya, agi kesal, ngasuh Apai Alui duduk.
“Ting kiyu sar!” ku iya nabi Sap nya baru, sambil nudukka diri.
Udah nya Sap pan lalu bejaku enggau iya. “Nyadi nuan diatu Apai Alui diambi perintah
nyadi mata-mata. Nya alai nuan pagila pukul lapan pagi niki upis, lalu belabuh jaga,” pia
ku Sap madahka iya.
“Barang iya meh Sap,” ku iya.
“Kati nuan nemu surat?” ku Sap nanya iya.
“Enda aku nemu urang nya,” ku iya nyaut Sap. “Dini alai iya diau deh Sap?”
Nyadi leka jaku „surat‟ nya dikumbai Apai Alui nama urang.
Gambar 4 - Apai Alui betemu enggau Sap Pulis
“Ukai nanyaka urang ke benama surat aku,” ku Sap, “tang nanya enti nuan nemu macha
enggau nulis surat,” pia ku Sap bejaku enggau Apai Alui.
“Diatu apin nemu aku,” ku saut Apai Alui. “Tang enti udah belajar pagila lusa nama
kebuah nya enda nemu deh,” ku saut Apai Alui. “Jaku ngelis deh nemu mimit aku, taja
aku nadai kala niki sekula. Ukai nya baka ke pedis ngelurka dilah,” ku iya ga nampung
jaku diri.
“Badas meh nya enti nuan bisi nemu jaku English,” ku Sap. “Nya alai uji saut ulih nuan
tanya aku tu,” ku Sap.
“Yiis sah” ku saut Apai Alui.
Tanya Sap baru ga iya, “What is your name?”
“No! No nem,” ku saut Apai Alui.
“Nyangka tak salah dinga Apai Alui jaku aku tadi," ku Sap berunding dalam ati diri.
Udah nya iya lalu nanya Apai Alui baru. “Where did you come from?” ku Sap nya nanya
iya baru.
Saut Apai Alui, “U-rait! ku iya.
Ninga saut Apai Alui tak nadai senentang enggau tanya iya, dia Sap nyauka ringat-ringat
ati. Mua Sap nyau bisi bebali merah. Nya alai iya lalu nanya Apai Alui baru, ku iya, “Are
you foolish?”
“Ting kiu-yu sar” ku Apai Alui nyaut Sap nya baru. Apai Alui lalu ketawa rakah-rakah.
Kebuah iya ke ketawa, laban ku ati iya semua saut iya betul magang.
Nyadi randau seduai lalu enda setimbal bejaku ngena jaku English, laban Apai Alui
semina nemu seleka dua jaku English. Leka jaku ke ditemu iya seleka dua nya tadi ukai
utai ti patut dikena iya nyaut Sap, taja pan iya ngumbai diri ulih nyaut semua tanya Sap
nya tadi.
Udah nya tadi Apai Alui lalu diasuh Sap sama diau begulai enggau urang mata-mata
bukai ba rumah birik Pulis. Kejang iya deka tinduk lemai nya, dia Apai Alui berundingka
jaku Sap ke ngasuh iya niki upih, “Nyelai bendar pengawa aku tu diasuh Sap, tak niki
upih. Nyangka bisi guna iya upih nya,” ku iya bejaku kediri.
Apin jam pukul lapan pagi iya pan lalu dani, empungas mua, lalu begari. Ngeli iya
endang enda kala diberus, semina engkurup ai aja. Udah nya Apai Alui lalu bejalai
gining-gining ngiga pinang ke bisi upih. Iya lalu niki pinang ke semak rumah alai iya
diau, lalu muai upih. Udah nya iya lalu mai upih nya ngagai Sap dikubu. Datai iya din
lalu nyuaka upih nya ngagai Sap.
“Tu, upih ti diasuh nuan tiki aku Sap,” ku Apai Alui.
“Eh! Upih nama nya!” ku Sap tekenyit. "Nadai aku ngasuh nuan niki upih deh,” ku sap.
“Palui nuan tu! Nikika kubu tu asuh aku, ukai niki upih, nemu nuan?” ku Sap merak iya.
“Nemu aku tuan, nuan ga udah madah, nya utai dipadahka nuan nya ga utai dikereja
aku,” ku saut Apai Alui.
Nyau kira seminggu Apai Alui udah bekereja gawa nyadi mata-mata, iya lalu diasuh
Serejin ti nguasa sida jaga jam, laban maya nya nyau kena idar Apai Alui jaga.
“Pagila enti jam pukul lapan, palu enggau iya,” ku Sap
“Au Serejin,” ku iya nyaut Serejin. “Ukai nya baka ke pedis malu jam nya deh,” ku iya.
Gambar 5 - Nyuaka upih pinang ngagai Sap-Pulis
Pagi siti, Apai Alui lalu nurunka Upis. Tumu bendar iya nurun pagi nya, agi besebun
ambun labuh, laban enggaika enda sempat malu jam. Lebuh jam bemunyi maya pukul
lapan pagi, iya enda chachamang lalu dipalu iya enggau kayu belantan jam nya tadi.
“Nyah! Udah pukul lapan meh jam tu,” ku iya bejaku kediri.
Gambar 6 – Apai Alui Malu jam
Nama deh, nyau redak meh jam nya udah bekau palu Apai Alui. “Ukai Serejin enda
nemu pengering aku deh, enti pasal bepalu, nadai kala dudi aku tu diambi urang,” ku iya
ngedarka lengan sambil bejaku kediri.
Enda lama udah nya, Serejin pan lalu datai ga di Upis. Lebuh iya mansa ba mua pintu ti
endur jam nya digantung, peda iya jam nyau redak bekau dipalu Apai Alui.
“Apo! Parai laban nuan tu,” ku iya. “Abis jam perintah dipalu nuan. Kati gila nuan, alai
nuan malu jam baka nya?” ku Serejin nanya iya.
“Enda aku gila tuan, nuan ke ngasuh aku malu jam, enti iya udah bemunyi pukul lapan,”
ku Apai Alui nyaut Serejin.
“Ukai jam nya ke diasuh aku palu nuan, nyin besi digitang ba mua pintu, ke diasuh aku
palu nuan enti jam mangkung pukul lapan,” ku Serejin. “Merinsa ga ngasuh urang ti beli
baka nuan tu, enda nemu reti pengawa,” ku iya.
“Nuan nadai madahka aku ngasuh malu besi nyin, kati ku aku nemu malu iya deh. Aku
tu urang baru masuk kereja, dini aku nemu utai ulu enggai ili, nya utai asuh kita nya ga
utai dikereja aku,” ku Apai Alui nyaut Serejin.
Udah nya Serejin lalu nguingka mua iya ke bukai empa pemedis ati iya. Tang iya mega
nemu diri silap jaku lebuh ke meri tugas ngagai Apai Alui.
Lebuh ditanya Sap, Apai Alui madahka Serejin ke ngasuh malu jam. Serejin pan
madahka diri silap, laban enda madah ngagai Apai Alui enggau terang agi, lalu iya minta
ampun ngagai Sap. Udah nya Serejin lalu diasuh nganti jam nya enggau jam baru. “Nya
alai nuan Apai Alui sekiraka enda tentu salah, tambah nuan agi baru bekereja, laban nya
aku agi ngampun nuan. Tang kagi tu ila, enti nuan apin tentu nemu reti pengawa ti
diasuh urang, anang enda betanya enggau silik, anang terus ngereja utai enggau buta,”
ku Sap madah ngagai iya. ”Aku empu pan agi meh belajar ngatur pengawa enggau
ngatur orang gawa, taja aku tu tuai ka kita ditu,” ku Sap-Pulis nya nampung jaku iya.
“Ting kiu yu Tuan! Laban nuan udah meri aku peluang belajar sereta gawa ditu,” ku Apai
Alui. Iya lalu ngentakka kaki iya nabi Sap. Sap nya pan nyau mansang rindu meda gaya
Apai Alui ti deka belajar sereta rajin ngerja utai ti diasuh iya. Iya lalu ngasuh Serejin dia
ngemataka pemansang Apai Alui, awakka iya tau nyadi urang ti menyana lalu tau
dikarapka Perintah ngerja pengawa jemah ila.
Lepas nya baru Apai Alui nyau mansang nemu gawa sereta betanyaka utai ti enda temu
iya. Iya mega belajar macha enggau nulis, serta belajar ke jaku urang putih. Nyau
manah jaku English iya. Ukai baka urang ke enda pintar deh tudah tuai enti diajar
enggau chara ti betul. Iya endang sigi rajin betanya sereta ngereja pengawa, enda
ibuhka urang ke ngumbai iya palui. Iya ukai baka urang ke kedil pending, enda ngasi
tauka enda nemu maluka pengawa ti salah. Iya nyau enda ngamatka diri agi baka ke
dulu sereta enda ngambat penemu urang bukai enti sida berandau, laban iya nemu taka
penemu ti muat ungkupka diri empu. Semua pengawa diasuh urang, endang enda
disakal iya magang, tak dikereja iya enggau likun. Iya mega enggai dikumbai urang lawa
kerubung, semina bisi seregah, tang nadai penemu tauka pengelandik.
Lima taun udah nya, Apai Alui lalu ditikika urang ngagai Pangkat Koperal. Alui seduai
Indai iya pan sama diau ba birik enggau Apai Alui. Pengidup enggau pendiau sida
menyanak pan nyau mansang baka urang bukai. Alui pan nyau tau dianjung Apai iya
masuk skula ti menyana, begulai belajar enggau anembiak bukai, nyentukka iya masuk
universiti bulih degree.
Nyadi penemu ke dipelajarka kitai ari ensera tu tadi iya nya, nasib kitai mensia tau
berubah nyadi manah enti kitai bisi pengelikun enggau pengerajin ngereja pengawa ti
dikereja kitai. Nasib tu nadai milih gamal siku-siku mensia, tang iya deka ngubah
pendiau urang ti rajin sereta pintar ngerja pengawa. Pengerajin enggau pemintar tu ulih
dilatih tauka diansah kitai sehari-hari lebuh kitai nimba penemu di sekula tauka lebuh
kitai udah bekereja jemah ila. Arapka bala anembiak rajin belajar sereta pintar dalam
semua pengawa sida.
3. Apai Alui Nyadi Tukang Tujum
Nyadi sekali kelia sida Apai Alui sebilik belangkau nyembuah ba tebing tasik ari ili
nengeri Raja Merom. Langkau sida menyanak mit, semina numbas endur sida tiga diau.
Pendiau sida tiga menyanak tu merinsa amat, kair pantuk baka pengidup manuk, kair
sehari empa sahari. Suah mega sida menyanak ngelaung makai, laban nadai utai
diempa. Kategal pendiau ti seruran *ngapung pupu bakanya, nya ti mun ke sida selalu
bekuli ba urang bukai, ngiga pemakai. (*”ngapung pupu” tu jaku kelaung dikena nyebut
urang ti seruran suntuk pemakai)
“Enda pia Indai Duat,” ku Apai Alui, “saritu aku deka ke pasar ngiga jereki.”
“Nama bansa jereki ti deka digiga nuan deh Apai Duat? Gamal ke baka nuan nya, anang
arapka diri bulih utai. Indah urang ke pama agi pendiau ari kitai pedis tulih ke jereki,” ku
Indai Duat bejaku. Laban pendiau ke endang seruran ngapung pupu, Indai Alui endang
nemu Apai Alui nya nadai utai dikarap sereta nadai arah tuju dalam pengidup. Baka jaku
sempama ti nyebut, arapka bubu pesuk, endang nadai jalai tau bulih utai tauka
pengidup ke manah agi.
Apai Alui enda pedulika jaku bini iya Enchelegit. Taja pan pendiau iya bakanya, Apai Alui
tu sigi urang ke bisi pengarap ba diri empu tulihka utai ti manah, seagi-agi iya beseput.
Iya lalu nurun bejalai ke pasar. Nyau kepuas iya ke bejalai kia-kia sebelah pasar ngiga
jereki, enda ga bulih utai ti ku ati. Ensepi diri baka nya, iya pan lalu mulai kediri. Nyadi
lebuh iya bejalai pulai ba rantu jalai, dia iya endang enda ngetu merening utai kiba-
kanan, nyangka bisi utai urang berayan sebelah jalai nya dia. Nyau kepuas iya ti malik
ke kiba malik ke kanan, nya baru iya tepeda ke puchung puang siti, garing-garing ba tisi
jalai. Puchung nya lalu diambi iya, sereta lalu dibai iya pulai ke langkau.
Datai iya dilangkau, “Kati deh Apai Duat, bisi bulih jereki nuan tadi?” ku Indai Alui nanya
iya.
“Bulih, peda nuan jereki aku tu,” ku iya mandang ke puchung puang ngagai Indai Duat.
“Keba nuan tambap,” ku Indai Alui, “Lain jereki ulih urang, lain ga jereki ulih nuan.”
Ninga anu Indai Alui munyi nya, iya endang enda nyaut seleka mukut. “Ukai nya bisi utai
ulih, enti semina besaut ka leka jaku enggau pangan diri,” kenu ku ati Apai Duat dia.
Nurun iya ke tanah lalu ditekung-tekung iya burit puchung nya tadi, peda lalu pechah.
Udah burit nya pechah lalu diansah iya enggau batu ba senentang ti tajam.
“He! he! he!” ku iya ketawa kediri meda gamal butul nya tadi. “Nuan tu meh digela aku
puchung rumpung burit, terupung tenung nasit,” ku iya bejaku kediri. Udah nya lalu
disimpan iya dalam raga sandik iya.
Pagi siti, lebuh urang benung mayuh mansa jalai enda jauh ari langkau sida tiga
menyanak, dia Apai Alui bediri ba tisi jalai, lalu nerupung utai ngena puchung rumpung
burit iya nya. Terupung iya ke kiba, terupung iya ke kanan, ngaga diri baka ke bisi utai
digiga. Sekeda urang ke mansa dia bisi lalu ngerara ulah iya.
“Eh! Nama utai diterupung nuan enggau puchung ngenyai nya, Apai Alui?” ku sida nanya
iya.
“Cheh! Kita berani-rani ngumbai tu puchung jai,” ku iya. “Enti kita nemu, tu meh
terupung diberi antu ke aku, digela puchung rumpung burit, terupung tenung nasit,” ku
Apai Alui nyaut sida.
“Ni kami nemu nya terupung diberi antu ke nuan deh, enti nuan enda madah. Bah,
Nama utai diterupung nuan dia deh aya?” ku sida ga nanya Apai Alui.
