BAB I SAMBRAMA WACANA

Kompeténsi Dasar Indikator

3.1 Menganalis struktur dan kaidah wacana
non sastra, sambrama wacana dan
laporan berbagai kegiatan secara lisan
dan tulis
PERTEMUAN 1
3.1.1Menelaah kerangka sambrama wacana
berbagai upacara
3.1.2Menetapkan pokok pikiran kerangka
sambrama wacana suatu acara

4.1 Memproduksi teks sambrama wacana dan 4.1.1 Membangun Sambrama wacana
laporan berbagai kegiatan secara lisan sajeroning upacara
dan tulis.

PAPLAJAHAN 1 SAMBRAMA WACANA

Téks Sambrama wacana

Wanti Warsa STT Yowana Dharma Shanti

"Om Swastyastu"
Sadurung titiang nglanturang atur pinih riin ngiring
dumun sareng-sareng ngaturang puja pangastuti majeng ring
Ida Sang Hyang Widhi Wasa, dumogija sangkaning paswecan
Ida parikrama rahinane mangkin prasida mamargi antar tan
kapialang.
- Mantuka ring para manggala praja makadi Bapak
Prabekel, Bapak Klian Dinas utawi sane ngangganin dane
sane wangiang titiang.
- Para manggala desa makadi Bapak Bendesa Adat
miwah Prajuru Adat sane baktinin titiang.
- Bapak Kelian Adat Banjar sane kusumayang titiang.
- Para Kelian Truna Truni sinamian sawewengkon
Adat Nongan sane suksmayang titiang.
- Para truna truni Yowana Dharma Shanti Banjar Ambengan sane tresna sihin titiang
Kaping ajeng titiang ngaturang suksmaning manah ring sapengrauh ida dane para
manggala taler para sameton sinamian, sane sampun prame ledang nodia pakaryan titiang
sajeroning wanti warsa sane kaping dasa Sekaa Truna Truni Yowana Dharma Shanti Banjar
Ambengan rainane mangkin.
Kaping kalih titiang nenten lali nunas gung renapangampura santukan sampun janten
makeh makekirangnyane inggihan indik genah, panyanggra, panamyu miwah sane lianan
santukan doh wiakti, tan prasida nagingin sakadi pangarsan Ida Dane.
Salanturnyane atur uningayang titiang ring ida dane makasami, sajeroning nyanggra wanti
warsa sane kaping dasa puniki kadagingin antuk makudang-kudang pacentokan,
minakadi gotong royong kebersihan lingkungan, taler kajangkepin antuk ngaturang punia amatra
ring panti werda majeng ring anak lingsir sane patut polih uratian iraga sareng sami.
Mungguing prabea sane kaanggen nyanggra acara wanti warsa rahinane mangkin wantah
saking urunan miwah kas sekaa truna truni, katambahin antuk paica lascarya saking krama
Banjar Ambengan. Mangda taler kauningin, sekaa truna truni sane iring titiang natak panes tis
ring lingkungan banjar iriki akehnyane karobelah diri, lanang satus diri, istri seket diri.
Salanturnyane titiang makesami iriki nunas mangda sueca Bapak Prabekel pinaka
manggala praja ngicenin tuntunan, pawisik, pawarah-warah, mangda prasida titiang iriki salung-
lung sabayan taka paras-paros sarpanaya, tur sida ngulati sane mawasta "matuha, migasa,
mawerdya" sayan duur yusane, sayan urati miwah gelitik tur prasida sayan limbak ring
sajeroning sekancan utsaha. Taler jagi aturin titiang Bapak Prabekel jagi motong tumpeng pinaka
cihna acara wanti warsa Sekaa Truna Truni Yowana Dharma Shanti Banjar Ambengan sampun
mamargi.
Titiang pinaka prawartaka wanti warsa ngaturang suksmaning manah antuk uratian Ida
Dane para sameton sinamian taler nenten lali titiang nunas gung rna pangampura antuk
makekirangannyane.
"Om Santhi, Santhi, Santhi Om"
Diposkan oleh Made Gargita

