ENDOG ASIN

Salah sahiji kadaharan sapopoe anu kawilang populer nyaeta endog asin. Lamun urang
ngahaja meuli, tangtu hargana leuwih mahal batan endog tawar. Teu mustahil,
lantaran endog asin mah geus diolah deui. Teu pira ngolahna mah, pisan. Geura urang
ge upama daek ngaleukeunan diajar mah, pasti bisa. Ieu di handap dipedar kumaha
prak-prakan nyieun endog asin.
Kahiji, urang kudu milih endog anu rek diasin tea. Kade ulah endog anu ruksak.
Kacirina nyaeta upama kulitna geus rengat. Iwal ti eta, endog nu geus
disileungleuman oge teu hade. Najan can jadi anak oge, eta endog teh tangtu geus
ruksak. Katilu, endog anu ruksak teh nyaeta anu geus lila teuing diteundeun, nepi
ka katiisan.
Endog anu hade bisa katangen upama ku urang ditoong tina solobong kertas, bari
ditompokeun kana cahaya panonpoe atawa lampu. Katembongna beresih, ngenclong henteu
rumeuk. Tah nu kieu nu ku urang kudu dipilih teh. Sabada dipilih, terus dikumbah.
Dihijikeun dina hiji tempat nepi ka garing.
Pagawean anu kadua nyaeta nutuan uyah jeung bata beureum nepi ka lembut pisan. Mun
perlu ayak heula. Upama duanana geus lembut, tuluy dicampurkeun nepi ka galo pisan.
Ari babandingan antara bubuk bata jeung uyah teh kudu 2 : 1 (dua banding hiji).
Upama dua leter bubuk bata, kudu dicampur jeung uyah bubuk saleter. Ari lobana mah
kumaha perluna bae. Sanggeus kitu, tuluy eta bahan teh dicaian. Caina mah cai tiis
bae. Dikocek nepi ka jadi adonan kentel.
Tah ieu adonan teh satuluyna dipake malur endog nu geus meunang meresihan tea.
Dibalurkeun, kawas rek ditembok endog teh. Kade teu rata, jeung kade teu mahi keur
endog anu geus disadiakeun tea. Eta endog beunang maluran ku adonan teh
dikumpulkeun deui dina hiji tempat sarta dibeberes sina ngentep. Geus kitu mah cul
bae tunda kurang leuwih sapuluh poe.
Geus cumpon kana sapuluh poe, eta endog teh tuluy dukumbah, diberesihan, bari urang
geus sayagi pariuk gede keur nglub endog beunang meresihan tea. Geus dikulub mah
rengse, tinggal ngasaan. Rek haneut-haneut ditambul bisa. Rek ditiiskeun heula komo
leuwih pedo!
(tina buku Sabasa 1B pikeun kelas 7 Semester kadua, kaca 65 � 67)