“Nya meh, demalam manuk sabung ke dikesayauka aku lenyau, dichuri urang. Aku ke
nerupung tu deka ngiga endur bala penchuri ngelalaika iya,” ku iya nyaut, sambil kitau-
kitau nguwing ka terupung iya kiba-kanan.
Enda lama udah nya, “Nyey! ... Nyin manuk sabung aku ke dichuri urang,” ku iya.
“Dilalai ke penchuri ba baruh jangkar pun kara ke ari atas pasar,” ku iya nunjuk ngagai
tunga pun kara.
“Uji kami ga meda ngena terupung nya, enti amat bisi,” ku siku ari urang ke dia. Disua
ke Apai Alui terupung nya ngagai iya. Lalu diterupung urang nya tadi ngagai tunga pun
kara ti ku Apai Alui nya tadi, nadai ga iya tepeda ke manuk dia.
Gambar 7 - Nerupung ngena puchung rumpung burit
“Bah, nama aku tak nadai meda manuk deh? Pun kara nya deh enda ulih dipeda, anang
ke manuk nya,” ku urang nya bejaku.
“Cheh! Dini kita ulih meda ngena terupung nya, kita ga enda sebulu enggau antu,” pia
ku saut Apai Alui.
Ninga munyi nya, semua urang ke bisi dia, bela sama deka enggau Apai Alui ngabas
manuk sabung iya ke dichuri urang. Nitihka jaku iya, manuk nya ditanchangka urang
baruh pun kara. Datai sida ba pun Kara, amat bisi ga manuk dia, ditanchangka urang ba
urat kara.
“Nyah! Peda kita,” ku iya, “Kumbai kita bula aku tadi. Kedudi hari ila, anang urang
berani deka ngenchuri utai aku, kini-kini pan urang ngelalaika utai aku, temu aku meh.
Kita apin nemu sapa aku. Apai Duat tu!” ku iya nempap dada diri.
“Enti pia, tau meh nuan nujum urang ngenchuri utai,” ku urang bejaku enggau iya dia.
“Nya enda tusah akan. Tak sebarang maya utai kita lenyau tauka dichuri urang, padah
aja ngagai aku, awak ke aku nujum iya. Enda kala lebu enti puchung tu agi ba jari aku,”
ku Apai Alui madahka bala mayuh dia.
Udah nya Apai Alui lalu mupuk mulai kediri ngagai langkau sida menyanak. Sida ti bisi
enggau iya dia tadi lalu nyau mega majak ke pejalai diri. Semanuanya urang
bekenangka pengawa Apai Alui ke tau nyadi Tukang Tujum. Lalu pia mega, sida lalu
nusui pengawa Apai Alui ngagai urang menua bukai ti bisi enggau sida betemu. Enda
lama alai urang menua nya nemu rita Apai Alui ke landik nujum.
Kira dua-tiga hari udah bekau nya tadi, bisi siku urang ke diau semak menua nya, bisi
serabana ke diri lenyau kambin sepuluh iku. Urang ke diau sebelah nya lalu ngasuh iya
minta tulung Apai Alui, ngiga endur urang ngelalaika kambin iya ke lenyau nya.
“Anang tusah kita,” ku sida. “Enti kambin kita dichuri urang, uji padah ke Apai Alui. Iya
pandai amat nerupung sereta nujum utai lenyau,” ku sida. Ninga berita nya, urang ke
bempu kambin pan lalu madahka Apai Alui, ngasuh iya ngiga kambin sida ke lenyau.
Nyadi Apai Alui pan nadai ga beleman nyanggup nulung sida ngiga kambin sida ke
lenyau, enti sida setuju ka upah iya.
“Upah aku ngiga utai kita ke lenyau, enti aku tetemuka,” ku Apai Alui, “siku kambin tiga
ringgit upah. Enti sepuluh iku kambin ditemu magang tiga puluh ringgit upah,” ku iya.
“Enti kita besetuju ke upah nya, nyadi meh aku ngiga,” ku iya. “Enti kita enda besetuju,
enda mega aku nyadi nerupung,” ku iya nganu urang ke empu kambin. Urang ke bempu
kambin nya nadai beleman madahka diri setuju engau penyampau upah ti dipinta Apai
Alui nya tadi.
Ninga saut urang ke bempu kambin udah setuju, dia Apai Alui lalu nyengkau terupong
rumpung burit iya ari raga ke selalu dikena iya mindah ngiga jereki. Iya lalu ngaga diri
malik ngagai matahari idup, udah nya mutar ngagai matahari mati. Mulut iya dipeda
kulap-kulap bejaku, tang enda tentu didinga leka. Udah nya baru iya ngedarka puchung
rumpung burit iya dia. Terupung iya kia-kia, nadai ga tepedaka kambin ke lenyau. Nyau
kelama baru iya nuju ke terupung iya ngagai Pulau Pendam Iban, dinga sida tak
manjung Apai Alui. “Apu! Nyin bala kambin kita, ditanchang ke urang ba tisi Pendam
Iban muak ari ili. Nasit bendar apin ditabanka urang jauh,” ku iya.
Udah nya, sida pen sama lalu ngabas ngagai pendam ti ku iya. Datai din, peda sida
amat, tak nyau tekasak bala kambin sepuluh iku ditanchangka urang ba anak kayu
sebelah tisi pendam. Gaga meh urang ke empu kambin meda bala kambin udah temu.
Sida lalu nyuaka upah ti udah disemaya sida enggau Apai Alui. Sida lalu pulai mai
kambin, lalu Apai Alui pen pulai ga ngagai langkau sida menyanak.
Iya ke pulai tu, kenu ku leka ensera tak nyau betanda iya serantu jalai gagaka diri bulih
duit ngemayuh nya. Datai iya dilangkau. “Nyah! Peda nuan Enchelegit nangga langit,
Enchelegi nangga hari. Peda nuan Indai Duat, Indai Digat,” ku iya, ”Nuan suba ngumbai
aku tambap, ngumbai aku lap, meda aku bulih jereki lain ari enggi urang. Enti nyau suah
agi ila tentu kaya kitai menyanak,” ku iya bejaku enggau Enchelegit. Indai Alui enda
bermunyi ninga iya munyi nya.
Nya meh gaya pengawa Apai Alui ngiga pengidup ke sida menyanak. Udah lepas
pengawa tu tadi, agi suah iya diasuh urang ngiga utai lenyau. Semua utai urang ke
lenyau pan nadai enda temu iya magang. Pia mega pengidup tudah sida menyanak bisi
bendar insur. Semua bala penchuri endang nyau takut bendar ke Apai Alui.
Tang kita ke nembiak, anang saru ke pengawa Apai Alui ti baka nya. Lebuh malam hari
iya berengkah ngenchuri utai urang, lalu dilalaika iya ba sebelah babas, sebelah
kampung enggau sebarang endur bukai. Iya ngelalai ke utai urang ke dichuri iya awakka
nyamai iya nujum ngena terupung rumpung burit. Udah nya lebuh urang ngasuh iya
nujum, dini iya enda nemu endur, ga iya empu ke ngenchuri lalu ngelalaika semua utai
nya.
Nyau kelama udah nya, dia deh bisi siku Raja ke benama Raja Abu ke diau diseberai
tasik besai, ti jauh ari menua Raja Merom. Raja nya lenyau tinchin. Iya sayau amat ke
tinchin iya nya, laban tinchin iya nya bemataka batu gemala. Ari tinchin nya meh
terubah peturun iya nyadi Raja, lalu tinchin nya nyadi ke pesaka besai peturun Raja
menua nya.
Udah tinchin nyau lenyau dichuri urang, dia Raja Abu enda ngetu begigaka urang ke
pandai tenung. Bala beliau enggau manang sama-sama udah nguji mai batu tenung,
batu karas dikena sida nujum urang ke ngenchuri tinchin Raja nya tadi. Siku pen nadai
ari sida nya tetemu ke tinchin Raja Abu nya.
Nyau kelama udah nya, Raja Abu pan bisi ninga rita urang siku ari nengeri Raja Merom
ke pandai amat ngiga barang urang ke lenyau. Ninga rita nya, Raja Abu lalu ngasuh
Jeragan kapal dua iku ngambi tukang tujum nya ari nengeri Raja Merom, ngena kapal
iya ke pemadu besai. Berita Apai Alui ke landik bendar nujum tu endang lama udah
didinga urang ari menua bukai.
Raja Abu amat tusah bendar ati sereta udu ringat meda tinchin iya lalu enda ditemu. Iya
jampat ngeransi lalu mua iya suah berapi-api kenu ku gamal, enti iya ringat bendar.
Bala pemesai nengeri nya enda berani siku bejaku enti maya iya ke ngeransi. Nya
kebuah iya berat bendar ngasuh jeragan dua iku nya, enda tau enda mai Apai Alui datai
ngagai Astana Raja. ”Enti iya enggai datai enggau kita, bunuh iya! Enti iya deka enggau,
tang enda tetemu ke tinching nya, iya mega deka dibunuh! Tang enti iya mujur lalu
tetemuka tinchin nya, aku deka meri iya kapal besai sebuah, diisi penuh enggau barang
reta tengkira, nyadika upah iya. Enti seduai enda mujur mai tukang tujum nya kitu,
seduai pan kena ukum mati enti seduai pulai ila,” ku Raja nya bejaku enggau Jeragan
dua iku nya. Ninga Raja Abu munyi nya, seduai iya pan takut lalu beguai besikap lalu
ngerah bala kelasi, mai sida angkat belayar ngagai menua Raja Merom.
Datai sida ba menua Raja Merom, serta udah sangkai ba pengkalan, sida lalu terus
bedarat nuju langkau Apai Alui. Sida Apai Alui sebilik lalu tekenyit meda bala temuai ti
enda dikelala tak lalu nikika rumah sida menyanak. Enda nganti Apai Alui nanyaka
pejalai, sida lalu nusui pejalai diri ti diasuh Tuan Raja menua sida ngambi Apai Alui
nujum tinchin Raja ti udah lenyau. Jeragan nya lalu nusui jaku Raja Abu pasal ukum
enggau upah ti deka diberi Raja nya ngagai Apai Alui.
Ninga jaku temuai ngemeratnya munyi, tusah deh ati Apai Alui. Nyau sema ka baka
buah ilang ulu tudah Apai Alui, diempa parai apai, enda diempa, parai indai. Iya lalu
madah ke diri enda ulih enggau sida mindah.
Ninga saut Apai Alui munyi nya, sida lalu deka munuh iya. ”Enti nuan enggai enggau
kami, manah agi kami munuh nuan, laban kami mega tentu kena ukum bunuh, enti
kami pulai puang ila,” ku bala Jeragan
Nyau nadai mua agi kenu ku gamal Apai Alui ninga jaku Jeragan dua iku nya tadi, empa
pengesal ati iya din. Tang ati jeragan dua iku nya tadi endang enggai munuh Apai Alui,
laban seduai iya tentu dibunuh Raja Abu enti seduai iya pulai puang ila. Seduai iya pan
sama-sama abis akal, enda nemu daya agi.
“Tu parai aku Indai Duat dibunuh urang. Aku madah ke diri enda ulih enggau sida, deka
dibunuh sida ga aku. Enggau pan aku lagi, enti aku enda tetemuka tinchin Raja, deka
dibunuh Raja ga aku. Dini alai aku tau idup deh?” ku Apai Alui.
“Kasih meh nuan Apai Duat, Apai Digat, dibunuh urang. Sapa ke nupi, sapa ke nengkani,
sapa urang ngidup ke kami dua menyanak ditinggalka nuan parai enggau urang ke
gensarai redak tanchang? Keba aku ngerara nuan suba, enda ngasuh nuan ngereja
pengawa mayuh macham. Nuan endang enda bedulika jaku tagang aku,” ku Indai Alui.
Gambar 8 - Sebuah kapal besai sangkai
Udah nya Apai Alui lalu bejaku kediri enggau Indai Alui. “Aku diatu teulihka runding siti,
enti kapal ke dikena aku nyau nadai dipeda ari tebing, dia seduai Alui lalu nunu langkau
kitai tu. Ari kapal aku lalu ngaga diri nerupung tunga kitu. Aku madahka langkau kitai
angus, tentu sida deka dibai aku nikal, lalu enda nyadi enggau sida,” ku iya.
Udah nya nyau meh Apai Alui belayar dibai Jeragan kapal nuju negeri sida. Iya nyau
nadai dipeda agi tebing, dia Apai Alui ngaga diri nerupung ke tebing.
“Apu! Parai meh bini anak aku din Jeragan,” ku iya. “Peda nya langkau kami menyanak
udah angus empa api. Tu enda tau enda nikal kitai,” ku iya.
Ninga munyi nya, lalu diputarka Jeragan kapal sida, sereta lalu nikal baru ngagai nengeri
Raja Merom ngabas pengamat jaku Apai Alui. Datai ditebing, peda sida Jeragan amat
udah retung langkau sida Apai Alui diempa api. Apai Alui lalu madahka diri enda nyadi
enggau sida mindah, laban nadai ngaga langkau ke sida menyanak. Nyadi Jeragan nya
tadi enda ulih disempia ke iya ngapa. Jeragan dua iku nya lalu ngerah semua bala kelasi,
ngasuh sida ngaga rumah baru ka Apai Alui.
Nama agi deh, dua hari lepas nya lalu tembu deh rumah Apai Alui digaga sida. Rumah
ga besai dua tingkat, semua geladak papan magang, dinding papan, atap tebilian
magang. Baruh rumah disemin magang. Nyau malu semua urang ti diau bekelingi dalam
negeri nya meda pemanah rumah Apai Alui digaga bala kelasi.
Udah tembu rumah, dia Apai Alui lalu dibai urang belayar baru. Nadai akal agi dikena iya
mai sida nikal baru. Iya pen nyau tusah ati baru ngenang diri ti deka dibunuh Raja.
“Manah, besai pan rumah, enti kitai ke bempu lalu mati, nadai meh guna,” ku ati iya
dalam nyin.
Lemai siti, kena iya ngelantangka ati diri, dia iya duduk ba perabung kapal. Mua iya
tunga ke luan. Iya ngaga diri nerupung utai kiba-kanan. Terupung iya kia-kia. Nyau
