PARTORDING NI PARMINGGUON

DI MINGGU XXIII DUNG TRINITATIS

 Ev: 1 Tessalonik 5 : 1 - 11  Ep: Amos 5 : 18 - 27

Topik :
MARSIPAULIULIAN MANOMU HARORO NI TUHAN

HURIA KRISTEN BATAK PROTESTAN

 Minggu, 12 November 2023
1. Marende BE HKBP No. 18 : 1 - 3 UNGKAP BAHAL NA UMULI
(BL. 84)
♫♪♫ Ungkap bahal na umuli, bagas ni Debatangki
Ai tusi do au naeng muli, ganup jumpang Minggu i
Hulului do disi, bohi ni Debatangki.

♫♪♫ Nunga ro au, o Tuhanku, ro ma Ho tu au muse

Ai di bagas ingananMu, las ni roha do sude
Sai bongoti rohangkon, baen ma joroMi dison.

musik.... Jongjong .....

♫♪♫ Sai pantun pangalahongku maradophon bohiMi
Sai suruhon tu rohangku Tondi Parbadia i
Asa sai tongtong ture Tangiangku ende pe.

2. VOTUM – INTROITUS – TANGIANG :

U : Marhitehite Goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Parbadia na tumompa langit dohot tano
on. Amen.
Martua do halak na manaon di pangunjunan, ai dung tau sian
pangunjunan i, jaloonna do tumpal hangoluan, na pinarbagabaga ni
Tuhan i tu angka na holong roha di Ibana. Haleluya!
H : (Mangendehon): BE. HKBP No. 852 : 1 ”HALELUYA HKBP (3x)
BL 852
♫♪♫
Haleluya, Haleluya, Haleluya.
U: Martangiang ma hita! Ale Tuhan Debata Pargogo na so hatudosan jala
Pardengganbasa! Ro di saleleng ni lelengna do asi ni rohaM. Mauliate ma
rohanami tu Ho, ala diramoti Ho hami sian na sailaon sahat ro di sadari on.
Hupuji hami ma Ho, ala naung sahat tu hami Barita na Uli na sian AnakMu,
Tuhan Jesus Kristus, na pangolu hami. Mauliate hudok hami tu Ho, ala
dibagasan dame dohot hasonangan dilehon Ho HataM na badia i. Sai asi ma

1
 rohaM, urupi ma hami mangulahon na nidokMu, asa hot rohanami jala
tarparangehon hami parange na badia. Sai ajari jala paimbaru ma rohanami,
asa lam ias hami ro di hasusuda ini bohalnami, marhitehite Tuhan Jesus
Kristus Tuhannami. Amen. (hundul)

3. Marende BE No. 121: 3, 5 JESUS RAJA NI HURIA (BL. 97)

♫♪♫
Sai palua ma ruasMu, sian nasa haholomon, sian roha daging pe.
Ho sambing ma ale Tuhan, las ni roha ni punguan
Na jumujung goarMi, na jumujung goarMi.
♫♪♫
Sai pauli huriaMu, asa lomo ni rohaMu
Jumpang Ho di ruasMi, angka na serep marroha
Na magigi mida dosa Ho ditiru sasude, Ho ditiru sasude

4. PATIK :
U : Tangihon hamu (tatangihon) ma Patik ni Debata di Minggu sadarion,
na ima Patik I - IV.
Patik Parjolo.
Ahu do Jahowa Debatam, ninna Debatanta. Ndang jadi marangkup
Ahu bahenonmu Debatam.

Patik Paduahon.
Ndang jadi ganaonmu jala ndang jadi sumanonmu manang aha na di
banua ginjang dohot na di banua tonga on, ro di na di bagasan aek na
di toru ni tano, ianggo tung gabe sisombaon manang sioloan.

Patik Patoluhon.
Ndang jadi dohonon goar ni Debata, ianggo so ture dalanna, ai hona
uhumNa do sogot angka na marsineang di GoarNa.