1.1 Teges Sambrama wacana

Sambrama wacana inggih punika bebaosan sané katlatarang sané daging lan tetueknyané
ngenenin indik nyanggra utawi nyapa para uleman ring sajeroning upacara adat, agama miwah
acara sane lianan.
Wenten makudang-kudang soroh Sambrama wacana manut tatacarane maktayang
makadi:
 Sambrama wacana Dadakan, inggih punika ri kala maktayang Sambrama wacana
nenten nganggén téks, riantukan sang sané nyanggra uleman (sane maktayang Sambrama
wacana) nadaksara kasudi mangda nyanggra para uleman.
 Sambrama wacana Kawacen, inggih punika Sambrama wacana sane sampun
kaparidabdabang, sampun maduwe teks,tur ri kala maktayang Sambrama wacana
ngawacen téks, riantukan sang sané maktayang Sambrama wacana punika sampun
jangkep sareng naskah sane jagi kawedarang .
 Sambrama wacana Kaapalang, inggih punika Sambrama wacana sané sampun
kaparidabdabang, sampun maduwe teks, tur sampun keapalang, raris rikala maktayang
Sambrama wacana sang sane ngawedar sembrama nénten nganggénteks utawi ngawacen
téks / lisan.
 Sambrama wacana Ringkesan, inggih punika Sambrama wacana sané sadurung
kabaktayang sampun nyiagayang naskahnyané sané marupa sesuratan unteng-unteng
Sambrama wacana kéwanten.
1.2 Wangun Sambrama wacana
Sajeroning makarya Sambrama wacana patut uning indik tata cara ngaryanang
Sambrama wacana punika sakadi :
1. Murda : Murdan Sambrama wacanane mangda anut ring topik sane jagi kabaktayang.
2. Pamahbah : Pamahbah patut madaging pangastungkara, Pangrastiti ring Ida Sanghyang
Widi, matur pangayubagia majeng ring para uleman sane sampun ledang rauh.
3. Daging : Daging Sambrama wacana, mangda anut ring topik acara sane kamargiang
mangda para uleman tatas uning ring indik lan pamargin acarane.
4. Pamuput : Pamuput patut madaging panyuksma majeng ring para uleman sané sampun
prasida rauh micayang uratian lan pangrastitine majeng ring acara sane
kemargiang, matur nunas pangampura antuk kakirangan ri kala nyanggra para
uleman, taler panyineb antuk parama santi.

1.3 Tetikes Sambrama wacana

Wenten agem-ageman ri kala maktayang Sambrama wacana, sane kawastanin tetikes
makadi:
 Wicara inggih punika kawagedan utawi kawikanan ring sajeroning indik daging
bebaosan (penguasaan materi). Rikala maktayang Sambrama wacana bebaosane patut
manut ring topik Sambrama wacana sané kabaktayang, mangdané prasida nudut kayun
para uleman sane miragiang.
 Wirasa inggih punika kewagedan sajeroning ngaresepang lan ngerasayang daging
bebaosan (menghayati). Ritatkala maktayang Sambrama wacana kacihnayang antuk
pangrasa mangdané para uleman sané sampun rauh rumasa bagia santukan sampun
kasanggra becik.
 Wiraga inggih punika semita lan laras (gerak tubuh) sang sané maktayang Sambrama
wacana, mangda anut ring daging sembrama sane kabaktayang
 Wirama inggih punika intonasi suara, vokal, tanjek bebaosan rikala maktayang
Sambrama wacana mangda anut ring punggelan lengkara, punika sane ngawinan lengut
kapiragi olih para uleman sami.
 Wesata inggih punika kewagedan ring sajeroning nyobyahan utawi ngalimbakang daging
bebaosan