kelama iya ke bemain enggau terupung iya, dia iya tepedaka burung Lang dua iku
terebai bebintih-bintih tinggi dilangit din. Meda burung nya bebintih iya lalu bejaku gut-
gut kediri.
“Enti enda iya ke burak, iya ke chelum ga alah. Enti enda ke chelum, iya ke burak ga
alah,” ku Apai Alui bejaku.
Iya ke bejaku nya tadi betul-betul ari belakang Jeragan dua iku ke benung ngemudika
kapal sida. Dia Jeragan siku ninga jaku Apai Alui munyi nya, Iya lalu nyitul pangan iya
enggau siku. “Dinga nuan buat, utai ke disebut beliau nya. Enti enda ke chelum, iya ke
burak ga alah,” ku Jeragan nya bejaku.
Jeragan dua iku nya nyau rawan ati ninga jaku Apai Alui munyi nya, laban seduai iya
enda meda burung ke diterupung Apai Alui ari dalam kapal. Nyadi bulu lang siku nya
chelum, lalu bulu iya ke siku agi nya burak. Nya utai ke dirara Apai Alui, enti enda
chelum menang, burak ga menang. Nyadi pekayan jeragan dua iku pan bakanya ga, siku
ngena pekayan chelum, lalu siku ngena pekayan burak, setimbal enggau bulu burung
lang dua iku ke terbai nya tadi.
“Nyah! Dinga nuan buat, udah temu iya tua enchuri tinchin Raja. Manah tua minta
ampun ngagai iya aja, enti enda, tentu tua parai dibunuh Raja,” pia ku jaku jeragan
siku.
“Amat nya. Manah tua meri tinchin nya ngagai Apai Alui. Udah nya tua minta tulung iya
anang ngasuh iya madahka Raja, tua ti udah ngenchuri tinchin nya,” ku saut Jeragan
siku ga. Ninga Jeragan nya bejakui munyi nya, tak lalu diputarka Apai Alui burit
terupung iya nuju jeragan dua iku nya, sereta lalu nyebut enggau nyawa ke inggar amat
munyi tu.
“Ohhhh .... Nya iya, enti enda burak, chelum ga alah, enti enda chelum burak ga alah,”
ku iya.
Nyau asaika dipandam dada seduai iya meda ulah Apai Alui bakanya. Tak enda ulih tat
ke agi ati seduai iya, laban ngumbai Apai Alui udah nemu seduai ti enchuri tinchin Raja.
Dia seduai lalu beguai ngasuh Apai Alui duduk ngimbai seduai iya dia, lalu bejaku
enggau iya.
“Akai rai Aya Beliau, kami duai tu minta ampun sereta minta tulung nuan meh aya
Beliau,” ku seduai iya. “Amat pandai nuan nujum barang urang ke kena churi. Mayuh
bendar beliau enggau manang udah ngiga urang ke ngenchuri tinchin Raja nya, tang
siku pen nadai ga udah tetemuka urang ke ngenchuri nya. Amat kami dua tu meh ke
enchuri tinchin Raja nya. Nya alai kami duai mai nuan bepakat. Anang madahka Raja,
enggaika kami duai dibunuh iya,” pia ku jeragan dua iku nya.
“Nyey ... Aku sigi udah nemu,” ku Apai Alui. “Keba aku lembau dibai seduai betemu
enggau Raja, laban aku nemu, sigi seduai ke enchuri tinchin Raja. Diatu tak semadi
seduai udah mai aku bepakat, nadai ku enggau meh. Kasihka seduai, enggaika dibunuh
Raja,” Ku Apai Alui.
Apai Alui lalu ngajar Jeragan dua iku nya, ngasuh seduai iya ngelalaika tinching nya.
“Tanchang seduai tinchin nya enggau benang mirah. Udah nya benang mirah nya
tanchangka ba urat kayu dalam pegung ari atas padang ba belakang Astana Raja. Atas
pegung ke endur seduai ngelalaika tinchin gaga ke tanda,” ku Apai Alui.
Udah nya lantang meh ati Jeragan dua iku nya, nemu diri enda dibunuh Raja, ninga Apai
Alui deka dibai bepakat. Nyau asaika baru lepas ari nyawa baya kenu ku jaku sempama.
Lemai siti, maia matapanas nyau deka padam sida pan datai ba negeri Raja ke nyau
tinchin. Apai Alui lalu melitka sirat kanggan iya lalu mai terupung puchung rumpung
burit. Raja endang udah nganti Apai Alui ba penyangkai kapal. Datai dia, Apai Alui lalu
dibai Raja terus ngagai Astana. Lemai nya udah tembu makai, mayuh utai dikerandau
enggau Tuan Raja.
“Kati nuan deka ka langkau?” ku Tuan Raja nanya Apai Alui.
“Eh! Enggai aku Tuan Raja,” ku saut Apai Alui, “Besai langkau aku din. Ukai langkau agi
nyau rumah tegap enggi aku nya dia.”
“Ukai rumah ku aku. Kati nuan deka ngirup arak chap langkau?” Ku Raja nya nandu jaku
iya baru.
“Arak deka aku, nya endang utai di irup aku dimenua kami din,” ku iya.
Tuan Raja lalu mai iya ngirup langkau mimit. Lebuh Raja ngenang pasal tincin iya ke
nyau, dia Apai Alui enda ngasuh iya tusah ati. “Pagila aku nerupng tinchin nuan nya, iya
tetap temu aku,” Ku iya.
Nambahka nya, Raja madahka Apai Alui mega, enti iya enda tetemuka tinchin nya, iya
deka dibunuh. Enti iya udah tetemuka tinchin nya, iya deka diberi Raja kapal besai
sereta sarat di isi enggau reta tengkira. Udah nya laban nyau jauh malam sida lalu
tindok.
Pagi siti udah sida dani, Apai Alui lalu dibai Raja makai pagi. Udah badu makai, Apai Alui
lalu pansut ngagai luar Astana, lalu ngaga diri nerupung utai sabelah nya dia. Tujuka iya
ke atas, tujuka iya ke baruh ga terupung rumpung burit iya nya tadi, gilikka iya ga pala
iya. Nyau ke lama udah nya baru iya nerupung tunga ngagai pegung ke ari atas padang
Astana Raja. Tuan raja seruran baka buah kundong mata empa pemedis ati iya meda
tinchin lalu nadai temu, endang ati deka munuh Apai Alui gamal iya.
“Oh! Ampun Tuanku, anang tusah nuan! Nyin tinchin nuan dilalai ke penchuri dalam
pegung datas din, sereta ditanchang ke ngena benang mirah ba urat kayu dalam
pegung,” ku Apai Alui.
Gambar 9 - Tetemuka endur penchuri ngelalaika tinchin Raja
Ninga munyi nya Raja lalu mai Apai Alui enggau bala iya bejalai beguai-guai ngagai
pegung. Datai dia, “Nuan ngumbai tinchin aku dilalaika penchuri dalam pegung tu, ba ni
senentang iya ditanchangka penchuri dalam ai din?” ku Raja nanya Apai Alui. Lebuh ke
bediri ba tisau pegung, Apai Alui endang udah meda tanda ke digaga Jeragan.
“Tu senentang iya Tuan Raja, Asuh soldadu nuan nyelam iya bejimat-jimat enggai ke
kena indik sida. Utai nya alus,” ku iya. Siku soldadu lalu diasuh Raja nyelam. Digama iya
begadai-gadai dalam ai, sepi iya amat bisi utai asai tinchin kena sagam iya,
ditanchangka urang enggau benang mirah dalam ai din. Dibuka soldadu begadai-gadai
tali benang mirah. Udah nya baru iya mai tinchin nya pansut. Peda tak amat tinchin Raja
ke lenyau sereta ditanchang ngena benang mirah, munyi ku padah Apai Alui.
Nyangka tak enda brasai agi pengaga ati Raja, lalu manjong meda tinchin iya udah
ditemu. Enda nemu agi jaku Tuan Raja nya muji Apai Alui. Apai Alui enda bemunyi dipuji
Tuan Raja, samina naka tuchom tekura aja, enggai tak ngayan ka pengaga ati diri ke
bulih reta tengkira ari Raja nya. Raja pan enda ga bula ke samaia lalu di isi iya kapal
besai sebuah enggau reta tengkira enggau macham pesaka ke lama-lama, ke mana-
manah. Pia mega pamayuh duit diberi Tuan Raja nyau sarat kapal. Raja lalu ngasuh
Jeragan enggau kelasi nganjung Apai Alui pulaika menua iya empu ba negeri Raja
Merom.
Datai ba menua diri, dia Alui seduai indai iya Enchelegit Nangga Langit, Enchelegi
nangga hari nyau tekenyit meda reta tengkira, duit mua pemayuh enggau kapal sebuah
ke ulih Apai Alui.
“Enda sangka aku Apai Duat, Apai Digat ke utai tau nyadi baka tu. Dikumbai kami duai
Alui udah mati nuan ngelamatu. Tiap hari kami duai Alui nyabak ke nuan. Enda nemu
nya nuan pulai mai keresa tengkira ngemayuh tu,” ku Indai Alui.
Enda tentu tindok sida menyanak malam nya berundingka pengereja diri baka nya.
Tumu pagi hari siti Apai Alui ngambi terupung puchung rumpung burit lalu dipechahka
iya. Udah nya ditunu iya ba api. “Nuan tu ke nyau deka mai aku mati ngelamatu. Nuan
tu udah aku tunu. Badu meh urang ngambi aku nerupung barang urang ke kena churi.
Diatu aku nyau udah kaya. Manah agi ti kami duai Alui jadi Jeragan bejalai ke kapal,” ku
Apai Alui mutap kadiri. Barengkah ari nya, Apai Alui seduai Alui pan lalu bejalaika kapal
meraka tasik ke begilik linggang Gumbang, bedajaka barang ari menua siti ngagai
menua siti. Lantang meh pengidup sida menyanak nguan menua.
Ensera tu tadi ngajar kitai bakenaka pemintar ngemansangka pendiau diri empu. Kitai
mesti bejimat bejaku tauka ngepun ka kerja, enggai ka kitai kena sintak amba diri
empu. Reti nya, kitai empu tau bulih pemedis ari ulah tauka jaku diri empu. Lalu
nalesaika pengawa tauka mulaika jaku diri empu nya utai ti pemadu iya pedis dikerja,
laban kitai nadai nemu endur nyurukka mua kitai agi, ngenat ka pemalu. Tu mega nyau
deka sama reti enggau jaku sempama, ngambi kayu dikena mangkung pala diri, ngerja
pengawa ti tau mai penusah ka diri empu. Bala anak-anak mesti sikar nalesaika penusah
tauka penanggul dalam pengidup sida awakka pengidup sida tau mansang sereta nyadi
urang ke beguna enti udah besai jemah ila. Pemintar kitai mega mesti dikena enggau
betul enggaika mai penusah ngagai kitai empu. Nya kabuah kitai mesti nemu ngelala,
nemu mida entara ulah ti manah enggau ulah ti enda manah enggaika kitai nyadika
engkeramba urang, lalu urang deka ketawaka ulah kitai ti enda menyana.
Ari ensera tu, kitai tau nemu reti jaku sempama ke nyebut ”baka akal Apai Alui”. Reti
jaku tu, madah ka urang ti ngena akal ti beli, akal ti tuyu tauka akal ti manchal dikena
ngerja pengawa, tang akal nya teulihka asil ti menyana ke tau diguna kitai, lalu pulai ka
pemanah. Nya alai akal tu beguna bendar dikena kitai ngerja pengawa awakka pengawa
kitai mudah diputar lalu mujur dikerja. Endang sigi adat anak mensia, sapa bisi agi akal,
nya meh lebih agi pintar sereta sikar dalam semua pengawa, lalu maju agi pendiau
tauka tebilang agi berita ari urang bukai ke nadai akal. Taja pia, kita enda tau sekali-kali
jai akal lalu semina deka nipu tauka ngemediska urang aja. Kita mesti ngena akal kita
enggau betul sereta lurus.
Gambar 10 - Apai Alui sebilik jadi kaya
4. Indai Alui Abis Garam
Nyadi Apai Alui tu endang urang ke pintar bejaku dalam menua nya. Tang taja iya pintar
baka nya, suah mega iya saru pengawa dikereja tauka saru jaku dipansutka ngagai
urang. Suah mega iya empu ke salah anggap ka tuju jaku orang bukai, laban runding
enggau penemu iya ti nyelai agi ari urang bukai. Kadang-kadang, lain utai disebut urang,
lain ga utai dikerja iya.
Nyadi tumu pagi siti, dia Enchelegit Nangga Langit, Enchelegi Nangga Hari, bini Apai Alui
angkat berapi pagi ke sida sebilik. Lebuh asi udah mansau, dia iya lalu berengkah mela
tubu ke lauk pagi nya. Udah tembu mela tubu, nya baru iya ingatka garam sida udah
abis.
“Oh Apai Duat, abis garam aku tu,” ku iya bejaku kediri berandau nengali. “Nama
penyadi tubu tu nadai garam kena ngulai.”
Ninga indai Alui bejaku kediri, dia deh Apai Alui lalu nanya, “Nama utai dikerandauka
nuan, Enchelegit?”
“Eh! Kitai nadai agi garam. Manah nuan nemuai ngagai sida indai di Panggau minta
garam,” ku Indai Alui.
“Nama guna enggau garam deh?” ku Apai Alui nanya
“Eh! Dikena aku ngerami paku tubu,” pia ku saut Indai Alui.
“Au! Lagi meh aku minta garam,” ku Apai Alui.
”Lalu minta kain ga nuan ba indai din lagi,” ku Enchelegit ngangau ari dapur.
”Kapa nuan kain deh?” ku Apai Alui ga nanya.
”Eh .... kena aku nampal tanah merekah meh, dini nya bisi dikena bukai,” ku Enchelegit
nyaut.
Udah nya angkat iya lalu begari. Pasukka iya baju bisi charik, pasukka tanchut bisi rubik.
Belitka labung gari batik. Tangkin duku jungkang tarik.
Udah tembu begari, lalu nurun meh tudah tuai. Nyadi rumah sida mentua iya numbas ga
penyauh ari nya. Enda tentu berasai iya bejalai lalu datai. Dia iya lalu niki ke rumah
sereta napatka ruai sida mentua iya, lalu terus tama ke bilik. Iya lalu nudukka diri di