Patik Paopathon.
Ingot hamu ma pabadiahon ari Minggu i! Di na onom ari ma ula hamu
nasa siulaonmu; alai anggo ari papituhon i, ari paradianan ni Jahowa
Debatam do i. Ndang jadi ho mangula anggo di na sadari i, manang
anakmu pe manang borum manang naposom lahilahi manang

2
 naposom boruboru, ro di pinahanmu, ro di isi ni huta ni halak pe na
mangebati hutam. Ai di na onom ari do ditompa Debata langit dohot
tano dohot laut dohot nasa isina, dung i maradian do Ibana di ari
papituhon i. Dibahen i do umbahen na dipasupasu Debata Jahowa ari
paradiananNa i jala diparbadiai.

I do sahatna, Antong rap mangido gogo ma hita sian Tuhan Debata!

U+H: Ale Tuhan Debata, sai pargogo i ma hami mangulahon na hombar
tu PatikMi. Amin
5. Marende BE No. 417: 1 - 2 RADE SITUTU HALUAON (BL 278)
♫♪♫
Rade situtu haluaon, na naeng tangkuponmu antong
Rade nang di ho hatuaon, sihalashononmu tongtong
Bernit do ditaon Tuhanmu pasaehon dosam sasude
Tung unang paujat Ibana, sai jangkon panghophopNa i.

…. Jongjong …..

♫♪♫
Patedek sude hahurangan, topoti sandok dosami
Pangido: Sai sesa o Tuhan, sude pangalaosionhi
Datdati, sai saut botoonmu naung sesa dosam sasude
Mardame dagingmu nang tondi, maniop tongtong Tuhan i.

6. TANGIANG MANOPOTI DOSA:

U: Tatopoti ma dosanta, martangiang ma hita! Ale Debatanami, na
marasiroha jala na badia, Amanami marhitehite Tuhan Jesus Kristus!
Manang piga hali hami ro tu joloM, huhilala hami, ringkot do asi ni
rohaM di saluhut hami halak pardosa. Ala ni i do umbahen na
hupaserep hami dirinami sadari on di joloM, jala huparhatopot hami,
tung na jotjot do hami manimbil sian angka dalanMu na badia songon
birubiru na lilu. Sai unang pabali hami sian joloM ala ni dosanami i, ai
ndang dihalomohon rohaM hamatean ni angka pardosa, alai
hamubaon ni rohana do lomo ni rohaM, asa mangolu. Sesa ma saluhut
hageduhonnami dohot pangalaosionnami marhitehite Pangulunami na
3
 sasada i, AnakMu Tuhan Jesus Kristus. Sai pahot ma asi ni rohaM di
hami marhitehite panindangion dohot hagogoon ni Tondi Parbadia asa
tarapul situtu rohanami manjou Ho, asa pantun, tigor jala daulat hami
marpangalaho, bahen hasangapon di GoarMu na badia i. Amen.
Tabege ma bagabaga taringot tu hasesaan ni dosa:
Adong do di hita sintua ni malim na songon i, na hundul di siamun ni
habangsa ni hatongamon di banua ginjang. Dibahen i tarbahen Ibana
do pangoluhon ro di ujungna angka na sandok ro tu Debata marhitehite
Ibana; na mangolu do Ibana tongtong, asa ditangianghonnasida.
Hasangapon ma di Debata na di ginjang !
U + H: Amen (hundul)

7. Marende BE HKBP No. 460: 1, 2 ALANI TUHAN JESUS (BL. 319)

♫♪♫ Ala ni Tuhan Jesus marendeende au.
Asi tongtong rohaNa nang pe pardosa au.
Ibana na padomu au dohot Debata.
MudarNa diusehon di dolok Golgata.

♫♪♫ Ala ni Tuhan Jesus mamujimuji au.

