Taman Kota Kaanggen Genah Ngwangun Budaya Sehat Sane Kolektif

Ida Bagus Pastika (65), saking Sukasada. Ipun sampun pensiun saking pakaryan
nyane ring Kantor Bupati Buleleng. Ipun nguningayang kawentenan taman kota puniki sane
magenah ring Pusat Kota Singaraja. Kawentenan taman kota puniki genah nyane strategis
krana wenten ring pusat kota, parkiran sane linggah, genah sane becik kaanggen majeng ring
sira sane kayun olahraga, tur ngarereh sawitra. Lianan punika, prasida rauh ka taman kota
ritatkala rumasa sumpek meneng ring griya kemanten. Genah puniki becik pesan duaning
wenten genah jagi mawisata kuliner, akeh dagang-dagang sane madolan ring taman kota.
Yening usan olahraga ring taman kota, nenten malih doh ngarereh dagang krana sampun
nampek sane wenten ring sisin tamane. Tur fasilitas sane sampun kasayagaang, wenten
wahana taman sane kaanggen maplalianan majeng ring alit-alit sakadi : anyunan, serod-
serodan, miwah sane lianan. Ida Bagus Pastika nguningayang  indik ragane sering pesan
malancaran ka taman kota sareng sawitrane. Irika ipun olahraga sakadi bulu tangkis tur
malaib ngalingserin taman kota punika.
            Taman kota puniki becik pesan yening prasida kalestariang kawentenannyane.
Manawi genah nyane sane wenten ring pusat kota sane ngangsan aluh pesan majeng ring
masyarakat prasida ngarauhin genah puniki. Becik pesan yening sabilang semeng utawi
wengi sapasira dados rauh ring taman kota jagi ngwangun mangda prasida sehat ring
padewekan.  
Taman kota inggih punika genah sane terbuka, sane madue integrasi majeng ring lingkungan,
masyarakat, tur kesehatan ring lingkungan perkotaan antuk nguningayang indik  pendekatan
ekologis majeng ring kesehatan tur kesejahteraan manusa sane madasar antuk kontak sareng
alam puniki. Lianan puniki, taman kota madue kawigunan ring lingkungan, estetis,rekreasi,
psikologis, sosial, tur ekonomis majeng ring masyarakat ring perkotaan. Sakadi conto nyane,
taman kota prasida ngisep emisi karbondioksida tur ngawedarang oksigen, ngelestariang
keanekaragaman hayati.
            Akeh tanaman sane wenten ring taman kota punika. Punyan kayu sane tegeh-tegeh,
sane prasida kaanggen genah ngetis ritatkala kebus gumine. Tur kawentenan kolam-kolam
sane ngangsan ngaenang becik pesan pemandangan ring genah punika. Genah sane asri ring
pusat kota. Pemerintah sampun misadia ngawentenang genah taman kota puniki. Sane
mangkin iraga patut nyaga mangda taman kota puniki nenten usak.
            Nanging, masyarakat ring perkotaan durung paham pesan ngenenin indik kawentenan
taman kota puniki. Papineh sane idealisme ngangsan nenten wenten krana ngangsan akeh
utawi padat ring lingkungan perkotaan puniki. Penduduk sane ngangsan akeh rauh saking
luar Bali sane jagi menetap ring perkotaan. Ring era modern puniki, sampun ical
paiketannyane sareng konsep taman kota ring era sane sampun kalintang. Sane mangkin akeh
sane nganggen taman kota punika wantah genah ngarereh liang ring galah sane kosong tanpa
iraga sadar ring kawentenan kawigunan fungsi ekologis tur mabuat pesan majeng ring
kesehatan saking taman kota punika.
            Mangda taman kota puniki becik kawigunan nyane, masyarakat patut paham majeng
ring peran sane sanget penting saking taman kota puniki.
                                                                                                                        Olih : Ida Ayu
Putu Eka Pusparini