bilik.
“Akai rai! Lelak aku tu bejalai,” ku iya nyapa mentua iya.
“Oh! Nama kabuah nuan bangat ngenumu nya deh, Apai Duat? Nama utai dipeguaika
nuan?” ku mentua iya nanya.
“Es! Nadai kebuah bukai, semina diasuh Indai Duat minta garam kena ngerami paku-
tubu enggau kain kena nampal tanah merekah,” ku saut Apai Alui.
“Au, Apai Duat,” pia ku saut mentua iya. Udah nya lalu ditungkuska mentua iya garam
enggau kain kangan siti, lalu disimpan dalam ma Apai Alui. “Nya, Apai Duat udah aku
simpan garam enggau kain ba ma nuan,” ku mentua iya.
“Au, manah meh nya. Enti udah, aku mulaika diri dulu,” ku Apai Alui.
Udah nya iya lalu mulai kediri. Di rantau jalai iya ke mulai kediri, dia iya mansa madang
paku. Lama iya ngenung dia. “Oh, nya madang paku, tentu paku nya diasuh Indai Alui
gerami aku garam,” ku iya bejaku kediri berandau nengali. Iya lalu ngambi upih ari ma
iya, lalu digerami iya madang paku ngena garam nya.
Angkat iya ari nya, lalu datai ba tanjung madang perin rigai, peda iya tubu mayuh
bendar nyumbuk sebelah nya dia.
“Bah! Nya madang tubu! Tentu tubu nya ke diasuh Indai Duat gerami aku ngena
garam,” ku iya bejaku kediri berandau nengali. Iya mega lalu berengkah ngerami tubu
dia datai ke garam iya abis.
“Nya baru tubu tu masin ila, udah digerami enggau garam,” ku iya bejaku kediri, gaga
ati ke pengawa diri udah tembu.
Gambar 11 – Apai Alui Ngerami tubu enggau garam
Udah tembu ngerami paku enggau tubu, iya pan lalu mulai kediri ke rumah iya empu, ari
ili Nanga Panggau. Datai iya ba tebing ai semak rumah sida, dia iya lalu meda tanak bisi
merekah.
“Bah, ditu meh alai ke bisi tanah merekah. Nyangka tanah merekah tu ke deka ditampal
Indai Duat,” ku iya bejaku kediri. Nama agi deh, lalu dicharikka iya kain kangan tadi lalu
ditampal ka iya ngagai tanah ke bisi merekah sebelah nya dia.
“Nyah, ukai nya pedis nampal tanah merekah. Nya baru nadai meda tanah merekah
agi,” ku Apai Alui gaga ati bejaku kediri, meda pengawa iya udah tembu.
Datai iya di rumah sida empu, hari pan nya deka tengah hari. Sereta datai iya lalu tama
ke bilik. Ma iya lalu diengkah iya ba tempuan, disandihka iya ba dinding. Meda iya datai
lalu beguai meh Indai Alui nyerungkai ma iya, peda iya upih sarang garam udah puang,
semina mimit aja garam bisi lekat ba selepak upih nya. Kain pan semina chebik mit ke
agi tinggal.
“Ni garam enggau kain dibai nuan deh, Apai Duat?” ku Enchelegit.
“Nama utai ditanyaka nuan! Bisi aku bulih garam diberi ibu tadi, tang udah abis dikena
aku ngerami paku tubu di rantau jalai. Kain pan udah ga dikena aku nampal tanah
merekah dia tadi. Aku ga nitihka jaku nuan. Nuan madahka garam nya kena ngerami
paku tubu, kain kena nampal tanah merekah,” pia ku saut Apai Alui.
“Kasih-kasih meh nuan nya deh Apai Duat, enda nemu reti jaku. Ukai nya dikena
ngerami paku tubu dalam babas ku aku. Dikena ngerami engkayu kitai di rumah. Kain
nya ga deka dikena aku nganti kain aku ke udah charik tu, ukai tanah merekah ke
ditanah din. Amat tambab meh nuan Apai Duat, lansang ka lubang, alit lubang burit,” ku
Enchelegit nganu Apai Alui.
“Nuan ngumbai aku tambap, aku enda tambap. Nuan ke tambap enda nemu bejaku.
Nuan ngasuh aku minta garam ngagai sida indai nuan di Panggau kena ngerami paku
tubu ku nuan. Nya alai paku tubu ga digerami aku ngena garam. Tu dikena ngerami
daun kayu ga ku nuan. Dini agi bisi garam kena ngerami utai ngemayuh nya?” ku Apai
Alui.
Enchelegit lalu ketawa rakah-rakah berundingka jaku Apai Alui. “Patut nuan tu tambap
lap, enda nemu reti jaku urang,” ku ati Indai Alui dalam nyin. Udah nya sida sebilik sama
makai merarau belauk tubu tabar.
Ensera tu tau ngajar kitai merati sereta meretika tuju jaku ti dipadah tauka disebut
urang ngagai sida. Sida enda tau enda belajar ka jaku kelaung tauka jaku silup, awakka
mereti ka jaku urang. Ari nya tadi, sida tau ngansah runding sida awakka tajam ati
nangkap jaku enggau semua utai ti diajar bala pengajar enggau apai indai sida. Tambah
mega, jaku silup tu tau dikena kitai mandangka penyiru basa enggau jaku kitai enti
berandau enggau urang. Munyi ku sempama jaku Iban, dikelala bungai ari kayu, dikelala
buah ari langgu, dikelala basa ari penyiru, dikelala bansa ari jaku.
5. Apai Alui Besilih Rumah Enggau Apai Sumang-umang
Nyadi sekali Apai Alui ngaga rumah limas sebuah. Semua tiang rumah iya digaga ari
kayu tebelian magang, lalu ramu bukai bisi mega kayu ke lembut agi, tang iya bansa
kayu ke teguh lalu enda mudah buruk tauka diempa bubuk.
Lebuh semua ramu udah chukup nuntung magang ba endur ke deka alai berumah, dia
Apai Alui lalu nyediaka diri deka ngentak. Nyadi endur ke deka ngaga rumah baru nya,
enda jauh ari ili rumah iya ke diatu. Lalu nama endur nya dikumbai Emperan Embawang.
Kebuah alai dikumbai Emperan Embawang laban dia mayuh kayu embawang tanam Aya
Bujang Tuai seduai Apai Keling menya. Enti sema maya buah, Apai Alui sebilik enda jauh
ngumpul buah ke labuh.
Lebuh ke ngentak nya, Apai Alui minta tulung sida Tutung enggau Ngelai ari Gelong
enggau bala sida Keling ari Panggau. Nama enda agi deh, urang Panggau enggau urang
Gelong endang sigi kering tulang. Enda lama alai rumah Apai Alui nya bediri, tembu
terus ka perabung. Udah nya Apai Alui sebilik empu besaup ngaga rumah nya datai ke
tembu. Pengelama sida menyanak nembuka rumah nya kira tiga bulan.
Nyadi lebuh ke deka berumah tu, Apai Alui seduai Apai Sumang-Umang endang udah
bisi aum sama deka berumah laban rumah sida iya udah kelalu lama lalu patut diganti
baru. Apai Sumang-Umang dudi agi ngentak ari Apai Alui. Iya ngaga rumah enda
nampung Apai Alui tang enda berapa jauh ari nya, didinga kukuk manuk. Lalu endur
Apai Sumang-Umang berumah iya nya dikumbai Munggu Lensat laban mayuh lensat
tumbuh dia. Lensat nya tumbuh ari leka lensat ke ditikauka urang Panggau enggau
Urang Gelong lebuh ke bisi ngetu mansa menua nya, pulai sida ke ngembuah lensat.
Nyadi ramu rumah Apai Sumang-Umang tu digaga ari buluh, lalu betiangka buluh payan
magang. Semua gelegar enggau dinding, digaga ari buluh magang. Kira sebulan
pengelama Apai Sumang-Umang ngaga rumah alai iya tembu.
Nyadi lebuh rumah seduai sama udah tembu dia seduai sama bebai pindah, taja pen
rumah seduai enda betampung tang seduai deka pindah sama sereta hari lalu ngintai
maya bulan agi mansang tauka maya anak bulan. Apin seduai iya pindah, seduai dulu
ngiga burung ke manah kena pindah.
Udah tembu pengawa nya, Apai Alui pan pindah ngagai rumah baru iya di Tembawai
Embawang. Pia mega Apai Sumang-Umang lalu pindah ngagai rumah baru iya di Munggu
Lensat.
Kira sebulan Apai Alui udah pindah ngagai rumah baru alai iya lalu nirika gawai
Pangkung Tiang. Tang apin iya menyadi gawai dulu iya nanya Apai Sumang-Umang. Pagi
siti Apai Alui lalu nemuai ngagai Apai Sumang-Umang. Lebuh iya datai ba kaki tangga
iya lalu ngangau.
“Oh, akan! Jadi rumah nuan?” ku iya.
“Jadi,” ku saut Apai Sumang-Umang. “Niki meh, lalu, duduk kitu.” Apai Sumang-Umang
lalu nganchau tikai. Apai Alui mega lalu duduk.
“Nama pejalai nuan deh, akan, beguai tauka pejalai lantang?” ku tanya Apai Sumang-
Umang.
“Au meh, akan, aruh iya nuan nanya pejalai. Ni tau nadai kebuah, iya ke sama tuai baka
kitai tu,” pia ku Apai Alui. “Aku bejalai nemuai ngagai nuan, ensepi diri baru datai ba
rumah baru. Nya alai aku madahka diri deka begawai Pangkung Tiang lalu enggau Gawai
Namaka Tuah. Nyadi ati aku deka mai kitai sama begawai, kitai patut minta ngagai
Petara awakka kitai gerai nyamai lalu rumah pan likun ga alai diau.”
“Manah runding nuan nya, akan. Aku pan bisi ga ati deka begawai, tang rumah aku diatu
apin tentu tembu, agi mayuh utai deka dikerja kena ngelagu rumah. Tak lalu enda
mudah tembu-tembu. Enti nadai penanggul, tak dulu meh nuan begawai,” pia ku saut
Apai Sumang-Umang.
”Nadai ku meh akan, enti enda ulih sereta. Utai baka nya nitih ka pengelantang siku-
siku. Ukai nya baka ke ngerumban adan,” ku Apai Alui nyaut.
Udah tembu randau nya, Apai Alui mega lalu mulaika diri ngagai rumah iya di Emperan
Embawang. Udah nya iya lalu nengkiraka diri deka nirika Gawai Pangkung Tiang.
Lebuh gawai nya, iya ngambi lemambang ari Panggau, betuaika Balu Jantau seduai
Engkarung Ridan. Apai Sumang-Umang pan sama diambi ngabang, pia mega urang ari
Panggau enggau ari Gelong, laban urang deka meda penegap rumah Apai Alui ke digaga
ari kayu tebelian.
Tembu gawai Pangkung Tiang pagi nya, lalu ditampung Gawai Namaka Tuah iya nya
ngangauka Raja Tuah ke dikumbai Gangga Ganggai ari tasik besai linggang gumbang.
Tembu Gawai Namaka Tuah, semua pengabang sama-sama mulaika diri. Lantang meh
ati Apai Alui, laban ke udah tembu pengawa bakanya. Bala pengabang pan bela sama
muji pemanah rumah Apai Alui.
Sereta Apai Sumang-Umang udah tembu pindah ngagai rumah baru, iya lalu nebuk
semua tiang reraga tanju, kasau, pagar manuk, pagar babi semua digagaka lubang
magang, baka lubang kesuling. Lalu di tanju digagaka iya ayam ribut lalu tiang ayam
ribut nya pan lalu digagaka iya lubang. Semua lubang enda sebaka bisi besai, bisi mega
mit, nya alai lebuh hari ribut, rumah Apai Sumang-Umang nya rami bendar, laban tau
bemunyi baka kesuling ke disepu urang tubuh sepuluh iku sama sereta.
Lebuh samua utai nya udah tembu, nya baru Apai Sumang-Umang nirika Gawai
Pangkung Tiang enggau Gawai Namaka Tuah. Nyadi gawai Apai Sumang-Umang nya
enda dipengapka lemambang tang samina nyampi aja, ngangau ke petara tuah, petara
limpah. Lebuh gawai nya Apai Alui mega bisi diambi Apai Sumang-Umang ngabang,
urang bukai nadai dipadahka iya.
Lebuh Apai Alui datai ba rumah Apai Sumang-Umang, iya lalu terus nikika rumah. “Oh,
lalu akan, lalu,” ku Apai Sumang-Umang.
Enda lama udah nya Apai Sumang-Umang lalu mantaika mayuh macham utai diempa.
Pia mega Indai Sumang-Umang di bilik din sama mantaika macham utai diempa, baka
penganan, letup enggau utai bukai.
Lebuh ti makai utai nya dia, Apai Alui lalu nanya ke pengabang bukai. Ku iya nanya,
“Katika sida di Panggau enggau sida di Gelong bisi diambi nuan ngabang?”
“Eh! Mayuh urang dipadahka aku, tang sida madahka diri enda ulih ngabang laban bisi
penanggul ke berat,” pia ku saut Apai Sumang-Umang. Tang iya ke bendar, Apai
Sumang-Umang nya takut ke rumah diri runtuh ditepan bala mayuh laban ramu rumah
iya digaga ari buluh magang.
Udah badu makai utai nya tadi dia Apai Alui seduai Apai Sumang-Umang lalu berandau
enggau pangan diri, lalu lebuh nya mega hari bisi beribut. Sereta ribut datai dia rumah
Apai Sumang-Umang lalu bemunyi munyi kesuling. Ninga rumah tau bemunyi ngemanah
nya, dia Apai Alui lalu lama ngenung. Dinga iya ke tanju bisi ga bemunyi, di baruh
rumah pan bisi ga bemunyi, pagar babi sama bisi munyi kesuling. Ninga nya seruran
bemunyi nadai ngetu dia Apai Alui lalu nanya.
Gambar 12 - Ningaka munyi kesuling Antu Ribut ba rumah Apai Sumang-Umang
Ku iya, “Sapa urang nebah kesuling ngemanah nya, akan?”
“Eh deh akan,” ku Apai Sumang-Umang nyaut, “Bunsu ribut ke nebah nya tang iya enda
dipeda kitai laban iya nya antu. Nya kebuah aku enggai ngambi Lemambang mengap,