Holong tongtong rohaNa, holong marnida au.
Godang do hasusaan di hasiangan on,
Asal ma di tanganNa na sonang au tongtong.

8. EPISTEL:
U : Tangihon hamu (tatangihon) ma hata ni Debata Turpuk Epistel di ari
Minggu on, tarsurat di Amos 5 : 18 - 27
Marjea ma nasida angka na mangapian di ari ni Jahowa! Tung aha
labamuna sian i? Haholomon do ari ni Jahowa, ndada hatiuron.
H: Hira songon halak na maporus maradophon singa, gabe dijumpanghon
babiat ibana; jala dung ro di jabu ibana, gabe mangunsande tanganna
tu dorpi hape dipargut ulok ibana.
U: Nda haholomon tongon ari ni Jahowa, jala ndada hatiuron hagolapon
do, ndang marsinondang?
4
 H: Huhagigihon, biasan Ahu mida angka ari rayamuna, jala ndang
dihalomohon rohangKu angka luhutanmuna.
U: Ai nang pe dipelehon hamu tu Ahu angka pelean situtungon dohot
pelean sipanganon, ndang lomo rohangKu disi, pelean hamauliateon
sian pinahanmuna pamuean pe, ndang parduli Ahu disi.
H: Paholang ma sian Ahu hagunturon ni angka endemu, jala ndang lomo
roha ni pinggolHu umbege soara ni sordammu.
U: Jadi margilinggiling ma songon aek uhumi, jala hatigoran songon
sunge na so olo marsik.
H: Tung adong ma angka pelean sipotongon dohot sipanganon dipasahat
hamu tu Ahu di halongonan saleleng siopatpulu taon, hamu ale
pinompar ni Israel?
U: Antong usungonmuna ma undungundung ni rajamuna ro di ojahan ni
ganaganaanmuna, tole bintang ni debatamuna, angka na binahenmuna
di hamu.
H: Jadi toguonHu ma hamu tarbuang dao salpu sian Damaskus, ninna
Jahowa, Debata Zebaot goarNa.
U : I do sahat na. Martua ma halak na tumangihon Hata ni Debata jala
na umpeopsa. Amin.
9. Marende BE HKBP No. 464: 1, 2 HUBOAN MA DIRINGKU (BL 313)

♫♪♫
Huboan ma diringku, Tuhan, hibul tu Ho
Ai au do tinobusMu, umbaen tarbaen au ro
Pagalak ma rohangku, dison managam au
TondiMi ma suru, na boi manggomgom au.

… Jongjong …
♫♪♫
Ho sipalua ahu, sun hinagogoMi
HataM do huhaposi, na so boi muba i
Pagalak ma rohangku, dison managam au
TondiMi ma suru, na boi manggomgom au.

5
10. MANGHATINDANGHON HAPORSEAON:

U : Tahatindanghon ma haporseaonta i, songon na hinatindanghon ni

donganta sahaporseaon di sandok portibi on. Rap ma hita mandok:

H : Ahu Porsea di Debata Jahowa….. d.u.

… (hundul)

11. TINGTING :

12. Papungu Pelean Huhut Marende sian BE HKBP No. 723 : 1… TU

JOLOM O TUHAN BL. 723 (Pelean Ia, Ib)
♫♪♫ Tu joloM o Tuhan sahat ma diringkon
Pangke ma au hombar tu lomoM
Molo ndang Ho Tuhan, maringanan di au
Diringkon ndang mararga be i
Tung pogos pe dison manang sonang tahe
Marsigantung tu Ho sasude
Holan Ho huihuthon ndang be diringkon
Togutogu ma tu na ture.

