NIM : 23100860006 Program Studi : PPG Prajabatan Bahasa Jawa 2023 Mata Kuliah : Filosofi Pendidikan Indonesia
Lelampahipun Pendidikan Nasional saking Prespektif Ki Hadjar Dewantara
Gerakan transformasi Ki Hadjar Dewantara wonten salebeting tuwuh rembakanipun
pendidikan nalika pra lan pasca-kamardikan punika salah satunggaling prastawa ingkang wigatos tumrap sujarahipun Indonesia. Ki Hadjar Dewantara punika satunggaling guru lan aktivis ingkang kagungan pengaruh ageng dhateng ewah-ewahanipun sistem pendidikan ing Indonesia. Lumantar seratan punika kula badhe ngandharaken sawetawis wos wigatosing transformasi Ki Hadjar Dewantara. Wanci pra-kamardikan, kawontenan pendidikan ing Indonesia punika kenthel sanget kaliyan sistem kolonial Walandi. Kurikulum, basa, lan strukturipun adhedhasar model kolonial ingkang taksih eksklusif. Awit punika lajeng Ki Hadjar Dewantara rumaos bilih bangsa Indonesia kedah miwiti gerakan transformasi pendidikan ingkang langkung inklusif lan dipun- dhasari pathisarining budaya bangsa Indonesia. Nunten ing taun 1922 Ki Hadjar Dewantara wiwit mrakarsani jumenengipun Taman Siswa, pamulangan sepisanan ingkang migunakaken basa Indonesia minangka basa pengantar rikala semanten. Lampah punika mujudaken salah satunggiling putusan wigatos ingkang tundhonipun saged caos ewah-ewahan tumrap sistem pendidikan ing Indonesia. Lelabetanipun Ki Hadjar Dewantara boten kendhat ngantos dumugi ngriku kemawon. Sasampunipun bangsa Indonesia nggayuh kamardikanipun ing taun 1945, tumunten panjenenganipun Ki Hadjar Dewantara aktif ndherek ngrumusaken kebijakan nasional rikala semanten. Salah satunggalipun inggih punika merjuangaken basa Indonesia amrih saged dados basa pengantar ingkang dipun-ginakaken wonten sedaya pawiyatan ing Indonesia. Basa punika kaangkah saged nyengkuyung manunggaling bangsa Indonesia. Kajawi punika, Ki Hadjar Dewantara ugi ngandharaken bab wigatosing pendidikan minangka sarana kangge ambangun warga nagara ingkang langkung winasis lan kagungan budi pakarti luhur. Panjenenganipun kagungan pamanggih bilih pendidikan punika minangka pirantos kangge ngindhakaken mutu gesangipun manungsa lan saged mbiyantu mrantasi prakawis sosial, ekonomi, lan budaya salebeting masarakat. Sanadyan ta transformasi pendidikan Ki Hadjar Dewantara punika sampun mbekta ewah-ewahan positif, nanging sapunika Indonesia taksih ngajengi tantangan ageng. Tuladhanipun inggih punika prakawis akses lan mutu pendidikan ing Indonesia ingkang dereng wradin. Pramila pamarentah sapunika kedah pados cara amrih prakawis-prakawis punika wau saged enggal-enggal dipun-prantasi.