enggaika bunyi kesuling enda didinga alah laban nyawa Lemambang ke mengap. Enti
aku ngambi lemambang mengap, Bunsu Ribut nya ga diasuh sida nganggau ka Petara ke
langit kin. Nya alai, manah agi aku tak mai Bunsu Ribut diau enggau aku ditu, awak ka
bisi urang nebah kesuling aku.”
Ninga utai munyi nya, Apai Alui lalu bejaku, “Tuai ga umur aku tu udah tang aku nadai
kala ninga rumah tau nyepu kesuling baka rumah nuan tu, akan, lalu kesuling nya pan
nadai ga dipeda.”
Udah nya Apai Alui lalu nanya, ku iya, “Deka nuan nyual utai ke bemunyi nya awakka
aku engkah iya ba rumah aku din.”
“Oh!” ku Apai Sumang-Umang. “Utai nya enggai nyadi dijual, laban nya udah disimpan
dalam tiang din. Nambahka nya urang bukai nadai ulih nyepu kesuling ngemayuh nya
sereta sekali, semina Bunsu Ribut aja ti tau. Lalu aku enda nemu berapa kini rega ribut
nya enti iya dijual. Laban Semina Petara aja, enti iya deka, bisi kuasa tau nyual ribut,”
ku Apai Sumang-umang.
“Enti iya enda tau dijual, manah tua besilih rumah, rumah nuan pulaika aku, lalu rumah
aku pulaika nuan,” pia ku jaku Apai Alui.
”Ish! Ish! Ish!” ku Apai Sumang-Umang nyaut, ”Dini aku tau beduan nuan bakanya.
Rumah nuan meh limas sereta tegap agi. Enggi aku tu langkau ngarau. Aku tu ngicha ka
bala Petara bisi datai ninga Antu Ribut bemain kesuling. Ni nemu, engka aku tau bisi
nasib diberi Petara. Enda ga tak umang pendiau bakatu,” ku Apai Sumang-Umang
nampong jaku iya tadi.
Apai Alui pan nyau kasak-kasak enda tentu jenuh duduk ninga jaku Apai Sumang-
Umang munyi nya, laban ati iya endang deka bendar bempu rumah Apai Sumang-
Umang.
Apai Sumang-Umang endang keran ngaga diri enggai besilih, laban ngaga rumah ke tau
bemunyi baka nya enda mudah enti enda ditulong bunsu antu, ku iya. Apai Alui nyau
bebendar ngumbuk Apai Sumang-Umang selemai-lemai nya.
”Eh, nadai nya bemacham iga akan,” ku Apai Alui bejaku. ”Enti bala Petara tak bisi niki
kitu, ukai nya baka ke jauh ga aku ngangau ka nuan kitu ka deh, akan,” ku Apai Alui
ngumbuk Apai Sumang-Umang. Ati Apai Sumang-Umang ke bendar endang deka besilih,
tang iya ke madahka diri enggai nya endang semina ngaga diri aja.
Nyau kelama iya, Apai Sumang-Umang pen deka dibai Apai Alui besilih rumah. Lalu ku
Apai Sumang-Umang, “Aku sayau bendar ke rumah tu, tang semadi nuan meh akan,
kitai ga ukai urang bukai.”
Malam nya seduai mutuska jaku lalu tetap besilih rumah. Tiga hari udah nya sida sama
berangkutka reta-tengkira. Apai Alui enggau sida sebilik ngangkut barang sida ngagai
rumah Apai Sumang-Umang, pia mega sida Apai Sumang-Umang sebilik ngangkut nak
barang sida ngagai rumah limas Apai Alui. Lebuh semua perengka udah abis diangkut,
nyengkaum bala babi enggau manuk, sida lalu sama pindah.
Apai Sumang-Umang gaga bendar ati bempu rumah ke manah sereta tegap. Apai Alui
pen gaga mega ati laban rindu ninga tiang buluh ke bemunyi dipuputka ribut. Lalu lebuh
maya hari ribut Apai Alui endang enggai nurun gawa, laban rindu ninga rumah nya ke
munyi kesuling.
“Sehari tu kitai menyanak anang nurun gawa, manah kitai diau, seraya ke ningaka
kesuling disepu Bunsu Ribut,” pia ku jaku Apai Alui. Nya alai hari nya sida sebilik sama
diau di rumah.
Kira dua taun bumai udah nya rumah Apai Alui lalu chundung laban tiang payan nyau
mansang buruk. Antara dua tiga bulan udah nya, rumah Apai Alui lalu tumbang, lalu sida
sebilik nadai agi rumah alai diau. Nya alai sida Apai Alui lalu pulai ngagai langkau umai,
lalu dia mega alai sida diau nganti ke bisi awak alai ngaga rumah baru.
Ari langkau umai nya, Apai Alui enggau sida sebilik mupuk beramu baru laban deka
ngaga rumah baru, nambak endur rumah buluh ti udah rebah nya tadi. Rumah nya
digaga ari kayu ti teguh. Apai Sumang-Umang endang nadai pengirau ati laban rumah
iya endang manah sereta tegap.
Munyi ku jaku sempama, ngambi kayu dikena mangkung pala diri empu. Ensera tu
ngajar kitai berunding sebedau kitai ngereja pengawa ti tau ngasuh kitai nesal kedudi
hari ila. Kitai enda tau enda kering ati ngalahka penguji tu tau ngelimpangka runding
kitai ngagai jalai ti enda betul. Kitai enda patut mudah diumba sereta makai puji urang
enggau jaku ti manis, tauka diemba urang enggau jaku ti ngenakutka kitai. Enti kitai
enda nemu mutuska runding diri, kitai tau betanyaka runding ngagai bini-anak enggau
kaban kitai ke bukai, enggaika utai ti deka dikerja kitai nya pulai ka pengerugi diri empu.
Gambar 13 - Rumah Apai Alui runtuh laban kabut
6. Apai Alui Nyumpit
Nyadi Apai Alui tu selalu bendar ngulihka burung ngena sumpit. lya ke nyumpit nya enda
ngena ipuh, tang semina laja aja, laban iya enggaika burung nya lalu terus mati.
Gambar 14 – Apai Alui Nurun Nyumpit
Nyadi sekali, lebuh nya maya buah kara nyau mansau di menua nya, dia iya lalu nurun
nyumpit. Endur ke digagai iya nyumpit nya jauh ke dalam kampung puang nadai didinga
kesuong nyumbuh Bujang. Datai iya dalam kampung, dia iya meda mayuh bendar
puchuk kara benung bebuah mansau bendar, lalu burung pen mayuh mega datai makai
buah kara. Sida burung sempidan, sengayan pen mayuh mega ngair sebelah pun kara,
makai buah kara ke labuhka tanah laban burung bukai.
Dia Apai Alui lalu berengkah nyumpit. Tang laban iya nadai mai sarang kena mai burung,
nya alai iya lalu nanchang kaki burung enggau tali, lalu ditanchangka iya ba punggung.
Burung ke besai pen mayuh mega ulih iya, baka kenyali, tekalau, bruie, kejakuh,
emperegam enggau burung bukai mega, datai ke tubuh iya nyau penuh laban burung ke
ditanchangka iya. Meda burung ulih iya bangat ngemayuh nya, Apai Alui lalu enggai
badu-badu nyumpit. Lebuh semua burung ke ditanchang iya ba punggung sereta
engkebapka sayap magang, dia Apai Alui ensepi tubuh diri tak begantung ba tanah.
Burung nya tadi lalu nabanka Apai Alui terebai ngelui puchuk kayu. Lama agi tinggi agi
ga Apai Alui dibai burung nya terebai. Naka deh pengaga ati Apai Alui meda rampa
menua ari atas langit din. ”Nyangka tu meh asai bala Petara ke nurun ngabang ari
langit,” ku Apai Alui bejaku kediri.
Tang nyau kelama burung pen mayuh mega lepas sereta nyau lelak laban pemerat Apai
Alui. Sida pen nyau mansang baruh sebaruh terebai. Lebuh sida mansa ba senentang
rumah urang Panggau Libau, Apai Alui pan lalu ngalepaska semua burung ke ulih iya nya
tadi. Iya pan lalu labuh ke baruh ninggang tugung padi ba tanju sida Keling. Kumang ke
benung nyembui padi dia pan lalu tekenyit meda anak mensia tak meredup munyi
punggu ninggang bandir, labuh ari Langit. Laban ti kelalu kesal dijungkal karung dada,
dia iya tak enda berasai lalu engkechit ke dalam rumah lalu megau sida serumah.
Semua sida serumah pen lalu datai begau kia magang, lelaki, indu enggau anembiak
meda Kumang nyau kasak-kasak baka ukui ke nyau anak. Sida ke begau nya tadi lalu
pansut ke tanju lalu nanya anak temuai, “Sapa nuan tu tak terjun ari Langit? Anak
Petara nuan tu?” ku sida nanya Apai Alui ke agi ngerising nyintak seput ngenatka
pemedis tubuh diri.
Nyawa Apai Alui pen nyau rapas ke nyaut, “Iya meh nya, anak Petara meh aku tu, labuh
ari langit.”
Ninga iya madahka diri anak Petara, urang lalu beguai nanggung iya ke dalam rumah.
Udah nya Kumang lalu beranchau tikai dipanggau enggau di ruai. Kumang lalu beguai ga
ngambi pua kumbu dikena mungkur iya lalu ngaga kandang endur iya gali ba panggau
sida keling, enggaika iya diperaka bala anembiak ke datai begau kia.
Genap iku urang ke datai dia sampal nanya iya magang, “Amat anak Petara nuan tu?”
ku sida iya agi itukka penatai iya nya tadi.
“Au ah ... anak Petara meh aku tu!” ku iya ga nyapa ari dalam kandang.
”Eh ... badu agi kita nanya iya, awakka iya ngenatka diri dulu,” ku Kumang ngerara bala
urang ke begau kia.
Lemai nya Keling lalu mai sida serumah nya baum. Sereta udah tembu makai lemai nya,
iya lalu ngasuh bala anembiak lelaki bepadah niti rumah. Bala anembiak nya lalu berebut
betesau ngagai tiap-tiap pintu niti rumah Panjai sida Panggau Libau.
“Aya Keling ngasuh kitai serumah tu angkat ngagai ruai iya,” pia ku sida anembiak nya
ngerah sida serumah.
Enda lama udah nya semua urang lalu angkat ngagai ruai Keling. Lebuh semua urang
udah duduk, Keling lalu bejaku, “Aku ngumbai kitai serumah tu, laban bisi kebuah ke
besai. Aku nanyaka runding kitai mayuh pasal anak Petara ke bisi nurun ari langit.”
Sempurai lalu nyaut, “Uji kitai agi nanya iya, awakka nentuka anak sapa iya nya.”
Kumang lalu nguing nanya anak temuai, “Kati nuan tu Dom, amat anak Petara nurun ari
langit?” ku Kumang nanya.
“Iya meh nya, anak Petara meh aku tu,” ku iya nyaut, nitihka tanya urang.
Gambar 15 – Apai Alui Ditabanka burong terebai
Udah sida sampal ninga iya nyaut, madahka diri anak Petara, Keling lalu bejaku, “Dalam
runding aku, manah kitai ningaka runding aya kitai Nawang Gundai.”
Nawang Gundai lalu bejaku. Ku iya, “Iya tu anak Petara. Iya datai ngagai kitai, nurun ari
langit. Kenyau ari menya, aku nadai kala ninga tauka meda anak Petara. Nya alai dalam
runding aku, iya tu patut disambut enggau gawai. Tu meh baru kitai meda Petara datai
segendai ke dalam dunya tu.”
Ninga jaku Nawang Gundai munyi nya, semua urang lalu setuju deka begawai kena
nyambut penatai anak Petara. Malam nya semua sida serumah nadai tinduk laban ngulu
anak Petara ke bebungkur pua kumbu ba panggau sida Keling.
Tumu pagi siti semua indu sida di Panggau lalu betutuk tepung enggau nyendiaka
perengka piring ke bukai. Semua urang ke lelaki pan sama kiruh nyendiaka gawai laban
udah diputuska dalam aum, timpuh gawai nya nyadi. Tiga hari puang ke empat gawai
nyadi. Semua pengabang dipinta datai magang lebuh nya. Sempurai ngambi ngabang
ngagai rumah urang Gelong, lalu sida ke bukai ngambi ngabang ngagai rumah bukai.
Lebuh maya hari gawai nyadi, pengabang mayuh bendar datai, laban urang bela deka
medaka gamal anak Petara. Nyadi endur urang ngengkahka anak Petara nya ba panggau
sida Keling. Ngelingi iya ke gali diredaika pua kumbu. Piring turun sembilan, diengkah
ngelingi iya ke gali. Tang bisi ga sekeda pengabang bejaku enggau diri sama diri. Ku
sida, “Jai bendar gamal anak Petara nya. Nadai patut anak Petara baka nya gamal. Iya
ga tuai, pala ga lasu, idung ga binsang lalu bisi litan ba kening.”
Nyadi lebuh gawai nya sida Indai Alui bisi enggau ngabang. Udah badu merarau, dia deh
Alui bisi nilikka dalam kandang alai anak Petara ke gali. Dia iya meda urang nya tak ukai
anak Petara, tang apai iya empu. Alui lalu madah ngagai indai iya.
“O, Indai,” ku Alui bejaku, “peda aku anak Petara nya tak sebaka bendar gamal enggau
apai.”
“Eh! Nuan tu, tak sebarang utai sebut,” ku indai iya nyaut, “ukai nya apai nuan. Apai
nuan lama udah parai. Nama nuan enda ingat lebuh iya ke nurun nyumpit, tak lalu enda
pulai-pulai.”
”Enda Indai deh, tak apai ke gali dalam kandang nya peda aku,” ku Alui ga nyaut indai
iya. Ninga Alui tak keras bendar madahka nya apai iya, enda liat agi ati Indai Alui, iya
lalu nilik ngagai kandang endur anak Petara ke gali.
Lebuh Indai Alui ke nilik iya, dia Apai Alui lalu meda Indai Alui, iya lalu bejaku, “O, Indai
Duat, idup aku, enda parai. Enti nuan pulai lagi nganti aku,” ku Apai Alui bejaku.
