1. Rende: KEE No. 367:1 “Kam Tuhan Dibata Si Mada Kuasa” (Ibabai Nande) 1. Kam Tuhan Dibata Si mada kuasa Si ngkelini krina doni enda Badia gelarNdu, mulia me tuhu Ku puji gelarNdu bas geluhku Kam Tuhan Dibata si mada kuasa Singkelini krina doni enda 2. Ertoto (Ibabai Bapa) 3. Rende: KEE No. 367:2 “Kam Tuhan Dibata Si Mada Kuasa” (Ibabai Nande) 2. Kam Tuhan Dibata Si mada kuasa Singerajai krina sinasana Krina tinepaNdu nembah mungkuk baNdu Rasa lalap mujiken gelarNdu Kam Tuhan Dibata simada kuasa Singerajai krina sinasana 4. Renungen (Ibabai Bapa) Teks : Josua 13:15-33 Tema : Pembagian daerah ingan tading (II) Tuhu la terukuri kita cara Dibata milih kita jadi anakNa ntah pe bangsaNa. Labo erkiteken ulina perbahanenta, jilena rupanta, mantap pendahinta maka Dibata milih kita. Kita ipilih rikutken sura-suraNa janah ijadiken jadi anak-anak si badia gelah ngikutken Jesus Kristus. Enda kerina erkiteken perkuah ate Dibata si mbelin. Perkuah ate Dibata e teridah i bas Ia milih bangsa Israel jadi bangsaNa gelah bangsa e banci jadi usihen man bangsa si la nandai Tuhan. Ise si ipilih e labo terjeng ipilih tapi enggo isikapken Dibata masa depan si terulin man bana. Kenca bangsa e nadingken Mesir i teruh pengkawali Tuhan berkat ia ku kuta-kuta situduhken Dibata man bana. IberekenNa man Musa pedah guna bangsa Israel, maka adi ikeparina Lau Jordan seh ku taneh Kanaan, la banci la arus ipelawesna kerina penduduk negeri e. Runtuhken seh getem kerina penduduk negeri e bagepe kerina gana- gana siibahan i bas batu bage pe i bas besi nari. Kuasai taneh e janah ringanlah ije. Sabab ibereken Tuhan taneh e man bangsa Israel rikutken belang-belang daerahna man siwah setengah suku-suku Israel. Janah si mbagikenca e me kap imam Eleasar ras Josua. E maka Josua 13:15-33 e me pembagian daerah man suku-suku kalak Israel bagi si ipedahken Tuhan man Musa, janah Josua si enggo metua isuruh Tuhan guna mbagikenca. Arah bahan oratenta kita erlajar bage kelengna dingen ulina perbahanen Tuhan i bas milih kita jadi sikerajangenNa. La ngenca si ipilih e isuruh guna jadi alatNa meritaken kerna Jesus arah kinitekenna tapi rikut kerna keperlun kegeluhen ras masa depanna enggo iaturken Tuhan. Amin gia melala tantangen si man alanken guna ndalanken sura-sura Tuhan tapi penemani ras pengkawaliNa mabai kita ngaloken pasu-pasu si enggo isikapkenNa man banta. E maka sikataken bujur man Dibata si enggo milih kita jadi anakNa. Ipilih guna nggeluh bagi si ngena ateNa. Alu bage ntah katawari gia kita idiloNa guna ndahiken dahin si mehuli meriahlah ukurta ndahikenca. Tutus ras setia ndalankenca amin melala perbeben si man alankenta, tapi kalak si enggo ipilihNa ikawali Tuhan rasa lalap. Lit rencana Tuhan si mehuli man sipilihNa e. Malem ateta i bas pasu-pasu si enggo isikapkenNa man kalak si erkeleng ate dingen setia ndalanken perentahNa. Bagi bangsa Israel, bas tutus ia nggeluh bagi si ipedahken Dibata man bana malem ateNa. Iparpari las matawari pe la ia magin, musuh bagepe rubia-rubia si merawa pe la pang njerngemsa asum ia erdalan i bas padang Gurun sabab Dibata si ngkawalisa. Anak ras kempu-kempuna malem atena ringan i bas taneh si ibereken Dibata man bana. Bageme ulina perbahanen Tuhan si ngkelengi kita. Amin 5. Rende: KEE No. 212:1,4 “Perkuah Ate Si Mbelin” (Ibabai Nande) 1. Perkuah ate si mbelin, Nemani geluhku Ije me aku erdalin, Teruh perkuahNdu 2. Perkuah ate si mbelin, Simahan dame e Bengketi pusuh kami min, Lah kami senang je 6. Pertoton Sapaat & Pertoton Tuhan (Ibabai Anak)