♫♪♫ Tu joloM o Tuhan sai gara rohangkon

Tung unduk do mangoloi Ho
TondiMi ma tongtong margogoihon au on
Mangulahon lomo ni rohaM.
Tung pogos pe dison manang sonang tahe
Marsigantung tu Ho sasude
Holan Ho huihuthon ndang be diringkon
Togutogu ma tu na ture

---- Musik ----

6
 ♫♪♫ Tu joloM o Tuhan tung marpadan do au
Ingkon Ho huihuthon tongtong
Ai huboto tangkas na martua do au
Nang muse dohot di ngolungkon
Tung pogos pe dison manang sonang tahe
Marsigantung tu Ho sasude
Holan Ho huihuthon ndang be diringkon
Togutogu ma tu na ture.

13. JAMITA: 1 Tessalonik 5 : 1- 11

14. Papungu Pelean Huhut Marende sian BE HKBP No. 820: 1...
PANGKE MA TINGKIM BL. 820 (Pelean II)
♫♪♫
Pangke ma tingkim na sian Tuhanmu, ai tung hatop laho salpu do i
Dia ma arta na hot di ngolumu, holong na polin na manongtong i
Ai ndang adong na hot di atas tano on nasa na uli lao salpu do i
Holong niroha na hot na manongtong, holan di Jesus do boi jumpang i.

♫♪♫
Pangke tingkim unang ho marnalemba, topoti urupi na dangol i
Sai marsinondang ma baen palitomu, baen hasangapon di Tuhanta i
Ai ndang adong na hot di atas tano on nasa na uli, lao salpu do i
Holongniroha na hot na manongtong, holan di Jesus do boi jumpang i.

------musik-------
♫♪♫
Halojaonmu diboto Tuhanta, sian Ibana ro balos ni i
Holong na ias na sinaburhonmu, sai gotilonmu parbue ni i
Ai ndang adong na hot di atas tano on nasa na uli, lao salpu do i
Holongniroha na hot na manongtong, holan di Jesus do boi jumpang i.

15. Tangiang Pangujungi: Tangiang Pelean - Ale Amanami - Pasupasu

(Jongjong )

7
U : Tatangianghon ma peleanta. Ale Debata, Amanami na di banua
ginjang! Ho do haroroan ni saluhut silehonlehon na denggan dohot
nasa uli basa na mauliutus. Hupasahat hami ma sian na nilehonMi tu
hami, pelean nami tu Ho. Sai jalo ma i gabe uap na hushus di joloM.
Pasupasu ma i jala ramoti asa huparhaseang hami pelean on,
patimbulhon harajaonMu di tongatonga ni huriaM dohot di portibi on.
Buhai ma rohanami marhitehite TondiM, asa lam hutanda hami
godang ni silehonlehonMi tu hami, asa lam girgir hami mandok
mauliate tu Ho, marhitehite Jesus Kristus Tuhannami. Amen.
H : (Mangendehon) BE. HKBP No. 204 : 2 “NDANG
TADINGHONONHU HO” BL73
♫♪♫
Nasa na ni lehonMi, tondi ro di pamatanghu
Hosa dohot gogongki, ro di saluhut artangku
Hupasahat i tu Ho, na so unsatonhu do.
U : Ale Amanami na di banua ginjang! Sai pinarbadia ma GoarMu! Sai ro
ma harajaonMu! Sai saut ma lomo ni rohaM di banua tonga on songon
na di banua ginjang! Lehon ma tu hami sadari on hangoluan siapari!
Sesa ma dosanami songon panesanami di dosa ni dongan na mardosa
tu hami! Unang hami togihon tu pangunjunan! Palua ma hami sian
pangago!
H : (Mangendehon): BE HKBP No. 841: 1 “AI HO DO NAMPUNA
HARAJAON” BL 841
♫♪♫
Ai Ho do nampuna harajaon, dohot hagogoon
Ro di hasangapon, saleleng ni lelengna, Amen.
U : Tangiang Pasupasu
H : (Mangendehon) BE HKBP No. 845 : 1 “AMEN, AMEN, AMEN”
BL 845
♫♪♫
Amen, Amen, Amen.