Ninga nya, urang mayuh lalu begau kia ka. Nya baru sida nemu nya ukai anak Petara,
tang Apai Alui. Udah nya semua pengabang lalu pulai, laban udah nemu iya nya ukai
anak Petara, tang Apai Alui.
Udah nya Sempurai, laban ke endang urang mangah, lalu nanggung Apai Alui lalu dibuai
iya ka ujung tanju. Pedis bendar tudah Apai Alui, pala iya ga telih, tubuh iya ga mega,
kaki iya ga kembai. Nya meh iya, nyabak enggau naka iya, ngenatka pemedis diri. Iya
lalu minta ambi anak iya Alui.
“Ambi aku tu ... oooh Alui. Mati aku tu Alui, Alui, enti nuan enda ngambi aku,” ku iya
nyabak dia.
Tekala nya Alui lalu ngambi apai iya lalu mai iya pulai sereta sida. Datai di rumah sida
lalu ngubat abi telih iya. Indai Alui mega lantang ati, laban Apai Alui ke udah dikumbai
mati udah pulai idup baru. Pia mega bala anak iya gaga meda apai sida udah pulai.
Ensera tu ngajar kitai enda tau ngemula sereta beduan urang bukai. Enti kitai ditemu
urang bula, kitai tau nyadi malu lalu urang enda arapka kitai agi dalam pengawa bukai.
Enti kitai selalu beduan urang bukai, urang mega enda tentu deka begulai enggau kitai.
Tu tau ngenusahka pendiau kitai enti kitai nadai kaban belayan ke deka nulung kitai
lebuh maya kitai tusah. Nya alai, pandai-pandai meh kita begulai sereta begaul enggau
diri sama diri tauka urang bukai ke besaruk pendiau enggau kitai.
7. Apai Alui Nan Abau
Nyadi abau tu sebengkah ari perengka ti dikena kitai nangkap ikan ba sungai. Abau tu
digaga ari buluh baka bubu, tang abau tu jauh besai agi ari bubu. Enti ikan udah tama
ke dalam abau, iya enda ulih pansut agi.
Gambar 16 – Alui seduai apai iya nurun nanka abau
Pagi siti Alui seduai apai iya nurun nan abau. Seduai iya nan abau enda bangat jauh ari
ulu rumah sida. Seduai iya merau. Lebuh seduai iya datai ba wung siti ke enda berapa
tinggi lalu ai pen enda berapa deras, seduai iya lalu ngaga tampun dia. Lebuh tampun
udah tembu, seduai lalu nan abau seduai iya dia, udah nya seduai lalu mulaika diri ke
rumah.
Tumu pagi siti seduai lalu nurun ngabas abau. Lebuh seduai datai semak tampun, Apai
Alui lalu terjun ngabas abau iya. Lebuh iya ngangkat ka abau iya, Alui ke bediri ba perau
lalu bisi tepeda ka lelabi siku dalam abau ke dipegai apai iya. Alui lalu bejaku. “Oh! Bulih
abau tua apai.” Ninga nya, Apai Alui lalu malik ngagai Alui.
“Eh! Nadai Bulih abau tua nya.”
“Bisi apai,” ku Alui nyaut, “Bulih lelabi abau tua.”
“Eh, ukai nya lelabi, daun engkubung nya,” ku iya nyaut Alui. Iya lalu ngadu ka abau nya
ba tampun nya baru. Udah tembu abau nya diaduka iya, seduai lalu mulai ka diri. ”Aram
pulai tua,” ku Apai Alui.
Lebuh seduai iya mulaika dirika rumah, Apai Alui lalu ngeluluka diri sakit. Iya lalu ngaga
diri getar-getar chelap isi ba perau dia.
Gambar 17 – Apai Alui ngabas abau
“Jampatka tua pulai Alui, tak lain asai isi aku tu,” ku iya madah ngagai Alui. Alui pan lalu
bekayuh naka ulih iya, beguai nabanka apai iya pulai ke rumah. Datai di pengkalan
seduai iya lalu niki ke rumah. Datai di rumah Apai Alui ngeluluka diri balat agi ga sakit.
“Kati abau seduai bisi bulih?” ku Indai Alui nanya.
“Nama utai ulih, balat bendar reba,” ku Apai Alui nyaut, “Mua abau nyau alit laban daun
engkubung.”
Nyadi lebuh Alui seduai Apai iya ke pulai, duku Apai Alui ditinggalka iya ba tisau jalai
pendai. Nyau lama iya udah datai di rumah dia Apai Alui lalu madahka diri deka bira,
laban perut iya balat endar pedis. Iya mega lalu nurun bira. Pulai iya bira, dia iya
madahka diri udah bisi nyamai agi. “Tang aku agi natka diri dirumah. Kita bukai nurun
dulu ke umai magang, laban padi kitai agi bisi rumput apin abis dibantun,” pia ku iya
bejaku.
Udah kemas perengka enggau bekal, Indai Alui enggau bala anak iya pen lalu nurun ga
ke umai. Apin lama sida udah nurun, Apai Alui pan lalu beguai ga nurun ngagai tampun
abau iya tadi. Tang iya enda merau. Iya bedarat nengah jalai ke muntang. Abau iya
amat bulih lelabi, tang daun enkubung padahka iya ngagai Alui.
Datai iya ba tampun, iya lalu munuh lelabi nya. Udah nya iya lalu netak lelabi ke lalu
disimpan dalam buluh. Tembu nya iya lalu menyadika api, alai iya mansuh lelabi.
Kira maya tengah hari sida Indai Alui pan pulai ga ari umai. Datai di rumah nemu Apai
Alui nadai dia.
“Kati amat nadai bulih abau seduai tadi, Alui?” ku Indai Alui nanya.
“Eh?,” ku Alui, “abau bisi bulih lelabi, tang apai madahka nya ukai lelabi, daun
engkubung ku apai. Peda aku tak amat lelabi nya tadi.”
“Aram tua nurun kin. Tentu apai nuan bisi ba semak tampun din,” ku Indai Alui.
Udah nya Alui seduai indai iya lalu nurun mai ma. Apin seduai datai ba semak tampun
abau, seduai bisi meda asap.
“Ah!” ku Indai Alui, “Enda bula sangka aku, nyin asap apai nuan. Anang inggar tua.”
Seduai iya lalu bejalai begadai-gadai, lalu belalai ba pun rian semak endur Apai Alui ke
mansuh lelabi, tang iya empu nadai dia. Iya udah mandi ba lubuk ari ulu nya mimit. Dia
Alui seduai indai lalu nuang semua lelabi dalam ruas nya ke dalam ma, lalu diganti
seduai enggau keresik pasir.
Udah tembu nyimpan semua lelabi ke dalam ma, Alui seduai indai iya lalu beguai pulai
ke rumah. Enda lama udah nya, Apai Alui pan badu ga mandi, lalu pulai ngagai endur iya
ke mansuh lelabi.
“Tu lagi baru kenyang perut tu,” ku iya bejaku kediri. “Nadai urang nemu aku makai
lelabi ditu.”
Iya ketawa inggar endar laban ati iya lantang ngadang diri kenyang makai lelabi. Sereta
iya datai dia, iya lalu nuangka lelabi nya ke atas daun ke udah dianchau iya manah-
manah ba atas tanah. Peda iya ukai kerat lelabi pansut ari ruas nya, tang keresik
bechampur enggau daun kayu. Udah nya ia lalu nuangka semua ruas, tang siti pan nadai
ga nemu kerat lelabi dalam nyin. Semua putung nya penuh laban keresik enggau daun
magang.
“Oh!,” ku Apai Alui. “Nyelai bendar lelabi tu tau bebali nyadi keresik. Nadai utai bukai
tentu lelabi tu udah diempa antu. Enda aku berani diau ditu agi, enti antu nya datai
tentu iya deka makai aku. Nasit ga aku nadai ditu lebuh antu datai lalu makai semua
lelabi aku tadi,” ku iya bejaku kediri berandau nengali.
Udah nya iya lalu beguai-guai ngerarika diri, sampai ke duku enggau labung iya pen
enda meh iya ingat mai pulai. Iya lalu belanda naka penegar iya.
Lebuh iya ke belanda, dia dan punggu kayu bisi labuh ari puchuk kayu, lalu inggar
bendar meredup labuh ke tanah. Nya ti ngasuh iya tekenyit bendar ati lalu rari belanda
penapat inat, laban iya ngumbai nya redup kaki antu mansang semak deka makai iya.
Lebuh iya ke belanda nya, iya nyau rauh-rauh minta tulung Alui, “Tulung!… tulung!…
Mati aku tu, ambi aku Alui!… Antu deka nangkap aku!” ku iya.
Gambar 18 - Apai Alui makai Belalai
Tang laban jaku iya enda bangat inggar ketegal iya nyau deka luput laban kelalu kesal
dijungkal kandang dada, nya alai sida Alui seduai indai iya nadai ninga. Lebuh iya datai
di rumah, iya pen lalu rebah ga luput. Ninga bisi utai bemunyi di ruai sida, Alui pen lalu
nilik ari bilik, lalu meda apai iya gali di tengah ruai.
“Lapa nuan apai?” ku Alui nanya, tang iya enda nyaut. Indai Alui agi kiruh mela lelabi di
bilik. Alui lalu ngangau, “Oh! Indai,” ku iya, “Mati apai tu, nama utai nganu iya tu.”
Indai Alui pan lalu pansut ari bilik lalu meresa semua tubuh Apai Alui, tang nadai ga
nemu bisi abi, tauka pantuk ular. Enda lama udah nya Apai Alui pen lalu ngeleda ari
luput.
Alui seduai indai iya lalu nanya, “Nama kebuah nuan baka tu Apai?” ku Alui.
Apai Alui lalu nyaut. “Tengah hari tadi aku mansuh lelabi ulih abau. Udah mansau
pansuh, aku lalu mandi. Pulai aku mandi, nemu lelabi udah abis diempa antu. Semua
ruas disimpanka antu keresik kena iya nganti lelabi. Enda berani dia agi, aku lalu
belanda pulai ke rumah. Lalu redup kaki antu bisi didinga aku nitihka aku. Nya alai aku
lalu belanda naka tulang. Datai di rumah tu aku lalu luput.”
“Nyey ... lapa deh! Keba nuan tu tambap. Lebuh seduai Alui ke ngabas abau tadi, Alui
endang meda lelabi dalam abau, tang nuan madahka ukai lelabi, daun engkubung ku
nuan. Nya nuan ngakal kami. Tang nuan ukai semina ngakal kami tang lalu ngakal nuan
empu. Manah endar enti lelabi nya dibai seduai Alui pulaika rumah, tentu bisi ke lauk
kitai sama. Nya dipansuh nuan dalam babas, nya alai iya diempa antu. Tak sekumbang
tua udah begulai tu nuan nan abau, sekali pen nadai meh kala bulih. Tak bulih daun
engkubung beari-ari ku nuan. Nya alai nuan tambap belama-lama,” ku Indai Alui bejaku.
Tang taja pan Apai Alui suah salah pengawa, ngakal sida sabilik, enda ga Indai Alui kala
datai jari ba iya. Lebuh iya sakit, tabin tauka bisi pemedis bukai, sida bini-anak iya
endang ngintu iya enggau manah. Laban sida Alui endang semampai bebasaka apai sida
iya, lalu Indai Alui pan baka nya mega, laban endang udah lama nemu ulah laki diri ke
baka nya.
Lemai nya, lebuh sida makai, sida sama belauk lelabi ke ulih abau Apai Alui tadi. Tang
Apaui Alui lalu apin nemu nya lelabi ke ulih iya pagi tadi.
Udah sama duduk makai, Apai Alui lalu bejaku, “Apuuu! ... Manah endar lauk kitai lemai
tu. Ari ni kita bulih lelabi tu deh Indai Duat?” ku tanya Apai Alui.
“Eh!” ku Indai Alui, “tu lelabi beri antu. Lebuh kami pulai ari umai tadi, betemu enggau
antu pulai ngabas abau. Iya lalu meri kami.”
“Nelap endar antu nya enggau kita. Enggi aku tak silik diempa antu,” ku Apai Alui nyaut.
“Kati ku baka gamal antu nya deh Indai Duat?” ku iya ga nanya Indai alui.
“Uuuuu ..., manah meh gamal antu nya. Iya ga sigat bendar. Tak baka gamal nuan ke
agi bujang menya,” ku Indai Alui nyaut iya.
“Nya alai enti abau nuan bisi bulih lelabi, anang mansuh iya dalam babas kediri agi,
enggai ke abis diambi antu. Tambah mega enti nuan selalu ngakal kami, nengali lelabi,
nengali jelu, nengali ikan ulih bubu, aku enggai begulai enggau nuan agi. Nyamai agi
aku begulai enggau antu ke nelap enggau aku, iya suah meri aku lelabi, meri aku babi,”
ku Indai Alui bejaku.
Ninga jaku Indai Alui munyi nya, dia Apai Alui lalu tusah ati laban iya takutka Indai Alui
enggai begulai enggau iya agi. Iya mega lalu bisi sangkaka Indai Alui nya bisi bepangan
enggau antu ke suah meri iya lelabi, ikan tauka babi. Berengkah ari nya, Apai Alui bisi
ngetu enda lama ngakal sida sebilik, enti iya bulih utai.
8. Apai Alui Nyadi Barukap
Nyadi bisi sekali lebuh maya Apai Alui berunding dalam ati diri. “Aku tu, suah bendar
udah alah dikeduan Enchelegit. Lebuh aku bulih babi, bulih lelabi, bulih ikan, iya ngaga
diri nyadi ngingit lalu minta utai ari aku. Nya alai diatu manah aku ngiga jalai malas iya,”
pia ku iya bejaku kediri.
Tiga lemai Apai Alui udah berunding munyi nya, Indai Alui pan lalu ngaga tumpi mulung.
Meda Indai Alui nyendia ka tepung mulung dikena ngaga tumpi, Apai Alui pan lalu tulih
ka akal dikena iya beduan Indai Alui. Lebuh Indai Alui berengkah ngirau mulung, dia
Apai Alui nurun ari rumah ke tanah, lalu belalai di baruh rumah, senentang Indai Alui ke
ngaga tumpi mulung. Nyadi hari maya nya nyau udah sabung petang. Enda lama udah
nya, iya lalu berengkah bemunyi,
Gambar 19 - Apai Alui belalai ba baruh rumah
“Barukap! Barukap! Barukap! …. Minta tumpi mulung”

Lebuh Apai Alui nyebut jaku nya, Indai Alui endang ngelala sera nyawa Apai Alui laban
iya enda ulih ngelalaika idul lebuh iya bejaku.
“Anang guai dulu, tumpi apin mansau. Iya ke besai nya untung nuan lagi,” ku Indai Alui
nyaut ari dapur. Udah nya Indai Alui lalu nunu batu bulih mesai betis. Ninga Indai Alui
madahka apin mansau, Apai Alui bejaku baru ga ari baruh rumah,

“Nganti enda lama agi, nyauka mansau tu, lagi baru meri nuan,” ku Indai Alui ga nyaut
ari dapur. Nyadi maya nya batu ke ditunu Indai Alui apin chukup angat.
Lebuh batu nyau udah mansau bendar, Indai Alui lalu ngangau ari dapur, “Nya tumpi
mulung, sambut jampatka ulih nuan!” ku Indai Alui.
Ninga Indai Alui ngangau, Apai Alui lalu beguai nyambut ari baruh, laban iya ngumbai
nya amat tumpi mulung ke dibuai Indai Alui ari dapur. Disambut iya batu nya tadi lalu
deka dipangkil iya enggau ngeli. Ensepi utai nya angat bendar, iya lalu nyerauh. “Akai
indai! akai apai! parai aku tu! Ambi aku, Alui, ambi!” ku iya ngangau rauh-rauh enggau
sabak-sabak.
Nyadi lebuh nya Alui enggau bala menyadi iya agi duduk di ruai, nganti tumpi mulung ke
digaga indai sida mansau. Ninga bisi urang besai tuai nyabak di baruh rumah, Alui lalu
ngangauka indai iya.
“Indai! Sapa urang nyabak di baruh rumah dia?” ku Alui ngangau.
Apai Alui agi mengkang nyabak di baruh rumah. “Akai rai! mati aku!” ku leka sabak iya.
Deka iya pulai, enda nemu jalai ngagai tangga, laban utai bangat petang enda peda
achuk mata. Nyau baka redup tiang rumah sida ditempuh iya besagam dalam petang.
Papung tengkiyung pan nyau baka setak kena sipak iya ke ngerijat natka pemedis abi
betu. Udah nya baru Indai Alui nyaut, “Sapa deh nya urang bukai, apai nuan meh nya,”
ku Indai Alui.
“Nama kebuah iya tak nyabak di baruh rumah deh, indai?” ku Alui nanya indai iya baru.
Apai Alui mengkang ga nyabak ngangauka Alui, “Ambi aku, ambi aku, Oh Duat. Mati aku
tu. Dada enggau jari aku betu laban batu, tunu indai nuan.”
“Alai meh Alui, ambi meh apai nuan nya,” pia ku indai iya bejaku.
Alui, laban ke meretika ulah apai seduai indai iya, lalu nurun mai sempun api lukai kena
iya betenggau, mansang ngambi apai iya ke baruh rumah sida.
Datai Apai Alui di rumah iya lalu nanya, “Oh, Indai Duat, kapa nuan meri aku batu tunu?
Ukai nya ke dipinta aku,” ku iya bejaku agi enggau sabak.
“Ni aku nemu nya nuan, iya ga barukap ke bemunyi minta tumpi mulung. Nama kebuah
nuan tak diau di baruh rumah besagam ngelaban petang dia? Ukai bisi utai diulihka nuan
dia. Aku ngaga tumpi mulung tu di bilik kitai ditu. Enti deka makai mulung, tak tama ke
bilik kitu. Peneka ati nuan nyamah. Ukai nya urang bukai ke ngaga nya, bini nuan
empu,” pia ku Indai Alui nyaut sambil tuchum lelegup.
Udah mansau tumpi mulung, sida Alui menyadi lalu sama makai mulung, tang Apai Alui
enda enggau makai mulung, laban betu ba dada enggau ba jari iya balat bendar. Udah
badu makai mulung, nya baru Alui seduai indai iya ngubat betu Apai Alui.
Gambar 20 - Apai Alui betu laban batu angat
“Nyey ... Agi! ..... Nya meh utai ulih nuan, enda ningaka rara kami, enda masuk ajar.
Merinsa ga keladi empa mata, apin mati apin ga jera. Enda nemu badu meh nuan
beduan diri sabilik bakanya. Kasih-kasih meh nuan Apai Duat, udah ga tambap, lap ga
agi,” ku Indai Alui kutap-kutap bejaku.
“Eh! Enchelegit, anang bejaku agi! …. tinduk kitai, jauh malam tu udah,” ku Apai Alui.
Udah nya sida sebilik lalu sama tinduk magang. Tang Apai Alui malam nya enda tentu
jenak tinduk, laban semua abi betu iya nyau berasai nyengut magang.
9. Ensera Alui Mati Kentut
Nyadi jerita tu beduduk ari Alui seduai Ini iya diau nyembuah kediri di Nanga Sungai ke
dikumbai Sungai Isang Bebelit, Pati Batang Gelong. Seduai iya diau enda bangat jauh ari
ulu nanga sungai nya. Urang ke diau ari ili seduai pan mayuh diau besemak enggau
pasar ari ili Nanga Sungai nya.
Nyadi sekali nyepi diri nyau puas makai nadai lauk, dia Ini Alui bejaku enggau Alui. “Alui,
pama nuan undur ke pasar, ngipa utai ke lauk, nyau puas nadai lauk, nadai garam.” ku
ini iya.
“Au, meh Ini,” ku saut Alui.
Udah nya, agi urap hari, Alui lalu beradu. Alui tu tadi beradu baka ke enda, semina
melitka sirat sebelit aja. Udah iya tembu melit ke anak sirat iya, Alui lalu nurun minching
sengayuh siti. Datai ba pengkalan, endang enda chachamang lalu nepan ba perau, lalu
belabuh bekayuh penapat inat. Iya bekayuh sepagi-pagi nya. Peluh tudah Alui ngenjing
bekerenjui nurun kening, ti baka iya bebaju endang sigi tentu basah laban peluh, tang
laban iya enda bebaju. Nyau kelama-lama iya ke udah dugau-dugau bekayuh, dia deh
iya ninga auh kukuk manuk. “Ah! Enda jauh agi pasar,” pia ku ati iya bejaku kediri
berandau nengali. Nyau ke lama, dinga iya gerung-gerung labu urang mansang nyauk
datai ari atas. Ari maia nya nyau deka tawas.
“Iya! ... Nama nya tak nuan deh Alui?” pia ku Ini Alui.
“Nama nya nuan ga deh Ini?” ku saut Alui. “Kemaya nuan datai ditu deh Ini?” ku iya
nanya Ini iya.
“Nama utai ditanya ke nuan. Tu ga endang pengkalan kitai.” Ku saut Ini Alui.
Angkat deh Alui tu tadi enda ingat muka tali perau ari liking. Iya ke bekayuh nya tadi
endang enda mindah ari pengkalan sida empu.
“Au deh Alui. Andal-andal aku ngumbai nuan udah datai di pasar meli lauk. Enti pia,
sama tua undurka pasar pagila,” Pia ku Ini iya.
Nyadi pagi siti Alui seduai Ini iya sama tumu beradu deka undur ke pasar baru, ngalu
utai ke lauk. Seduai lalu sama nepan ngagai perau ti endang udah dibuka Ini Alui lalu
undur ngili Sungai. Kira tiga tanjung seduai udah undur ngili ke ai, dia seduai lalu
betemu enggau bangkai but ukui tepanggai ba tugung reba ti betekat ba tengah ai. Bau
bangkai ukui ngenjing nempuh lubang idung. Tang endang baka Alui, sebarang utai rara.
“Kati alai ukui nya bebau Ini? Mati ukui nya?” ku Alui.
“Au, mati meh ukui nya, enti iya udah bau but bakanya,” ku Ini iya nyaut.
Seduai pan majak kediri bekayuh seruran regup-regup ngili ai. Nyau ke lama seduai ti
udah bekayuh, dia deh Ini Alui lalu kentut. Nyau berenyang asai perau kena kesuh
kentut Ini Alui, sereta balat bendar bau. Laban iya ke luan nya alai bau kentut balat
bendar ngesuh ngagai Alui ti di kemudi, sereta nempuh iya ke ngemudi.
Gambar 21 - Alui bekayuh mansa bangkai ukui
“Apu! Mati meh Ini tu.” Pia ku Alui bejaku dalam ati diri. Iya dipeda tusah ati. Luan
perau lalu dituntungka iya ngagai tebing. Ini iya lalu disangkaika iya dia.
“Nama main nuan nyangkaika aku ditu dah uchu?” ku Ini iya nanya Alui.
“Nuan ga mati deh Ini,” ku Alui.
“Enda aku mati deh uchu,” Pia ku tudah Ini iya nyaut Alui.
“Mati meh nuan. Nuan ga nyau bebau deh,” ku Alui ngelaban Ini iya dia.
Tanggung iya Ini iya ke tebing lalu kejang ke iya perau baru, takut ke Ini iya ke udah
mati nepan baru, ku ati iya.
Gambar 22 - Ini Alui kentut dalam perau
“Keba nuan tambap deh Alui.” Ku Ini iya ngangau ari jauh.
Dia Alui lalu mupuk bekayuh. Iya enda bedulika kanggau Ini iya. Dia iya bekayuh kediri-
diri ngili ai. Udah nya iya ninga burung richah. “Nama utai empa burung nya dia?” ku ati
iya. Datai iya ba senentang burung ke richah dia iya rangap-rangap nengkadah ke atas.
Peda burung mit enggau burung ke besai nya baka ke bebintih makai buah kara. Peda
iya jelu anak pan ngemayuh nya. Ditan-tan ke iya perau sereta rangap-rangap
nengkadah burung enggau jelu ba pun kara. Sepi iya tak merubas tama rekung iya, tai
engkerabak enggau tai burung labuh ari atas, lalu telan iya. “Ho! Udah mansau endar
buah kara, nama tu tak nyau penat asai buah tu tama nyawa aku deh?” ku ati iya.
Nyau kenyang iya laban pemayuh tai jelu enggau tai burung ti labuh tama nyawa iya.
Udah nya Alui lalu bekayuh natka perut nyau segai kenyang. Lama agi segai agi ga asai
perut iya. Purus iya perut sepi nyau tengelam belit sirat laban angin dalam perut. Apin
bangat jauh ari nya dia iya lalu kentut inggar bendar. Nyau berenyang perau kena kesuh
kentut Alui.
Gambar 22 - Alui tinggang tai burong
“Apu!” ku iya .”Mati meh aku tu deh. Bau kentu Alui nyau baka bau but ukui. Alui tu tadi
lalu tusah ati berundingka diri ti deka mati. Dia iya nyau enda engkebut duduk dugau-
dugau ba kemudi perau. Sengayuh ke dikena iya nyau tebelengka ari jari. Perau iya
lepung-lepung rarat ngili ai. Lebuh iya mansa mayuh buah rumah urang, dia urang alit
ati meda gaya iya. Ditanya urang iya endang enda nyaut laban udah mati.
Lebuh iya tepedaka buah nyau mirah mansau, dia iya mengkelak. “Ah! Sayau meh aku
tu udah mati. Enti aku enda udah mati, tentu aku ulih niki lalu makai buah nyin.” Ku iya
bejaku kediri, berandau nengali. Mayuh macham buah bukai dipeda iya.
Ari ili nya dia iya meda urang nyual ikan, undang, burung, keli enggau macham lauk
bukai. Lebuh iya mansa pasar dia iya balat agi ga tusah ati. Urang ke bepansa enggau
iya pen alit bendar ati iya tak beranyut enggau perau enda kebut-kebut. Nyau kelama
perau iya nyau pansut ari nanga sungai ngagai tasik besai ledung lelinang. Dia iya lalu
besatup enggau ribut ke bepuput bepulas uchung, angin ke bepusin puting beliyung,
kilat jampat ngelambai bungkung, guntur temepur inggar tetaung, bakul muat
gelumbang besabung, mangka ke januar kapal lambung, putus serumbung patah
sengkilung rantai besi.
Nyadi perau Alui ama tenggelam ama melepung ama telentang ama mengkanjung. Iya
empu nyau tenggelam ditaban ke bangkung. Nadai agi pegari panjung, enggau urang ke
Tanjung stak-stung, betumpu dan enggau wung tujuh beranggung, tuai sebayan ke
dajan dulu pumpung, mandi di lepung mandai mati. Mati meh tudah Alui nengali hari,
parai meh Alui nengali lemai, dajan meh tudah Alui Tambap nyenggai bulan. Nyau
beralih menua beralih dunya tudah Alui tu tadi angkat ari dunya injau.
Nyadi ensera tu tadi ngajar kitai meretika jaku urang ke tuai. Enti kitai enda meretika
jaku ajar, kitai pan tau mega nyadi tambab baka Alui. Enti kitai tambab, urang pen
ketawaka kitai. Baka jaku dalam ke nyebut, ”nyadika Salui urang”, reti nya, enti kitai
nadai penemu, kitai deka bendar dikemelika urang. Nya alai, bala anembiak mesti
belajar enggau rajin sereta meretika jaku ajar bala pengajar kita. Kita mesti bulih
penemu enggau akal ke diajar bala pengajar ba sekula, dikena kita ngidup ka diri lalu
ngemansang ka pendiau kita ke dudi hari ila. Selamat belajar lalu arapka kita mujur
dalam pelajar kita.
ABIS
Jerita Penulis:
Gregory Nyanggau Mawar, tu berasal ari Rumah Panjai Kerangan Pinggai, Paku, Spauh,
Saribas dalam menua pegai Betong. Aku udah besekula ba mayuh bengkah sekula di
menua Sarawak tu, nitih ka penunga menua endur niang apai aku ke bekerja perintah.
Aku ngabis ka sekula aku ba Institiut Technology Mara, Shah Alam, Negeri Selangor
dalam taun 1980 lalu bulih Diploma dalam Mass Communication.
Aku terubah iya bekerja nyadi Pengajar Sementara ba Kalaka Secondary School, Roban
dalam taun 1982-83. Udah nya aku pegi ngiga pengawa ka Miri lalu bekerja ba Company
minyak Sarawak Shell Berhad datai ka diatu.
Nyadi ensera ke ditulis aku ditu endang sigi lama bendar udah digumpul aku. Laban ti
angkun bendar ka jaku, main asal, pengarap lama, betusut, jerita tuai enggau tusun
pendiau bansa kitai Iban, aku endang enda leju begumpul ka kereban utai ti ditemu aku
pasal bansa kitai Iban, baikka nya ti udah ditulis bansa kitai empu tauka bansa urang
bukai. Ari bebanding ka penemu penulis-penulis bukai sereta bekalka ka penemu ti ulih
ari buah randau, buah kenang urang ke tuai menya, dia aku mupok betulis ka semua
penemu pasal bansa Iban lalu dipublish ba ruai syber http://gnmawar.wordpress.com/.
Tang tuju asal aku endang deka nyimpan data pasal bansa kitai Iban awak ka nyadi
kereban penemu ke tau dipelajarka bala urang kedudi hari ila. Aku arap ka anembiak
rebak baru bisi pengerindu sereta pengangkunka jerita lama, main asal, penemu tuai
lalu beati temegah ngemajuka jaku bansa Iban. Terima kasih ka sukung-tulong kita.

Ensera Anak Mit Vol 17

Diunggah oleh

Informasi Dokumen

Judul Asli

Hak Cipta

Format Tersedia

Bagikan dokumen Ini

Bagikan atau Tanam Dokumen

Opsi Berbagi

Apakah menurut Anda dokumen ini bermanfaat?

Apakah konten ini tidak pantas?

Hak Cipta:

Format Tersedia

Ensera Anak Mit Vol 17

Diunggah oleh

Hak Cipta:

Format Tersedia



Perpustakaan Negara Malaysia Cataloguing-in-Publication Data,

Published by Gregory Nyanggau Mawar,

Printed by Yushan Company,

Dikelala bungai ari kayu,

Enti bejalai betungkatka adat,

1. Indai Alui Nyadi Antu Lakak

Jaku Peransang Ngagai Pemacha Anak Mit:

Baka nya penyiru jaku dikena besampi ngagai Petara,

“Kapa nuan kayu ngemayuh nya, Apai?” ku Alui nanya.

“Eh! Kena ke sengkilu. Dikena aku bira lagi,” ku iya nyaut.

“Barang iya meh Sap,” ku iya.

“Kati nuan nemu surat?” ku Sap nanya iya.

Gambar 4 - Apai Alui betemu enggau Sap Pulis

“Yiis sah” ku saut Apai Alui.

Tanya Sap baru ga iya, “What is your name?”

“No! No nem,” ku saut Apai Alui.

“Tu, upih ti diasuh nuan tiki aku Sap,” ku Apai Alui.

“Pagila enti jam pukul lapan, palu enggau iya,” ku Sap

Gambar 7 - Nerupung ngena puchung rumpung burit

Gambar 8 - Sebuah kapal besai sangkai

“Kati nuan deka ka langkau?” ku Tuan Raja nanya Apai Alui.

Gambar 9 - Tetemuka endur penchuri ngelalaika tinchin Raja

“Nama guna enggau garam deh?” ku Apai Alui nanya

“Au! Lagi meh aku minta garam,” ku Apai Alui.

”Kapa nuan kain deh?” ku Apai Alui ga nanya.

“Akai rai! Lelak aku tu bejalai,” ku iya nyapa mentua iya.

Gambar 11 – Apai Alui Ngerami tubu enggau garam

“Oh, akan! Jadi rumah nuan?” ku iya.

Gambar 12 - Ningaka munyi kesuling Antu Ribut ba rumah Apai Sumang-Umang

Ku iya, “Sapa urang nebah kesuling ngemanah nya, akan?”

Gambar 13 - Rumah Apai Alui runtuh laban kabut

Gambar 14 – Apai Alui Nurun Nyumpit

Gambar 16 – Alui seduai apai iya nurun nanka abau

“Eh! Nadai Bulih abau tua nya.”

Gambar 17 – Apai Alui ngabas abau

“Kati abau seduai bisi bulih?” ku Indai Alui nanya.

Gambar 18 - Apai Alui makai Belalai

Gambar 19 - Apai Alui belalai ba baruh rumah

“Barukap! Barukap! Barukap! …. Minta tumpi mulung”

“Barukap! Barukap! Barukap! …. Minta tumpi mulung”

“Indai! Sapa urang nyabak di baruh rumah dia?” ku Alui ngangau.

“Au, meh Ini,” ku saut Alui.

“Nuan ga mati deh Ini,” ku Alui.

Gambar 22 - Alui tinggang tai burong

Anda mungkin juga menyukai